Last updated on January 9th, 2026 at 02:47 pm
ಕಡಬ, ಜ. 09: ರಾಮಕುಂಜ ಗ್ರಾಮೊದ ನೀರಾಜೆ ಪನ್ಪಿನಲ್ಪ ಕಂಡನೆ ಜೂವ ಗೆತ್ತೊನರೆ ತೂದು ಇತ್ತೆ ಆಸ್ಪತ್ರೆಡ್ ಇತ್ತೆನಾ ಬೊಕ್ಕನಾಂದ್ ಸೈಪುನ ಅಂದಾಜಿಡ್ ಇತ್ತೆನ್ಡ ಇಂಚಿ ಬೊಡೆದಿ ಬೊಕ್ಕ ಮಗೆ ನಾಪತ್ತೆ ಆತಿನ ಬಗೆಟ್ ಕಡಬ ಸ್ಟೇಷನ್ಡ್ ಪ್ರಕರಣ ದಾಕಲಾತ್ಂಡ್.
ಕೊೖಲ ಗ್ರಾಮೊದ ಜನತಾ ಕಾಲನಿ ನಿವಾಸಿ ಮುನೀರ್ ಆತ್ಮಹತ್ಯೆ ಮಲ್ತೊನರೆ ತೂದು ಕುಡ್ಲದ ಸರಕಾರಿ ಆಸ್ಪತ್ರೆಡ್ ಸಾವು-ಬದ್ಕ್ದ ನಡುಟು ಪೊರ್ಮ್ಬೊನ್ದಿತ್ತೆರ್ನ್ಡ ಬೊಡೆದಿ ನೇಹಾ (36) ಬೊಕ್ಕ ಮಗೆ ಮಹಮ್ಮದ್ ನಿಹಾಲ್ (3.5) ನಾಪತ್ತೆ ಆತೆರ್.
ಈ ಬಗೆಟ್ ಮುನೀರ್ನ ಪಲಿ ಹಾಜಿರಾ ಒಯಿಲ್ ಬರೆಪಾದೆರ್. ಎನ್ನ ಮೆಗ್ಯೆ ಮುನೀರ್ ಮೂಡಿಗೆರೆದ ನೇಹಾನ್ 8 ವರ್ಸೊಗು ದುಂಬು ಮದಿಮೆ ಆದಿತ್ತ್ದ್, 6 ವರ್ಸೊದ ಸಫಿಯಾ ಬೊಕ್ಕ ಮಹಮ್ಮದ್ ನಿಹಾಲ್ (3.5) ಪುದರ್ದ 2 ಜೋಕುಲು ಉಲ್ಲೆರ್. ಮುನೀರ್ ಬೊಕ್ಕ ಬೊಡೆದಿ ನೇಹಾ 2 ವರ್ಸ ಕೊೖಲದ ಆಯನ ಇಲ್ಲಡ್ ಇತ್ತೆರ್.
ಬೊಕ್ಕ ಬಾಡಾಯಿದ ಇಲ್ಲಡ್ ಇತ್ತೆರ್. 3 ತಿಂಗೊಲುಗು ದುಂಬು ಮುನೀರ್ ಮಲ್ಲ ಮಗಲ್ ಸಫಿಯಾನ್ ಎನ್ನ ಅಮ್ಮೆರೆನ ಇಲ್ಲಡ್ ಬುಡ್ದು, ಬೊಡೆದಿ ನೇಹಾ ಬೊಕ್ಕ ಮಗೆ ಮಹಮ್ಮದ್ ನಿಹಾಲ್ನ ಒಟ್ಟುಗು ಬೆಂಗಳೂರ್ಗ್ ಬೇಲೆಗ್ ಪೋತೆರ್. ಬೊಕ್ಕ ಕರಿನ ನವೆಂಬರ್ಡ್ ಸಫಿಯಾನ ಪುಟ್ಟಿನ ದಿನೊತಾನಿ ಬತ್ತ್ದ್ ಆನಿಯೇ ಬೆಂಗಳೂರ್ಗ್ ಪಿರ ಪೋತೆರ್. ಡಿ. 25ತಾನಿ ಮುನೀರ್ ಒರಿಯೇ ಬೆಂಗಳೂರ್ರ್ದ್ ಬತ್ತ್ದ್ ಕೊೖಲಡ್ ಅಮ್ಮೆರೆನ ಇಲ್ಲಡ್ ಉಂತುದಿತ್ತೆರ್. ಬೊಡೆದಿ ಬೊಕ್ಕ ಬಾಲೆದ ಬಗೆಟ್ ಕೇನ್ನಗ ನನ ರಡ್ಡ್ ದಿನೊಟು ಬರ್ಪೆರ್ ಪನ್ದ್ ಪನ್ದಿತ್ತೆ. ಆತೇ ಅತ್ತಂದೆ ಆಯೆ ಬೊಡೆದಿ ಬೊಕ್ಕ ಮಗನೊಟ್ಟುಗು ವೀಡಿಯೋ ಕಾಲ್ ಮಲ್ತ್ದ್ ಪಾತೆರ್ದಿತ್ತೆ.
ಬೊಕ್ಕ ಡಿ. 30ದಾನಿ ಮುನೀರ್ ಒವ್ವಾ ನೆವನೊಡು ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನರ ತೂತೆ. ಆಂಡ ಮುಟ್ಟದಕ್ಲೆನ ಸಮಯ ಪ್ರಜ್ಞೆರ್ದಾವರ ಬಚಾವಾದಿತ್ತೆ. ಜ. 3ತಾನಿ ಕುಡ ನೀರಾಜೆ ಆಯಿಷಾ ಶಾಲೆದ ಕೈತಲ್ ಆತ್ಮಹತ್ಯೆ ಮಲ್ತೊನರ ತೂದು ಗಾತಿದ ಸ್ಥಿತಿಕ್ ಪೋದಿತ್ತೆ. ಆಯಗ್ ವೆಸ್ಲಾಕ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು, ಪಾತೆರುನ ಸ್ಥಿತಿಟ್ ಇಜ್ಜೆ. ಈ ಬಗೆಟ್ ನೇಹಾಗ್ ವಿಷಯ ತೆರಿಪಾಯೆರ ಕಾಲ್ ಮಲ್ತ್ಂಡ ಮೊಬೈಲ್ ಸ್ವಿಚ್ ಆಫ್ ಆದುಂಡು. ಅಪ್ಪೆ ಮಗನ ಬಗೆಟ್ ಸಂಬಂಧಿಕೆರೆಡ ವಿಚಾರಿತ್ಂಡಲಾ ತಿಕ್ಕಂದಿನೆರ್ದಾವರ ಕಡೆಸ್ಸ್ದ್ ನಾಪತ್ತೆದ ಒಯಿಲ್ ಬರೆಪಾದ ಪನ್ದ್ ಪಲಿ ಹಾಜಿರಾ ಪನ್ತೆರ್.