Last updated on January 12th, 2026 at 05:54 am
ಬೆಂಗಳೂರ್ದ ರಾಮಮೂರ್ತಿ ನಗರ ಪೊಲೀಸ್ ಸ್ಟೇಶನ್ ಸೀಮೆಡ್ ನಡತಿನ ಟೆಕ್ಕಿ ಪೊಣ್ಣು ನಿಗೂಢವಾದ್ ತೀರ್ದಿನ ಪ್ರಕರಣೊಗು ಇತ್ತೆ ಸ್ಫೋಟಕ ಟ್ವಿಸ್ಟ್ ತಿಕ್ಕ್ದ್ಂಡ್. ಸುರುಟು ಟೆಕ್ಕಿ ಶರ್ಮಿಳಾ ಶಾರ್ಟ್ ಸರ್ಕ್ಯೂಟ್ರ್ದಾವರ ಉಂಡಾತಿನ ಸೂಟ್ ದಮ್ಮು ಕಟ್ಟ್ದ್ ತೀರ್ದೆರ್ ಪನ್ದ್ ಎನ್ನ್ದಿತ್ತೆರ್. ಆಂಡ, ಇತ್ತೆ ವಾಸ್ತವೊಡು ಕೊಲೆ ಪನ್ದ್ ಪೊಲೀಸ್ ಜಡ್ತೆಡ್ ತೆರಿದ್ ಬೈದ್ಂಡ್. ಅಂಚಾಂಡ, ಕೆರ್ತಿನಾಯೆ ಏರ್?
ಬೆಂಗಳೂರು, ಜ. 11: ರಾಮಮೂರ್ತಿ ನಗರ ಪೊಲೀಸ್ ಸ್ಟೇಶನ್ ಸೀಮೆಡ್ ನಡತಿನ ಕುಡ್ಲದ ಟೆಕ್ಕಿ ಶರ್ಮಿಳಾನ ಸಾವುಗು ಮಲ್ಲ ಟ್ವಿಸ್ಟ್ ತಿಕ್ಕ್ದ್ಂಡ್. ಶರ್ಮಿಳಾ ಶಾರ್ಟ್ ಸರ್ಕ್ಯೂಟ್ರ್ದಾವರ ಉಂಡಾತಿನ ಸೂಟ್ ದಮ್ಮು ಕಟ್ಟ್ದ್ ತೀರ್ದಿಜೆರ್. ಆರೆನ್ ಒಂಜಿ ಸೈಡ್ರ್ದ್ ಮೋಕೆ ಮಲ್ತೊಂದಿತ್ತಿನಾಯೆ ಒರಿ ಕೆರ್ದ್ ಬೊಕ್ಕ ಸಾಕ್ಷ್ಯ ನಾಶ ಮಲ್ಪೆರ ಇಲ್ಲಗ್ ಸೂ ಪಾಡ್ದೆ ಪನ್ಪಿ ಸ್ಫೋಟಕ ಅಂಶ ಪೊಲೀಸ್ ಜಡ್ತೆಡ್ ತೆರಿದ್ ಬೈದಿತ್ತ್ದ್, ಈ ಬಗೆಟ್ ಶರ್ಮಿಳಾನ್ ಕೆರ್ತಿನ ಕೇರಳ ಮೂಲೊದ ಕರ್ನಲ್ ಕುರೈ ಪನ್ಪಿನಾಯನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಬೆಂಗಳೂರ್ದ ರಾಮಮೂರ್ತಿ ನಗರೊದ ಅಪಾರ್ಟ್ಮೆಂಟ್ಡ್ ಶಾರ್ಟ್ ಸರ್ಕ್ಯೂಟ್ರ್ದಾವರ ಸೂ ಪತೊಂದು, ಪುಗೆ ದಿಂಜಿದ್, ಈ ಪುಗೆಟ್ ದಮ್ಮು ಕಟ್ಟ್ದ್ ಕುಡ್ಲ ಮೂಲೊದ 34 ವರ್ಷದ ಸಾಫ್ಟ್ವೇರ್ ಉದ್ಯೋಗಿ ಶರ್ಮಿಳಾ ತೀರ್ದೆರ್ ಪನ್ದ್ ಪನ್ದಿತ್ತೆರ್. ಈ ಬಗೆಟ್ ರಾಮಮೂರ್ತಿ ನಗರ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ಪುನಗ, ಟೆಕ್ಕಿ ಶರ್ಮಿಳಾ ಸಾವುದ ರಹಸ್ಯ ಅಕೇರಿಗ್ಲಾ ತೆರಿದ್ ಬೈದ್ಂಡ್. ಜಡ್ತೆದ ಪೊರ್ತುಡು ಟೆಕ್ಕಿ ಶರ್ಮಿಳಾನ ಕೊಲೆ ಪನ್ದ್ ಬೊಲ್ಪುಗು ಬೈದ್ಂಡ್. ಟೆಕ್ಕಿ ಶರ್ಮಿಳಾನ್ ವನ್ ಸೈಡ್ ಲವ್ ಮಲ್ತೊಂದಿತ್ತಿನ, ಎದುರುದ ಇಲ್ಲದ ಕೇರಳ ಮೂಲೊದ ಜವನೆ ಕರ್ನಲ್ ಕುರೈ ಕೆರ್ತಿನಾಯೆ ಪನ್ದ್ ತೆರಿದ್ ಬೈದ್ಂಡ್. ಉಂಬ್ಯಗ್ ಇತ್ತೆ 18 ವರ್ಸ ಪ್ರಾಯ ಆದಿತ್ತ್ದ್, ಉಂಬ್ಯೆ ಕಾಲೇಜ್ ಕಲ್ತೊಂದಿತ್ತೆ. ಆಂಡ, ತನ್ನ ಪ್ರಾಯೊರ್ದು ಮಲ್ಲ, 34 ವರ್ಸೊದ ಟೆಕ್ಕಿ ಶರ್ಮಿಳಾನ ಮಿತ್ತ್ ಲವ್ ಆತ್ಂಡ್. ಆಂಡ, ಈ ವಿಚಾರೊನು ಶರ್ಮಿಳಾಗ್ ಪನ್ಡ್ದಿಜ್ಜಂಡ್. ಆಯನ ಮನಸ್ಸ್ಡೇ ದೀವೊಂದು ಕಡೆಕ್ ಆಲೆನೇ ಭೀಕರವಾದ್ ಕೆರ್ದ್ ಪಾಡ್ದೆ.
ಕೆರ್ತಿನ ಎಂಚ?
ಶರ್ಮಿಳಾ ಕರಿನ ರಡ್ಡ್ ವರ್ಸೊರ್ದಿಂಚಿ ಸುಬ್ರಹ್ಮಣ್ಯ ಲೇಔಟ್ಡ್ ಇತ್ತೆರ್. ಆರೋಪಿ ಕರ್ನಲ್ ಕುರೈ ಬರಿತ ಇಲ್ಲದಾಯೆ ಆಯಿನೆರ್ದಾವರ, ಮೋನೆ ತೂದು ಗುರ್ತ ಇತ್ತ್ಂಡ್, ಎದುರು ತಿಕ್ಕ್ಂಡ ಇರ್ವೆರ್ಲಾ ಪಾತೆರೆದೆರ್, ಉಂದೆತ ನಡುಟು ಕುರೈಗ್ ಶರ್ಮಿಳನ ಮಿತ್ತ್ ಲವ್ ಆತ್ಂಡ್. ಆಂಡ, ಈ ಲವ್ ವಿಚಾರೊನು ಶರ್ಮಿಳಾಗ್ ಪನ್ಡ್ದಿಜ್ಜಂಡ್. ಇಂಚ ಒಂಜಿ ದಿನ, ಜನವರಿ 3ತಾನಿ ಕರ್ನಲ್ ಕುರೈ, ಬಾಲ್ಕನಿ ಮುಕೇನ ಶರ್ಮಿಳಾನ ಇಲ್ಲಗ್ ಪೊಗ್ಗುದಿತ್ತ್ದ್, ಒರರ್ದ್ ಒರಾನೆ ಪಿರವುರ್ದ್ ಶರ್ಮಿಳಾನ್ ಅರಾದ್ ಪತ್ತ್ದೆ. ಅಪಗ ಶರ್ಮಿಳಾ ಕರ್ನಲ್ ಕುರೈನ ಕೈರ್ದ್ ಬುಡ್ಪಾವೊನ್ರ ತೂತೆರ್. ಆ ಪೊರ್ತುಡು ಕುರೈ, ಶರ್ಮಿಳಾನ ಕೆಕ್ಕಿಲ್ದ ಭಾಗೊಗು ಗಟ್ಟಿ ಆಕ್ದಿತ್ತ್ದ್, ಉಂದೆರ್ದಾವರ ಶರ್ಮಿಳಾ, ಮತಿ ತತ್ತ್ದ್ ಬೂರ್ದೆರ್. ಬೊಕ್ಕ ಶರ್ಮಿಳಾನ್ ದಮ್ಮು ಕಟ್ಟಾದ್ ಕೆರ್ತೆ. ಆತೇ ಅತ್ತಂದೆ ಸಾಕ್ಷಿ ನಾಶ ಮಲ್ಪೆರ ಇಲ್ಲಗ್ ಸೂ ಪಾಡ್ದ್ ಪದ್ರಾಡಾತೆ ಪನ್ದ್ ಪೊಲೀಸ್ ಜಡ್ತೆಡ್ ತೆರಿದ್ ಬೈದ್ಂಡ್.
ಏರ್ ಈ ಶರ್ಮಿಳಾ?
ತೀರ್ದಿನ ಶರ್ಮಿಳಾ (34) ಕುಡ್ಲದ ಕಾವೂರು ಮೂಲೊದಾರ್. ಕರಿನ ಒಂಜರೆ ವರ್ಸೊರ್ದಿಂಚಿ ಬೆಂಗಳೂರ್ದ ರಾಮಮೂರ್ತಿ ನಗರೊದ ಸುಬ್ರಹ್ಮಣ್ಯ ಲೇಔಟ್ದ ಅಪಾರ್ಟ್ಮೆಂಟ್ಡ್ ದೋಸ್ತಿಪೊಣ್ಣನ ಒಟ್ಟುಗು ಇತ್ತೆರ್. ಇಲ್ಲ ಕೈತಲ್ದ ಖಾಸಗಿ ಸಾಫ್ಟ್ವೇರ್ ಕಂಪನಿಡ್ ಟೆಕ್ಕಿಯಾದ್ ಬೇಲೆ ಮಲ್ತೊಂದಿತ್ತೆರ್. ನಡಕೆ ನಡತಿನಾನಿ ಶರ್ಮಿಳಾಗ್ ರಜೆ ಇತ್ತ್ದ್, ಆರೆನ ದೋಸ್ತಿ ಊರ್ಗ್ ಪೋದಿತ್ತಿನೆರ್ದಾವರ ಶರ್ಮಿಳಾ ಇಲ್ಲಡ್ ಒರ್ತಿಯೇ ಇತ್ತೆರ್. ಉಂದು ತೆರಿದೇ ಕರ್ನಲ್ ಇಲ್ಲದುಲಯಿ ಪೊಗ್ಗುದು ಈ ಕೃತ್ಯ ಮಲ್ತ್ದೆ.