Last updated on January 12th, 2026 at 09:43 am
ಕುಡ್ಲ, ಜ. 12: ಜಾರ್ಖಂಡ್ ಮೂಲೊದ ಕಾರ್ಮಿಕಗ್ ಬಾಂಗ್ಲಾದೇಶಿ ಪ್ರಜೆ ಪನ್ದ್ ಆರೋಪ ಮಲ್ತ್ದ್, ನಾಲ್ವೆರ್ ಆಂಜೊವುಲು ದೈಹಿಕ ಬೊಕ್ಕ ಮಾನಸಿಕ ಹಿಂಸೆ ಕೊರ್ದು ಹಲ್ಲೆ ಮಲ್ದಿನ ನಡಕೆ ಕಾವೂರು ಪೊಲೀಸ್ ಸ್ಟೇಶನ್ ಸೀಮೆಡ್ ನಡತಿನ ಬಗೆಟ್ ವರದಿ ಆತ್ಂಡ್.
ಆರೋಪಿಲೆನ್ ಕೂಳೂರು ನಿವಾಸಿಲಾಯಿನ ಸಾಗರ್, ಧನುಷ್, ಲಾಲು ಯಾನೆ ರತೀಶ್ ಬೊಕ್ಕ ಮೋಹನ್ ಪನ್ದ್ ಗುರ್ತ ಪತ್ತ್ದೆರ್.
ಜಾರ್ಖಂಡ್ ಮೂಲೊದ ಗಿರಿಜಾ ಅನ್ಸಾರಿ ಕರಿನ 10–15 ವರ್ಸೊರ್ದಿಂಚಿ ಇಂಚಿ ಬತ್ತ್ದ್ ಕಾರ್ಮಿಕೆ ಆದ್ ಜೂವನ ಕರಿತೊಂದಿತ್ತ್ದ್, ಈ ನಾಲ್ವೆರ್ ಆರೋಪಿಲು “ಈ ಬಾಂಗ್ಲಾದೇಶೊದ ಪ್ರಜೆ” ಪನ್ದ್ ಪನೊಂದು ಆಕ್ದಿತ್ತ್ದ್, ಯಾನ್ ಜಾರ್ಖಂಡ್ದಾಯೆ ಪನ್ದ್ ಪನ್ಡಲಾ ಆರೋಪಿಲು ಕೇನಂದೆ, ದಾಖಲೆಲೆನ್ ಕೊರ್ಯೆರ ಪನೊಂದು ದೌರ್ಜನ್ಯ ಮಲ್ತ್ದೆರ್ ಪನ್ದ್ ಆರೋಪ ಉಂಡು.
ಹಲ್ಲೆ ಬೊಕ್ಕ ಮಾನಸಿಕ ಹಿಂಸೆ ತಿನ್ದ್ದ್ ಗಿರಿಜಾ ಅನ್ಸಾರಿ ಕೆಂಗುಡೆರೆ ಪೋಡಿಗೆಡ್ ಪೊಲೀಸೆರೆಡ ಒಯಿಲ್ ಬರೆಪಾಯೆರ ದುಂಬು ಪಿರ ತೂವೊಂದಿತ್ತೆರ್. ಈ ಬಗೆಟ್ ಒಲವು ತಿಕ್ಕ್ದ್ ಪೊಲೀಸೆರ್ ರಪಕ್ಕ ಜಾಗೆಗ್ ಬತ್ತ್ದ್ ಕಾರ್ಮಿಕನ ರಕ್ಷಣೆ ಮಲ್ತ್ದೆರ್ ಪನ್ದ್ ಪೊಲೀಸ್ ಆಯುಕ್ತೆರ್ ತೆರಿಪಾದೆರ್.
ಈ ಪ್ರಕರಣೊಡು ನಾಲ್ವೆರ್ ಆರೋಪಿಲೆನ ಮಿತ್ತ್ ಕೆರ್ಪುನ ಪುನೆಪು ಸೇರ್ದ್ ಬೇತೆ ಬೇತೆ ಸೆಕ್ಷನ್ಲೆನ ಅಡಿಟ್ ಪ್ರಕರಣ ದಾಕಲ್ತೊಂದೆರ್. ಆರೋಪಿಲೆನ ಮಿತ್ತ್ 307 ಪ್ರಕರಣ ದಾಕಲಾದಿತ್ತ್ದ್, ಮಾತೆರೆನ್ಲಾ ಗುರ್ತ ಪತ್ತ್ದೆರ್. ಅಕಲೆನ್ ಇತ್ತೆನೇ ಕೈದ್ ಮಲ್ಪೆರೆ ಸೂಚನೆಲೆನ್ ಪೊಲೀಸ್ ಆಯುಕ್ತೆರ್ ಕೊರ್ತೆರ್.