Last updated on January 13th, 2026 at 09:25 am
ಉಳ್ಳಾಲ, ಜ. 13: ಶಬರಿಮಲೆ ಯಾತ್ರೆ ಪೋದಿತ್ತಿನ ಉಳ್ಳಾಲ ತಾಲೂಕ್ದ ಅಯ್ಯಪ್ಪ ಮಾಲಾ ವೃತಧಾರಿ ಒರಿ ಕೇರಳದ ಎರಿಮಲೆಟ್ ಹಾರ್ಟ್ ಅಟ್ಯಾಕ್ ಆದ್ ತೀರ್ದಿನ ನಡಕೆ ಸೋಮವಾರ ಕಾಂಡೆ ನಡತ್ದ್ಂಡ್.
ಸೋಮೇಶ್ವರ ಪುರಸಭಾ ಸೀಮೆದ ಪಿಲಾರ್ ದೇಲಂತಬೊಟ್ಟು ನಿವಾಸಿ ಉದ್ಯಮಿ ಚಂದ್ರಹಾಸ್ ಶೆಟ್ಟಿ (55) ತೀರ್ದಿನಾರ್. ಚಂದ್ರಹಾಸ್ ಮೇರ್ ಬೇತೆ ಸ್ವಾಮಿಲೆ ಒಟ್ಟುಗು ಶನಿವಾರದಾನಿ ಅರ್ಕುಳ, ತುಪ್ಪೇಕಲ್ಲ್ರ್ದ್ ಶಬರಿಮಲೆ ಯಾತ್ರೆ ಪೋದಿತ್ತೆರ್. ಸೋಮವಾರ ಕಾಂಡೆ ಚಂದ್ರಹಾಸೆರ್ ಎರಿಮಲೆರ್ದ್ ಕಾಡ ಸಾದಿಯೆ ಪಂಪೆಗ್ ಪೋವೊದಿತ್ತಿನ ಪೊರ್ತುಡು ಕುಸ್ಕುದ್ ಬೂರ್ದ್ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್.
ಮರಣೋತ್ತರ ಪರೀಕ್ಷೆನ್ ತಾಪುರ್ತೋಪು ಮಲ್ತ್ದ್ ಉಳ್ಳಾಲಗ್ ಕನಯೆರೆ ಸ್ಪೀಕರ್ ಯು.ಟಿ.ಖಾದರ್ ಮೇರ್ ಕೇರಳದ ಜನಪ್ರತಿನಿಧಿಲು ಬೊಕ್ಕ ಅಧಿಕಾರಿಲೆ ಒಟ್ಟುಗು ಪಾತೆರ್ದಿತ್ತ್ದ್, ಇನಿ ಪಾರ್ಥಿವ ಶರೀರ ಉಳ್ಳಾಲ ಎತ್ತುಂಡು.
ತೀರ್ದಿನ ಚಂದ್ರಹಾಸ್ ಮೇರ್ ಮೂಲತ: ಬಾಕ್ರಬೈಲ್ ನಿವಾಸಿ ಆದಿತ್ತ್ದ್, ಮಿನರಲ್ ವಾಟರ್ ಸಪ್ಲೈದ ವೈವಾಟ್ ಮಲ್ತೊಂದಿತ್ತೆರ್. ಕರಿನ ಪತ್ತ್ ವರ್ಸೊಗು ದುಂಬೇ ಪಿಲಾರ್ಡ್ ಇಲ್ಲ್ ಕಟ್ಟ್ದ್ ಒಕ್ಕೆಲ್ ಕುಲ್ದಿತ್ತೆರ್. ಮೇರ್ ಬೊಡೆದಿ, ಮಗೆ ಬೊಕ್ಕ ಮಗಲೆನ್ ಅಗತ್ದೆರ್.