Last updated on January 16th, 2026 at 09:41 am
ಬೆಂಗಳೂರು, ಜ. 16: ಕರಿನ ವರ್ಸ ಜೂನ್ 4 ತಾನಿ RCB ಅಭಿಮಾನಿಲೆಗ್ ಬಾರೀ ಬೆಸರ್ದ ದಿನ. ಟ್ರೋಫಿ ಗೆಂದಿನ ಕುಸಿ ಕಣ್ಣ್ ಮುಚ್ಚಿದ್ ಬುಲಾನಗ ಮಾಯಕ ಆದಿತ್ತ್ಂಡ್. ಚಿನ್ನಸ್ವಾಮಿ ಸ್ಟೇಡಿಯಂದ ಅವ್ಯವಸ್ಥೆ, ಪೊಲೀಸೆರೆ ಗೋಸ್ಮರಿ, ಸರ್ಕಾರೊದ ಬೇಜವಬ್ದಾರಿಗ್ 11 ಜನ ತೀರ್ದಿತ್ತೆರ್. ಆ ನಡಕೆರ್ದ್ ಬೊಕ್ಕ ಚಿನ್ನಸ್ವಾಮಿ ಸ್ಟೇಡಿಯಂಗ್ ಕುಡ ದುಂಬುದ ವೈಭವೊನು ತೂಯೆರಾವೊಂದಿಜ್ಜಿ. ಕೆಎಸ್ಸಿಎ (KSCA) ಅಧ್ಯಕ್ಷೆ ವೆಂಕಟೇಶ್ ಪ್ರಸಾದ್ಲಾ ಪಾತೆರ ಕೊರ್ದಿತ್ತೆರ್ ಆಂಡ KSCAಗ್ RCB ಮ್ಯಾನೇಜ್ಮೆಂಟ್ ಸಡನ್ ಶಾಕ್ ಕೊರ್ತುಂಡು.
ಕಾರ್ತೊರ್ಪು ಪ್ರಕರಣೊಡು ಆರ್ಸಿಬಿ ಮ್ಯಾನೇಜ್ಮೆಂಟ್ ಪ್ರಮುಖ ಆರೋಪಿ ಜಾಗೆಡ್ ಉಂಡು. ಆತೇ ಅತ್ತಂದೆ ಉಪಾಧ್ಯಕ್ಷೆ ರಾಜೇಶ್ ಮೆನನ್ನ್ ವಶೊಕು ಗೆತೊಂದು ಪೊಲೀಸೆರ್ ವಿಚಾರಣೆ ಮಲ್ತಿತ್ತೆರ್. ಆತೇ ಅತ್ತಂದೆ ಆರ್ಸಿಬಿ ಮ್ಯಾನೇಜ್ಮೆಂಟ್ದ ಮಿತ್ತ್ ಈ ನಡಕೆ ಕಪ್ಪು ಬೊಟ್ಟು ದೀದಿತ್ತ್ಂಡ್. ಅಂಚಾದ್ ರಾಜೇಶ್ ಮೆನನ್ ಚಿನ್ನಸ್ವಾಮಿದ ಸಹವಾಸೊನೇ ಬೊರ್ಚಿ ಪನೊಂದುಲ್ಲೆರ್. ಎಂಕುಲು ರಾಯಪುರ್ ಅತ್ತ್ಂಡ ನವೀ ಮುಂಬೈದ ಡಿವೈ ಪಾಟೀಲ್ ಸ್ಟೇಡಿಯಂನ್ ಹೋಮ್ ಗ್ರೌಂಡ್ ಮಲ್ತೊನುವ ಪನ್ದ್ ಪನೊಂದುಲ್ಲೆರ್. ಆರ್ಸಿಬಿದ ಮ್ಯಾಚ್ಲ್ ಚಿನ್ನಸ್ವಾಮಿರ್ದ್ ದೂರ ಆಂಡ ಕೆಎಸ್ಸಿಎಗ್ ಮಲ್ಲ ನಷ್ಟ ಆಪುಂಡು.
ಚಿನ್ನಸ್ವಾಮಿ ಸ್ಟೇಡಿಯಂದ ಬೇಲೆನದ ಪರಿಶೀಲನೆ ಮಲ್ತಿನ ಪೊಲೀಸ್ ಆಯುಕ್ತೆ
ಪೊಲೀಸ್ ಇಲಾಖೆ 17 ಸಮಸ್ಯೆಲೆಗ್ ಪಿರಿಕಟ್ಟ್ ಮಲ್ತೊನರ KSCAಗ್ ಸೂಚನೆ ಕೊರ್ದಿತ್ತ್ಂಡ್. ಅವೆತ ಬೇಲೆನ್ KSCA ಸುರು ಮಲ್ದ್ಂಡ್. ಗುರುವಾರದ ಇನಯೊರ್ದು ಬೊಕ್ಕ, ಈತ್ನೇಟ ದಾದ ಮಾತ ಕ್ರಮೊಕುಲೆನ್ ಗೆತೊಂದೆರ್ ಪನ್ಪಿನೆನ್ ಕಮಿಷನರ್ ಪರಿಶೀಲನೆ ಮಲ್ತ್ದೆರ್. ಇನಯೊಡು ಜಿಬಿಎ, ಅಗ್ನಿಶಾಮಕ, BWSSB, ಬೆಸ್ಕಾಂದ ಅಧಿಕಾರಿಲು ಪಾಲ್ಪಡೆದಿತ್ತೆರ್. ಎಂಚಾಂಡಲಾ ಮಲ್ತ್ದ್ ಸಮಸ್ಯೆಗ್ ಪಿರಿಕಟ್ಟ್ ಮಲ್ತೊಂದು ಆರ್ಸಿಬಿದ ಗೊಬ್ಬುನು ಚಿನ್ನಸ್ವಾಮಿಡ್ ಗೊಬ್ಬಾಯೆರ KSCA ಅಧ್ಯಕ್ಷೆ ವೆಂಕಟೇಶ್ ಪ್ರಸಾದ್ ಕೈಕಾರ್ ಆಕೊನೊಂದುಲ್ಲೆರ್.
ಒಟ್ಟಾರೆ ಈ ವರ್ಸ ಚಿನ್ನಸ್ವಾಮಿ ಸ್ಟೇಡಿಯಂಡ್ ಆರ್ಸಿಬಿ ಗೊಬ್ಬುನವು ಎಚ್ಚಿನಂಶ ಡೌಟ್. ವ್ಯವಸ್ಥೆ ಸಮ ಇಜ್ಜಿ, ದಾಲ ಎಚ್ಚಿಕಮ್ಮಿ ಆಂಡ ಎಂಕ್ಲೆನ ತರೆಕೇ ಬೂರುಂಡು ಪನ್ಪಿ ಪೋಡಿಗೆ ಆರ್ಸಿಬಿ ಮ್ಯಾನೇಜ್ಮೆಂಟ್ಗ್ ಉಂಡು. ಈ ನಡುಟು KSCA ಮಾತ್ರ ಮಾತಾ ಸಮಸ್ಯೆ ಕ್ಲಿಯರ್ ಮಲ್ತ್ದ್ ಆರ್ಸಿಬಿ ಮ್ಯಾನೇಜ್ಮೆಂಟ್ದ ಮನಸ್ ಗೆಂದುನ ಪುನೆಪು ಬರೊಂದುಂಡು.