Last updated on January 25th, 2026 at 09:27 am
ರಾಮಕುಂಜ, ಜ. 25: ಕೋಡೆ ಬಯ್ಯಡ್ ಕಡಬ ತಾಲೂಕ್ದ ರಾಮಕುಂಜದ ಪಾದೆ ಪನ್ಪಿನಲ್ಪ ಮಗೆನೇ ಅಮ್ಮೆರೆಗ್ ಬೀಸತ್ತಿ ಪಾಡ್ದ್, ಬೆಡಿಟ್ ಶೂಟ್ ಮಲ್ತ್ದ್, ಬೊಕ್ಕ ತಾನ್ಲಾ ಬೆಡಿಟ್ ಶೂಟ್ ಮಲ್ತ್ದ್ ಆತ್ಮಹತ್ಯೆ ಮಲ್ತೊಂದಿನ ನಡಕೆ ನಡತ್ದ್ಂಡ್. ಆಂಡ ಈ ನಡಕೆಡ್ ಇತ್ತೆ ಟ್ವಿಸ್ಟ್ ಬತ್ತಿತ್ತ್ದ್ ಆಣನ ಅಪ್ಪೆ, ಅಮ್ಮೆನೇ ಮಗನ್ ಬೆಡಿ ದಕ್ಕ್ದ್ ಕೆರ್ತೆ ಪನ್ದ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಆತ್ಮಹತ್ಯೆ ಪನ್ದ್ ಎನ್ನೊಂದಿತ್ತಿನ ಈ ಪ್ರಕರಣ ಇತ್ತೆ ಆತ್ಮಹತ್ಯೆನಾ? ಕೊಲೆನಾ? ಪನ್ಪಿ ಪ್ರಶ್ನೆಗ್ ಬತ್ತ್ದ್ ಉಂತುದುಂಡು.
ತೀರ್ದಿನ ಆಣನ್ ರಾಮಕುಂಜದ ವಸಂತ್ ಅಮೀನ್ ಪನ್ಪಿನಾರೆನ ಮಗೆ ಮೋಕ್ಷ (17) ಪನ್ದ್ ಗುರ್ತ ಪತ್ತ್ದೆರ್. ಆಣನ ಅಮ್ಮಲಾ ಬೀಸತ್ತಿ ಬೂರ್ದು ಗಾತಿದ ಸ್ಥಿತಿಟ್ ಆಸ್ಪತ್ರೆಡ್ ಉಲ್ಲೆರ್, ನಡಕೆದ ಬಗೆಟ್ ಪಾಕ ಅನುಮಾನೊಲು ಉಂಡಾತ.
ಕೌಟುಂಬಿಕ ಲಡಯಿರ್ದಾವರ ಇಲ್ಲಡ್ ಮಚ್ಮಚ್ ಆದುಪ್ಪು ಪನ್ದ್ ಜನ ಪಾತೆರೊಂದಿತ್ತ್ದ್, ದುಂಬು ಬಾರೀ ಎಡ್ಡೆಡ್ ಇತ್ತಿನ ಅಮ್ಮೆ ಮಗನ ನಡುಟು ಕೋಡೆ ಒವ್ವಾ ಇಸಯೊಡು ಲಡಯಿ ಆತ್ಂಡ್. ಈ ಪೊರ್ತುಡು ಬೆಡಿಟ್ ಗುಂಡು ಫೈರ್ ಆದಿತ್ತ್ದ್, ಗುಂಡು ತಾಗ್ದ್ ಆಣ್ ತೀರ್ದೆ. ಆಣೇ ಶೂಟ್ ಮಲ್ತೊಂದೆನಾ ಅತ್ತ್ ಅಮ್ಮೆನೇ ಶೂಟ್ ಮಲ್ದೆನಾ ಪನ್ಪಿ ಬಗೆಟ್ ಅನುಮಾನ ಉಂಡು.
ನಡಕೆಗ್ ಸಂಬಂಧಿತ್ದ್ ವಸಂತ್ರೆನ ಮಿತ್ತ್ ಆರೆನ ಬೊಡೆದಿ ಜಯಶ್ರೀ ಒಯಿಲ್ ಬರೆಪಾದಿತ್ತ್ದ್, ಮಗಕ್ ಶೂಟ್ ಮಲ್ತ್ದ್ ಆರೋಪಿ ವಸಂತ ಪೂಜಾರಿ ಬೀಸತ್ತಿ ಪಾಡೊಂದೆ ಪನ್ದ್ ಒಯಿಲ್ಡ್ ಬರೆಪಾದೆರ್.
ಕರಿನ ಒಂಜಿ ವರ್ಸೊರ್ದಿಂಚಿ ಇಲ್ಲಡ್ ಅಮ್ಮೆ ಬೊಕ್ಕ ಮಗೆ ಮಾತ್ರ ಇಪ್ಪೆದೆರ್. ಬೊಡೆದಿ ಜಯಶ್ರೀ, ಕಂಡನ್ಯಡ ಮನಸ್ತಾಪ ಮಲ್ತೊಂದು ಕುಡ್ಲದ ತನ್ನ ಅಪ್ಪೆ ಇಲ್ಲಡ್ ಇತ್ತೆರ್.
ಪೊಲೀಸೆರ್ ಪರಿಶೀಲನೆ ಮಲ್ತೊಂದಿತ್ತ್ದ್, ಈ ಬಗೆಟ್ ಕಡಬ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.