Last updated on January 30th, 2026 at 08:08 am
ಬಜ್ಪೆ, ಜ. 30: ಪಡುಪೆರಾರ ಗ್ರಾಮ ಪಂಚಾಯತ್ ಸೀಮೆದ ದೊಡ್ಡಪಲ್ಕೆ, ಕತ್ತಲ್ಸರ್ ಬೊಕ್ಕ ಗೋಶಾಲೆ ಪ್ರದೇಶೊಡೆ ಚಿಟ್ಟೆಪಿಲಿ ತೂವರೆ ತಿಕ್ಕ್ದಿನ ವರದಿ ಆದಿತ್ತ್ದ್, ಮುಲ್ಪದಕುಲು ಪೋಡಿಗೆಡ್ ಉಲ್ಲೆರ್.
ಸ್ಥಳೀಯೆರೆ ಪ್ರಕಾರ, ಚಿಟ್ಟೆಪಿಲಿಕುಲು ಪಗೆಲ್ದ ಪೊರ್ತುಡ್ಲಾ ಅಂಚಿಂಚಿ ಪೋಪುನ ತೋಜಿದ್ ಬೈದಿತ್ತ್ದ್, ಜನೊಕುಲೆಗ್ ಪೋಡಿಗೆ ಉಂಡು ಮಲ್ದ್ಂಡ್. ಜನೊಕುಲು ತನ್ಕುಲೆ ಇಲ್ಲರ್ದ್ ಪಿದಯಿ ಬರ್ರೆಲಾ ಪಿರಜಾರೊಂದುಲ್ಲೆರ್. ಕೆಲವೆರ್ ತನ್ಕುಲೆ ಮೊಬೈಲ್ ಫೋನ್ಲೆಡ್ ಚಿಟ್ಟೆಪಿಲಿತ ಫೋಟೋ ಕಲೆತೆರ್.
ಮುಲ್ಪದಕುಲು ಒಯಿಲ್ ಬರೆಪಾಯಿ ಬೊಕ್ಕ, ಅರಣ್ಯ ಇಲಾಖೆ ಅಧಿಕಾರಿಲು ಚಿಟ್ಟೆಪಿಲಿನ್ ಪತ್ತೆರೆ ಬೆಟೆ ಗೂಡು ದೀತೆರ್. ಅಂಗಾರೆ ಬಯ್ಯ 7 ಗಂಟೆದ ಅಂದಾಜಿಗ್ ದೊಡ್ಡುಪಲ್ಕೆ-ಗೋಶಾಲೆ ಪ್ರದೇಶೊಡೆ ಪಾಕ ಜನ ಚಿಟ್ಟೆಪಿಲಿನ್ ತೂತೆರ್. ಒಂಜಿ ಚಿಟ್ಟೆಪಿಲಿ ಸುಮಾರ್ ಮೂಜಿ ಗಂಟೆದಾತ್ ಪೊರ್ತು ಐಟೆನೇ ಸುತ್ತಮುತ್ತ ತಿರ್ಗೊಂದಿತ್ತ್ಂಡ್ಗೆ.
ಅರಣ್ಯ ಅಧಿಕಾರಿಲುಲಾ ಈ ಪ್ರದೇಶೊಡು ಚಿಟ್ಟೆಪಿಲಿ ಇಪ್ಪುನೆನ್ ದೃಢ ಮಲ್ತ್ದೆರ್. ಆಂಡ ಕಾಲಿ ಗೂಡು ದೀಂಡ ಯಾರಂದ್, ಚಿಟ್ಟೆಪಿಲಿಕ್ಲೆನ್ ಪತ್ತೆರೆ ಬೋಡಾಪಿನ ಬೇತೆ ಕ್ರಮೊಕ್ಲೆನ್ಲಾ ಗೆತೊನ್ಲೆ ಪನ್ದ್ ನೆಟೆದಕುಲು ಒತ್ತಾಯ ಮಲ್ತ್ದೆರ್.