Last updated on February 3rd, 2026 at 05:04 pm
ದೆಲ್ಲಿ, ಫೆ. 03: ದೇಶೊದ ಪ್ರಜೆಕ್ಲೆನ ಪ್ರೈವೆಸಿದ ಹಕ್ಕ್ದೊಟ್ಟುಗು ಗೊಬ್ಯೆರೆ ಬಲ್ಲಿ, ಒಂಜೇ ಒಂಜಿ ಡೇಟಾಲಾ ಪಿದಯಿ ಪಟ್ಟ್ದ್ ಪೋವರೆ ಬಲ್ಲಿ. ಓಲಾಂಡಲಾ ದೇಶೊದ ನೇಮೊಲೆನ್ ಪಾಲಿಪೆರೆ ಆಯಿಜಿಂಡ, ದೇಶ ಬುಡ್ದು ಪೋಲೆ ಪನ್ದ್ ವಾಟ್ಸಪ್ದ ಮಾತೃಸಂಸ್ಥೆ ಮೆಟಾ ಗ್ ಸುಪ್ರೀಂ ಕೋರ್ಟ್ ಜೋರುಡೆ ಎಚ್ಚರ್ಗೆ ಕೊರ್ತುಂಡು. ಗೌಪ್ಯತೆ ಉಲ್ಲಂಘನೆ ಆರೋಪ ಕೇನ್ದ್ ಬತ್ತಿನೆರ್ದಾವರ ಕೋರ್ಟ್ ಈ ಎಚ್ಚರ್ಗೆ ಕೊರ್ತುಂಡು. ಡೇಟಾ ಡಿಸ್ಟ್ರಿಬ್ಯೂಷನ್ ಪುದರ್ಡ್ ಪ್ರಜೆಕ್ಲೆನ ಪ್ರೈವೆಸಿದ ಹಕ್ಕ್ದೊಟ್ಟುಗು ಗೊಬ್ಯೆರೆ ಬಲ್ಲಿ ಪನ್ದ್ ಸುಪ್ರೀಂ ಕೋರ್ಟ್ ಪನ್ತ್ನ್ಡ್.
ಗೋಪ್ಯತಾ ನೀತಿ ಉಲ್ಲಂಘನೆಗ್ ₹ 213.14 ಕೋಟಿ ದಂಡ ಪಾಡ್ದಿನ ಭಾರತೊದ ಸ್ಪರ್ಧಾತ್ಮಕ ಆಯೋಗದ ತೀರ್ಮಾನೊನು ಪ್ರಶ್ನೆ ಮಲ್ತ್ದ್ ವಾಟ್ಸ್ಆ್ಯಪ್ದ ಮಾತೃಸಂಸ್ಥೆ ಮೆಟಾ ಸಂದಾದಿತ್ತಿನ ಅರ್ಜಿದ ವಿಚಾರಣೆದ ಪೊರ್ತುಡು ಇಂಚ ಪನ್ತ್ನ್ಡ್.
ಅರ್ಜಿದ ವಿಚಾರಣೆ ಮಲ್ತಿನ ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್ ಬೊಕ್ಕ ನ್ಯಾಯಮೂರ್ತಿಲಾಯಿನ ಜಾಯ್ ಮಲ್ಯ ಬಾಗ್ಚಿ ಬೊಕ್ಕ ವಿಪುಲ್ ಎಂ. ಪಂಚೋಲಿ ಮೊಕುಲು ಇತ್ತಿನ ಪೀಠ ಫೆ. 9 ದಾನಿ ಮಧ್ಯಂತರ ಆದೇಶ ಪ್ರಕಟ ಮಲ್ಪುವ ಪನ್ದ್ ತೆರಿಪಾದ್ಂಡ್. ಆತೇ ಅತ್ತಂದೆ ಎಲೆಕ್ಟ್ರಾನಿಕ್ ಬೊಕ್ಕ ಮಾಹಿತಿ ತಂತ್ರಜ್ಞಾನ ಸಚಿವಾಲಯೊನು ಪಕ್ಷಗಾರೆ ಆದ್ ಮಲ್ಪೊಡು ಪನ್ದ್ ಈ ಪೊರ್ತುಡು ಆದೇಶ ಮಲ್ದ್ಂಡ್.