Last updated on February 4th, 2026 at 07:54 am
ಯೂಟ್ಯೂಬ್ಡ್ ಕಲ್ಪಾಯೆರ ಅವೇತೋ ಚಾನೆಲ್ಲ್ ಇತ್ತ್ಂಡಲಾ ಐಕ್ಲೆನ ನಡುಟು ‘ಸೊಲ್ಮೆಲು ಸ್ಟುಡಿಯೋಸ್’ ತನ್ನ ವಿಶಿಷ್ಟ ಅಂಚೆನೇ ಪೊಸ ಬಗೆತ ಕಂಟೆಂಟ್ಡ್ ತುಳು ಬರವುನು ಕಲ್ಪಾವುನೆರ್ದಾವರ ಬಾಕಿ ಮಾತ ಚಾನೆಲ್ಲೆರ್ದ್ ಬೇತೆ ಆದ್ ಉಂತುಂಡು. ಕಸುಬುಡ್ ಫೋಟೋಗ್ರಾಫರ್ ಆದುಪ್ಪುನ ನಿಶಾಂತ್ ರತ್ನಾಕರ್ ಪನ್ಪಿನಾರ್ ಸುರು ಮಲ್ದಿನ ‘ಸೊಲ್ಮೆಲು ಸ್ಟುಡಿಯೋಸ್’ ಚಾನೆಲ್, ಸಾರಗಟ್ಲೆ ವರ್ಸೊದ ಪರತಿರಿ ಇಪ್ಪುನ ತುಳು ಲಿಪಿನ್ ಒರಿತೊಂದು, ಬುಲೆಪಾವೊಂದು, ಗಲಸೊಂದು, ಕಲ್ತೊಂದು ಪೋಯೆರ ಪೊಸ ಕಾಲೊದ ಚಾವಡಿ ಆದುಂಡು.
‘ಸೊಲ್ಮೆಲು ಸ್ಟುಡಿಯೋಸ್’ ದ ವಿಶೇಷತೆ ದಾದ?
ನಿಶಾಂತ್ರೆನ ಶಾಂತವಾಯಿನ, ಮನಸ್ಗ್ ಮುಟ್ಟುನಂಚಿನ ವಿವರಣೆ, ಅದ್ಭುತವಾಯಿನ ಬ್ಯಾಕ್ಗ್ರೌಂಡ್ ಸೆಲೆಕ್ಷನ್ದ ಒಟ್ಟುಗು, ಬೊರ್ಚಂದಿನ ಈತ್ ಈತ್ ಉದ್ದೊದ ಇಂಟ್ರೋ ಇಜ್ಜಂದೆ ಸೀದಾ ತುಳು ಪದೊಕುಲು ಅತ್ತ್ಂಡ ತುಳುವ ನೆಲೊತ ಜಾಗೆಲೆನ ಪುದರ್ಲೆನ್ ಬರೆಪಿ ಮುಕೇನ ತುಳು ಲಿಪಿನ್ ಪನ್ಡ್ದ್ ಕೊರ್ಪಿನವು ನಿಜವಾದ್ಲಾ ಒಂಜಿ ಪೊಸ ಬಗೆತ ಪುನೆಪು. ಇಂಚ ಒಂಜೊಂಜಿ ಪದ, ಪುದರ್ಲೆನ ಒಟ್ಟುಗು, ಸ್ವರಾಕ್ಷರ (vowels), ವ್ಯಂಜನಾಕ್ಷರ (consonants), ಗುಣಿತಾಕ್ಷರೊದ ಮಾತ್ರೆಲು (Diacritics), ಬೊಕ್ಕ ಪೊರ್ಲುದ ಕೂಟಾಕ್ಷರೊಲೆನ್ (Conjuncts) ಕಲ್ಪುನತ್ತಂದೆ ಆ ಪದ ಎಂಚ ಬತ್ತ್ಂಡ್, ಆ ಊರುದ ಪುದರ್ ಅಂಚ ದಾಯೆ ಊಂಡು ಪನ್ಪಿ ಗೇನೊನ್ಲಾ ಈ ಚಾನೆಲ್ ಪಟ್ಟುಂಡು. ಪ್ರಾಯೋಗಿಕವಾದ್ಲಾ ಬಾರೀ ಎಫೆಕ್ಟಿವ್ ಆದುಪ್ಪುನ ಈ ಚಾನೆಲ್ದ ವೀಡಿಯೋಲು ಪ್ರತಿ ಅಕ್ಷರೊನು ಎಂಚ ಬರೆಯೊಡು? ಎಂಚ ಬರೆಯೆರ ಬಲ್ಲಿ? ಅವ್ವೇ ಅಕ್ಷರೊದ ಲೆಕ ತೋಜುನ ಬೇತೆ ಅಕ್ಷರೊಲೆನ ಪೊಲಬು ಕೊರೊಂದು ಸುರು ತುಳು ಲಿಪಿ ಕಲ್ಪುನಕ್ಲೆಗ್ ಮಾಮಲ್ಲ ಸಕಾಯ ಮಲ್ತೊಂದುಂಡು.
ತುಳು ಬೊಕ್ಕ ಇಂಗ್ಲಿಷ್ಡ್ ಪ್ರತಿ ವೀಡಿಯೋನು ಮಲ್ತೊಂದುಪ್ಪುನೆರ್ದಾವರ ತುಳು ಲಿಪಿ ಕಲ್ಪುನ ಉಮೇದ್ ಇತ್ತಿನ ತುಳು ಬರಂದಿನಕ್ಲೆಗ್ಲಾ ತುಳು ಲಿಪಿನ್ ಸುಲಭೊಡು ಕಲ್ಪೆರೆ ‘ಸೊಲ್ಮೆಲು ಸ್ಟುಡಿಯೋಸ್’ ಚಾನಲ್ ಸಾದಿ ಮಲ್ತ್ ಕೊರೊಂದುಂಡು. ತುಳು ಲಿಪಿ ಕಲ್ಪೆರೆ ಕಾಲಿ ಕನ್ನಡ ಲಿಪಿ ಗಲಸಂದೆ ಲ್ಯಾಟಿನ್ದ IAST ಬೊಕ್ಕ ದೇವನಾಗರಿ ಲಿಪಿನ್ಲಾ ಗಲಸುನೆರ್ದಾವರ ಕನ್ನಡ ಲಿಪಿ ಬರಂದಿನ ಪರವೂರ್ದ ತುಳುವೆರೆಗ್ ಬೊಕ್ಕ ತುಳುವೆರತ್ತಂದಿನಕುಲೆಗ್ಲಾ ತುಳು ಲಿಪಿತ ಪಾಠ ಎತ್ತೊಂದುಂಡು. ಇಂದೆಕ್ ಈ ಚಾನೆಲ್ದ ವೀಡಿಯೋಲೆಗ್ ಬರ್ಪುನ ಒಡಿಯಾ, ತಮಿಳ್, ಪಂಜಾಬಿ, ಕೊಡವ, ಕನ್ನಡ ಭಾಷೆ ಪಾತೆರುನಕ್ಲೆನ ಕಮೆಂಟ್ಲೇ ಪುರಾಪು.
ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಭಾಷೆ ಬೊಕ್ಕ ಸಂಶೋಧನಾ ವಿಭಾಗೊದ ನಿದಯಂತೆರಾದುಪ್ಪುನ ನಿಶಾಂತ್ ರತ್ನಾಕರ್ ಬೇತೆ ಒವ್ವೇ ತುಳು ಲಿಪಿ ಕಾರ್ಯಾಗಾರೊಲು ಕಲ್ಪಾವಂದಿನ, ತುಳು ಲಿಪಿತ ಮಾಮಲ್ಲ ಬೊಕ್ಕ ಮಸ್ತ್ ಪೊರ್ಲುದ, ಇತ್ತೆದಕುಲು ನಾಮಾಸ್ ಮಲ್ತೊಂದುಪ್ಪುನ ಕೂಟಾಕ್ಷರೊನು ಕಲ್ಪಾವೊಂದುಲ್ಲೆರ್. ರಡ್ಡ್ ಅತ್ತ್ಂಡ ಅವೆರ್ದ್ ಎಚ್ಚ ವ್ಯಂಜನೊಲೆನ ಸಂಯುಕ್ತಾಕ್ಷರ ಬರೆನಗ ತುಳು ಲಿಪಿಟ್ ಅವೆನ್ ಮಾತಾ ಆಪಿನಾತ್ ಒಂಜೇ ಮಲ್ತ್ದ್ ಬರೆಪೆರ್, ಇಂದೆಕ್ ಕೂಟ + ಅಕ್ಷರ = ಕೂಟಾಕ್ಷರ ಪನ್ದ್ ಪುದರ್. ತುಳು ಲಿಪಿ ಕಷ್ಟ ಪನ್ಪಿ ಪೂರ್ವಾಗ್ರಹೊನು ದೂರ ಮಲ್ತ್ದ್ ಪತ್ತ ತುಳು ಲಿಪಿನ್ ವಿಶಿಷ್ಟ ಶೈಲಿಡ್, ಸುಲಭೊಡು ಕಲ್ಪಾವೊಂದುಪ್ಪುನ ‘ಸೊಲ್ಮೆಲು ಸ್ಟುಡಿಯೋಸ್’ ತುಳು ಭಾಷೆ ಕರ್ನಾಟಕ ಬೊಕ್ಕ ಕೇರಳ ರಾಜ್ಯೊಡು ಅಧಿಕೃತ ಭಾಷೆ ಆಪಿನೆತ ಒಟ್ಟುಗು ಭಾರತೊದ ಸಾಂವಿಧಾನಿಕ ಮಾನಾದಿಗೆನ್ಲಾ ಪಡೆಯಡ್ ಪನ್ಪಿ ಕನ ಕಟ್ಟೊಂದು, ತುಳುವೆರೆಗ್, ತುಳುವೆರತ್ತಂದಿನಕುಲೆಗ್ ಮಾತೆರೆಗ್ಲಾ ಸಂಪೂರ್ಣ ತುಳು ಲಿಪಿನ್ ಕಲ್ಪಾವುನ ಮಾಮಲ್ಲ ಕಜ್ಜ ಬೆನೊಂದುಂಡು. ಸಾರಗಟ್ಲೆ ವರ್ಸೊದ ಪರಂಪರೆ ಇತ್ತಿನ ಲಿಪಿ ಸ್ಟಾಂಡರ್ಡೈಸೇಷನ್ಗ್ ಬಲಿ ಆವಂದೆ, ತನ್ನ ಮೂಲರೂಪೊಡು ಒರಿಯೊಡು ಪನ್ಪಿ ತೊಡು ಈ ಚಾನೆಲ್ನ್ ನಡಪಾವೊಂದುಂಡು.
‘ಸೊಲ್ಮೆಲು ಸ್ಟುಡಿಯೋಸ್’ ನ್ ಸಬ್ಸ್ಕ್ರೈಬ್ ಮಲ್ಪುಲೆ https://www.youtube.com/@SolmeluStudios?sub_confirmation=1 ತುಳು ಲಿಪಿತ ಒರಿಪು ಬುಲೆಪುಗು ಕೈಸಾಂಗಾಲೆ.