Last updated on February 5th, 2026 at 02:15 pm
ತುಳುನಾಡ್ದ ಒಂಜೇ ಒಂಜಿ ಮುರ್ಗೊಲೆನ ಸಂಗ್ರಾಲಯ ಆದಿತ್ತಿನ ಪಿಲಿಕುಳ ZOO ನನ ನೆಂಪು ಮಾತ್ರ. ಮಾತಾ ಪ್ರಾಯದಕ್ಲೆಗ್ಲಾ ಇಷ್ಟ ಆಪೆದಿನ ಪ್ರವಾಸಿ ತಾಣೊ ಪಿಲಿಕುಳ ನಿಸರ್ಗಧಾಮ, ಆಡಳಿತೊದ ನಾಮಾಸ್ ಬೊಕ್ಕ ಜಬದರಿದಾಂತಿನ ಆರೋಪೊಲೆರ್ದಾವರ ಹೈಕೋರ್ಟ್ದ ಪಿಸ್ರ್ಗ್ ನೆವನ ಆತ್ಂಡ್. ತುಳುನಾಡ ಪುಗರ್ತೆದ ZOO ಟ್ ಆತಿನ ದುರುಪಯೋಗೊಲೆನ್ ತೂದು ಶಾಕ್ ಆತಿನ ಹೈಕೋರ್ಟ್ ನ್ಯಾಯಮೂರ್ತಿಲು, ಜೂ ನ್ ಇತ್ತೆಗ್ ಇತ್ತೆನೇ ಮುಚ್ಚೊಡು ಪನ್ದ್ ಆದೇಶ ಮಲ್ತ್ದೆರ್
ಆಡಳಿತಾತ್ಮಕ ಗೋಸ್ಮರಿರ್ದಾವರ ಪಿಲಿಕುಳ ಪ್ರಾಣಿ ಸಂಗ್ರಾಲಾಯೊದ ಪರಿಸ್ಥಿತಿ ಬೊಕಲಾತ್ ತೆಟ್ಟೊಂದು ಬೈದ್ಂಡ್ ಪನ್ದ್ ವರದಿ ಆತ್ಂಡ್. ಪ್ರಾಣಿಲೆನ ಫೋಟೋಕುಲೆನ್ ಪರಿಶೀಲನೆ ಮಲ್ತಿನ ಹೈಕೋರ್ಟ್, ಐಕುಲೆನ ದುಸ್ಥಿತಿನ್ ತೂದು ಬಾರೀ ಅಸಮಾಧಾನ ತೂಪಾದ್ಂಡ್. “ಮುರ್ಗೊಲು ಈ ರೀತಿದ ಸ್ಥಿತಿಟ್ ಇತ್ತಂಡ, ಉದ್ಯಾನೊನು ಇತ್ತೆನೇ ಮುಚ್ಚೊಡು,” ಪನ್ದ್ ಸರ್ಕಾರೊಗು ಎಚ್ಚರ್ಗೆ ಕೊರ್ತುಂಡು. ಮುಲ್ಪದ ಮುರ್ಗೊಲೆಗ್ ಬೇತೆ ಬೇತೆ ಬಗೆತ ಸೀಕ್ಲ್ ಬರೊಂದುಲ್ಲ.
ವನ್ಯಜೀವಿ ಸಂರಕ್ಷಣಾವಾದಿ ಭುವನ್ ಸಂದಾದಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿದ ವಿಚಾರಣೆ ಮಲ್ಪುನ ಪೊರ್ತುಡು, ನ್ಯಾಯಪೀಠ ಪ್ರಾಣಿಲೆನ ಫೋಟೋಕುಲೆನ್ ಪರಿಶೀಲನೆ ಮಲ್ತ್ದ್ ಬಾರೀ ಬೆಸರ್ ತೂಪಾದ್ಂಡ್. ಮಣ್ಣ್ ಪತ್ತಿನ ಗೂಡುಲು, ನಿರ್ಮಲದಾಂತಿನ ಪಸಂದ್ರ, ಅಂಚೆನೇ ಮುರ್ಗೊಲೆಗ್ ಬೋಡಾಯಿನ ಸುರಕ್ಷತೆ ಬೊಕ್ಕ ಆರೈಕೆದ ಕುಂದೆಲ್ದ ಬಗೆಟ್ ನ್ಯಾಯಂತಡೆ ಕಠಿಣ ನಿರ್ದೇಶನೊಲೆನ್ ಕೊರ್ತುಂಡು.
ಪಿಲಿಕುಳ ಪ್ರಾಣಿ ಸಂಗ್ರಾಲಯ ಲೈಸೆನ್ಸ್ದಾಂತೆ ನಡತೊಂದುಂಡಾ ಪನ್ಪಿನ ಬಗೆಟ್ಲಾ ನ್ಯಾಯಂತಡೆ ಸಂಶಯ ತೂಪಾದ್ಂಡ್. ದಾಯೆ ಪನ್ಡ ಅವೆತ ಲೈಸೆನ್ಸ್ ಡಿಸೆಂಬರ್ 2025ಕ್ ಮುಗಿದ್ಂಡ್ ಪನ್ದ್ ವರದಿ ಆತ್ಂಡ್. ಬೋಡಾಪಿನ ಮರ್ದ್ಲ್ದಾಂತೆ ಮುರ್ಗೊಲು ಸಿರ್ಕ್ ಸಂಕಡೊಗು ಬೂರ್ದ್ ಬಚ್ಚಿದ್ ಪೋತ, ಕುರ್ತೆಲ್ ನೀರ್ ಪರ್ದ್ ಆರೋಗ್ಯ ಕುಡಲ ತೆಟ್ಟೊಂದುಪ್ಪುನ ಕೋರ್ಟ್ದ ಗುಮನೊಗು ಬೈದ್ಂಡ್. ಕೇಂದ್ರ ಜೂ ಪ್ರಾಧಿಕಾರ ನೆವನ ಪನ್ಯೆರೆ ನೋಟಿಸ್ ಕೊರ್ನ್ಡಲಾ, ಜೂ ಆಡಳಿತ ಅವೆನ್ ಗೆನ್ತೊಂದಿಜ್ಜಿ ಪನ್ದ್ ಪನೊಂದುಲ್ಲೆರ್. ತುಳುನಾಡ ಪ್ರಮುಖ ಪ್ರವಾಸಿ ಆಕರ್ಷಣೆ ಒಂಜೆತ ದುಸ್ಥಿತಿ ಪ್ರಾಣಿಪ್ರೇಮಿಲೆಗ್ ಬಾರೀ ಬೆಸರ್ ಉಂಡು ಮಲ್ದ್ಂಡ್.
ತುಳುನಾಡ್ನ್ ಕೋಮು ಪ್ರಯೋಗಶಾಲೆ ಮಲ್ತೊಂದಿನ ರಾಜಕಾರಣಿಲೆಗ್ ಮುಲ್ಪದ ಒಂಜೇ ಒಂಜಿ ನಿಸರ್ಗಧಾಮ ಆದುಪ್ಪುನ ಪಿಲಿಕುಳ ಜೂ ನ್ ಒರಿಪಾವರೆ ಆವಂದಿನ ಮುಲ್ಪದ ಜನಪ್ರತಿನಿಧಿಲೆನ ಇಚ್ಛಾಶಕ್ತಿ ಎಂಚ ಉಂಡು ಪನ್ಪಿನೆನ್ ತೂಪಾವುಂಡು.