Last updated on February 12th, 2026 at 01:28 pm
ಗುಲ್ಬರ್ಗಾ, ಫೆ.12: ಆಳಂದದ ವಿವಾದಿತ ‘ಲಾಡ್ಲೇ ಮಶಾಕ್’ ದರ್ಗಾಡ್ ಶಿವರಾತ್ರೆ ದ ಪೂಜೆ ಮಲ್ಪುನ ವಿಚಾರೊಡು ಸುಪ್ರೀಂ ಕೋರ್ಟ್ ಮಲ್ಲ ಆದೇಶ ಕೊರ್ತುಂಡು. ಕೋಡೆ (ಫೆ.11) ಗುಲ್ಬರ್ಗಾ ಹೈಕೋರ್ಟ್ ಪೀಠ ಶಿವರಾತ್ರೆ ಪೂಜೆಗ್ ಅನು ಕೊರ್ತಿನ ಬೆರಿಟೇ, ಇತ್ತೆ ಸುಪ್ರೀಂ ಕೋರ್ಟ್ಲಾ ಗ್ರೀನ್ ಸಿಗ್ನಲ್ ಕೊರ್ತುಂಡು. ಲಾಡ್ಲೆ ಮಶಾಕ್ ದರ್ಗಾದ ಸುತ್ತುಮದೆಲ್ಡ್ ಇಪ್ಪುನ ರಾಘವ ಚೈತನ್ಯ ಶಿವಲಿಂಗೊಗು ಮಹಾಶಿವರಾತ್ರೆದಾನಿ ಪೂಜೆ ಮಲ್ಪೆರೆ ಸುಪ್ರೀಂ ಕೋರ್ಟ್ ಪತ್ತ ಅನು ಕೊರ್ತುಂಡು. ದರ್ಗಾ ಆವರಣೊಡು ಪೂಜೆ ಮಲ್ಪೆರೆ ಅವಕಾಶ ಕೊರ್ತಿನ ಹೈಕೋರ್ಟ್ ಆದೇಶೊನು ಪ್ರಶ್ನೆ ಮಲ್ತ್ದ್ ದರ್ಗಾ ಸಮಿತಿ ಸುಪ್ರೀಂ ಕೋರ್ಟ್ಡ್ ಅರ್ಜಿ ಪಾಡ್ದಿತ್ತ್ಂಡ್. ಈ ಅರ್ಜಿದ ವಿಚಾರಣೆ ಮಲ್ತಿನ ನ್ಯಾಯಂತಡೆ ಪೂಜೆಗ್ ಅಡ್ಡ ಬರ್ಯೆರ ನಿರಾಕರಿತ್ದ್ಂಡ್.
ಸಂವಿಧಾನೊದ 32ನೇ ವಿಧಿ (Article 32) ಇಂಚಿನ ಉದ್ದೇಶೊಲೆಗ್ ಬೋಡಾದ್ ಇಪ್ಪುನು ಅತ್ತ್ ಪನ್ದ್ ಸುಪ್ರೀಂ ಕೋರ್ಟ್ ಅರ್ಜಿದಾರೆರೆಗ್ ಬೆಚ್ಚಡ್ ಪನ್ತ್ನ್ಡ್. ಇತ್ತೆನೇ ಅರ್ಜಿನ್ ಪಿರಗೆತೊನೊಡು ಪನ್ದ್ ದರ್ಗಾ ಪರ ಅರ್ಜಿದಾರೆರೆಗ್ ಸೂಚನೆ ಕೊರ್ತುಂಡು. ಕರ್ನಾಟಕ ಹೈಕೋರ್ಟ್ ಲಾ ದರ್ಗಾದ ಆವರಣೊಡು ಇಪ್ಪುನ ಶಿವಲಿಂಗೊಗು ಪೂಜೆ ಮಲ್ಪೆರೆ ಅವಕಾಶ ಕೊರ್ದಿತ್ತ್ಂಡ್. ಇತ್ತೆ ಸುಪ್ರೀಂ ಕೋರ್ಟ್ ಈ ಅರ್ಜಿನ್ ತಿರಸ್ಕರಿಪುನ ಮುಕೇನ ಹೈಕೋರ್ಟ್ದ ಆದೇಶೊನು ದೆರ್ತ್ ಪತ್ತ್ದ್ಂಡ್. ಇತ್ತೆ ಈ ಆದೇಶೊದ ಮುಕೆನ ಈ ಸರ್ತಿದ ಮಹಾಶಿವರಾತ್ರೆದ ಪೂಜೆ ಮಲ್ಪೆರೆ ಇತ್ತಿನ ಕಾನೂನು ತಲೆಪುಲು ದೂರ ಆತ.
ಆಳಂದದ ಲಾಡ್ಲೆ ಮಶಾಕ್ ದರ್ಗಾ ಆವರಣೊಡು ರಾಘವ ಚೈತನ್ಯ ಶಿವಲಿಂಗ ಉಂಡು. ಮುಲ್ಪ ಪೂಜೆ ಮಲ್ಪುನ ವಿಚಾರೊಡು ಕರಿನ ಕೆಲ ವರ್ಸೊರ್ದಿಂಚಿ ರಡ್ಡ್ ಸಮುದಾಯೊಲೆನ ನಡುಟು ಕಾನೂನು ಕೊಲಲ ಆವೊಂದುಂಡು. ಶಾಂತಿ ಒರಿತೊನುನ ದಿಟ್ಟಿಡ್ ಜಿಲ್ಲಾಡಳಿತ ಕೆಲ ನಿರ್ಬಂಧೊಲೆನ್ ಪಾಡೊಂದು ಬೈದಿತ್ತ್ಂಡ್. ಸುಪ್ರೀಂ ಕೋರ್ಟ್ ಪೂಜೆಗ್ ಅನು ಕೊರ್ತಿನೆರ್ದಾವರ, ಮಹಾಶಿವರಾತ್ರೆದಾನಿ ಒವ್ವೇ ಬೊರ್ಚಂದಿ ನಡಕೆ ನಡಪಂದಿಲೆಕ ಗುಲ್ಬರ್ಗಾ ಜಿಲ್ಲಾಡಳಿತ ಬೊಕ್ಕ ಪೊಲೀಸ್ ಇಲಾಖೆ ಆಳಂದಡ್ ಬಾರೀ ಸೆಕ್ಯೂರಿಟಿ ಮಲ್ಪುನ ಸಾಧ್ಯತೆ ಉಂಡು.