Last updated on February 16th, 2026 at 10:55 am
ಒಡಿಪು, ಫೆ. 16: ಪರ್ತಿನ ಅಮಲ್ಡ್ ಬೀಸ ಕಾರ್ ಬುಡೊಂದು ಬತ್ತ್ದ್ ಬೇತೆ ಗಾಡಿಲೆಗ್ ಎಡ್ತಿನ ಆರೋಪಡ್ ಮಣಿಪಾಲದ ವಿದ್ಯಾರ್ಥಿ ಒರಿಯನ್ ಪೊಲೀಸೆರ್ ಉಲಕೈ ಮಲ್ತೊಂದೆರ್.
ಕೈದಾತಿನ ಆಣನ್ ಅಭಿಮನ್ಯು ನೇಗಿ ಪನ್ದ್ ಗುರ್ತ ಪತ್ತ್ದೆರ್.
ಫೆಬ್ರವರಿ 14ತ ರಾತ್ರೆ ಈ ನಡಕೆ ನಡತಿತ್ತ್ದ್, ಸಾದಿ ಬರಿಟ್ ಉದ್ದೊಗು ಉಂತಾದಿತ್ತಿನ ಏಳ್ ಟೂವೀಲರ್ ಗಾಡಿಲೆಗ್ ಉಂಬ್ಯೆ ಬುಡೊಂದಿತ್ತಿನ ಕಾರ್ ಎಡ್ತ್ದ್ಂಡ್. ಈ ಪೊರ್ತುಡು ಎದುರುರ್ದ್ ಬರೊಂದಿತ್ತಿನ ರಿಕ್ಷಾಗ್ಲಾ ಕಾರ್ ಎಡ್ತ್ದಿತ್ತ್ದ್, ರಿಕ್ಷಾ ಡ್ರೈವರ್ ಬಡಗಬೊಟ್ಟು ನಿವಾಸಿ ಶಿವಪ್ರಸಾದ್ (76) ಪನ್ಪಿನಾರೆನ ತರೆಕ್ ಗಾತಿದ ಉಲಪೆಟ್ಟ್ ಆತ್ಂಡ್.
ಆರೋಪಿ ಕಾಲೇಜ್ ರೋಡ್ರ್ದ್ ಬಾರೀ ಬೀಸ ಬೊಕ್ಕ ಗೋಸ್ಮರಿಡ್ ಕಾರ್ ಬುಡೊಂದು ಬತ್ತಿತ್ತ್ದ್, ಬೊಕ್ಕ ಗಾಡಿ ಅಂಕೆ ತತ್ತ್ದ್ ಸಾದಿದ ಬರಿಕ್ ಪೊಗ್ಗುದುಂಡು.
ಎಡ್ತ್ದಿನ ಕಾರ್ ಹರಿಯಾಣ ರೆಜಿಸ್ಟ್ರೇಷನ್ದವು. ನಡಕೆಡ್ ಸಾದಿ ಬರಿತ ಅಂಗಡಿಲೆನ ಸಿಬ್ಬಂದಿಲು ಉಂತಾದಿತ್ತಿನ ಟೂವೀಲರ್ ಗಾಡಿಲು ಞಕ್ಕೆ ಆತ. ಈ ಬಗೆಟ್ ಮಣಿಪಾಲ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.