Last updated on February 16th, 2026 at 11:50 am
ಸುಳ್ಯ, ಫೆ. 16: ಪೆರಾಜೆ ಕೈತಲ್ದ ಕುಕ್ಕುಂಬಳ ಸಂಕೊಡೆ ಪೋವೊಂದಿತ್ತಿನ ಸ್ಕೂಟರ್ ಒಂಜಿ ಅಂಕೆ ತತ್ತ್ದ್ ಸೀದಾ ಸುದೆಕ್ ಬೂರ್ದು ಸ್ಕೂಟರ್ ಬುಡೊಂದಿತ್ತಿನಾರೆಗ್ ಗಾತಿದ ಗಡಿಕುಲಾತಿನ ನಡಕೆ ಫೆಬ್ರವರಿ 14ತ ಶನಿವಾರ ರಾತ್ರೆ ನಡತ್ದ್ಂಡ್. ಗಡಿಕುಲಾತಿನಾರೆನ್ ಕುಡ್ಲದ ಆಸ್ಪತ್ರೆಗ್ ದಾಕಲ್ತ್ದೆರ್.
ಗಡಿಕುಲಾತಿನಾರೆನ್ ಅಂಜಿಕ್ಕಾರ್ ಸುಂದರ ನಾಯ್ಕ ಪನ್ಪಿನಾರೆನ ಮಗೆ ರವಿಚಂದ್ರ ನಾಯ್ಕ ಪನ್ದ್ ಗುರ್ತ ಪತ್ತ್ದೆರ್. ಮೇರ್ ಸುಳ್ಯರ್ದ್ ಇಲ್ಲಗ್ ಪಿರ ಬರೊಂದುಪ್ಪುನಗ ರಾತ್ರೆ 8 ಗಂಟೆದ ಅಂದಾಜಿಗ್ ಈ ನಡಕೆ ನಡತ್ದ್ಂಡ್.
ದುಂಬೊರ ಉಂದೇ ಜಾಗೆಡ್ ರಿಕ್ಷಾ ಒಂಜಿ ಡ್ರೈವರ್ನ ಅಂಕೆ ತತ್ತ್ದ್ ಸಂಕೊರ್ದು ತಿರ್ತ್ ಬೂರ್ದಿತ್ತ್ಂಡ್. ಸಂಕೊಗು ಒವ್ವೇ ಸುರಕ್ಷಿತ ತಡೆಗೋಡೆ ಅತ್ತ್ಂಡ ಬ್ಯಾರಿಕೇಡ್ದಾಂತಿನವೇ ಇಂಚಿನ ನಡಕೆಲೆಗ್ ನೆವನ ಪನ್ದ್ ನೆಟೆದಕುಲು ಪನೊಂದುಲ್ಲೆರ್.
ನನೊರಿ ಏರ್ಲಾ ಇಂಚ ಸಂಕೊರ್ದು ಬೂರ್ದು ಎಚ್ಚಿಕಮ್ಮಿ ಆಯೆರ ದುಂಬು ಸಂಬಂಧಿತಿನ ಇಲಾಖೆದ ಅಧಿಕಾರಿಲು ಬೊಕ್ಕ ಜನಪ್ರತಿನಿಧಿನಕುಲು ಲಕ್ಕೊಂದು, ಸಂಕೊಗು ತಡೆಗೋಡೆ ಮಲ್ಪಾವುನ ಬೇಲೆ ಮಲ್ಪೊಡು ಪನ್ದ್ ಸಾರ್ವಜನಿಕೆರ್ ಆಗ್ರಹ ಮಲ್ತ್ದೆರ್.