Last updated on February 18th, 2026 at 08:20 am
ಕಾಸ್ರೋಡ್, ಫೆ. 18 : ಮಗೆ ಒರಿ ತನ್ನ ಮದಿಮೆದ ಲೇಸ್ಡ್ ಅಮ್ಮೆರೆನ ಅಂಬಲ್ಗ್ ಆರ್ ಗಲಸೊಂದಿತ್ತಿನ ಸ್ಕೂಟರ್ನ್ ಐತ ಮಲ್ತ್ದ್, ಮಿತ್ತರ್ಮೆದ ಮಿತ್ತ್ ದೀದ್ ವಿಶೇಷ ರೀತಿಡ್ ಮಾನಾದಿಗೆ ಮಲ್ತಿನ ಅಪೂರ್ವ ನಡಕೆ ಕಾಸ್ರೋಡ್ದ ಬಜಕೂಡ್ಲುದ ಪರ್ಪಕರಿಯಡ್ ನಡತ್ದ್ಂಡ್.
ಕರಿದ್ ಪೋತಿನ ಅಮ್ಮು ರೈ ಕ್ಲೆನ ಮಗೆ ನವೀನ್ ಇಂಚ ಅಮ್ಮೆರೆನ ನೆಂಪುಡು ಮದಿಮೆ ಆತಿನಾರ್. ಅಮ್ಮು ರೈ ಮೇರ್ ಕೇರಳ ತೋಟಗಾರಿಕಾ ನಿಗಮೊದ ಬೀಜದ ಬ್ಲೋಕ್ ವಿಭಾಗೊಡು ಬೇಲೆ ಮಲ್ತ್ದ್ ರಿಟೈರ್ಡ್ ಆದಿತ್ತೆರ್. ಆ ಪೊರ್ತುಡು ಅಮ್ಮು ರೈಕುಲು M 80 ಸ್ಕೂಟರ್ ಗಲಸೊಂದಿತ್ತೆರ್. ಒಂತೆ ವರ್ಸೊಗು ದುಂಬು ಅಮ್ಮು ರೈ ಕುಲು ತೀರ್ದಿತ್ತೆರ್.
ಅಮ್ಮು ರೈ ಕುಲು ಕರಿಬೊಕ್ಕಲಾ ಇಲ್ಲದಕುಲು ಸ್ಕೂಟರ್ನ್ ಮಾರಂದೇ, ದೆಕ್ಕೊಂದು ಪತ್ತೊಂದು, ಇಲ್ಲಡೇ ದೀವೊಂದಿತ್ತೆರ್. ನವೀನ್ರೆನ ಮದಿಮೆ ಕರಿನ ಐತಾರ ನಡತಿತ್ತ್ದ್, ಈ ಪೊರ್ತುಡು ಮಿತ್ತರ್ಮೆಡ್ ಉಂದೇ ಸ್ಕೂಟರ್ನ್ ಪೊರ್ಲುಡು ಐತ ಮಲ್ತ್ದ್ ದೀದ್, ಅಮ್ಮೆರೆನ ನೆಂಪುಗು ಮಾನಾದಿಗೆ ಮಲ್ತ್ದೆರ್. ಮದಿಮೆಗ್ ಬತ್ತಿನಕುಲು ಇಂದೆನ್ ತೂದು ಕರಿದ್ ಪೋತಿನ ಅಮ್ಮೆರೆನ್ ಇಂಚ ನೆನೆಪು ಮಲ್ತೊಂದಿನೆನ್ ಪುಗರೊಂದಿತ್ತೆರ್.