Last updated on March 4th, 2026 at 11:28 am
ಲಕ್ನೌ, ಮಾ. 04: ಉತ್ತರ ಪ್ರದೇಶೊದ ಲಕ್ನೌ ಡ್ ಬಿರಿಯಾನಿ ಅಂಗಡಿದ ಫ್ರೀಜರ್ಡ್ 35 ವರ್ಸ ಪ್ರಾಯೊದ ಆಂಜೊವುನ ಪುನ ತಿಕ್ಕ್ದಿನ ನಡಕೆ ನಡತ್ದ್ಂಡ್. ಬಕ್ಷಿ ಕಾ ತಾಲಾಬ್ ಪ್ರದೇಶೊಡು ಇಪ್ಪುನ ಅಂಗಡಿಡ್ ಈ ಪ್ರಕರಣ ಬೊಲ್ಪುಗು ಬೈದ್ಂಡ್. ತೀರ್ದಿನಾರೆನ್ ವಿಜಯ್ ಪಾಲ್ ಪನ್ದ್ ಗುರ್ತ ಪತ್ತ್ದಿತ್ತ್ದ್, ಆರ್ ಬಿಕೆಟಿ ಪೊಲೀಸ್ ಸ್ಟೇಶನ್ ಸೀಮೆದ ಕಿಶನ್ಪುರ್ ಮಾಜ್ರಾ ನಿವಾಸಿ ಆದಿತ್ತೆರ್.
ಅಂಗಡಿದ ದನಿ ಶನಿ ರಾವತ್ ಮೇರ್ ಆರೆನ ಅಮ್ಮೆರ್ ತೀರ್ದಿತ್ತಿನೆರ್ದಾವರ ಅಂಗಡಿನ್ ಕರಿನ ನಾಲ್ ದಿನೊರ್ದಿಂಚಿ ಮುಚ್ಚಿದಿತ್ತೆರ್. ಐತಾರ ಕಾಂಡೆ ಅಂಗಡಿದ ಬಾಕಿಲ್ ದೆತ್ತ್ದ್ ಫ್ರೀಜರ್ದ ಉಲಯಿ ತೂನಗ ಪುನ ತೂದು ರಾವತ್ ಪೋಡಿದ್ ಪೋತೆರ್. ಅಪಗನೇ ಪೊಲೀಸೆರೆಗ್ ಒಲವು ಕೊರ್ದಿತ್ತ್ದ್, ಪುನೊನು ಪಿದಯಿ ದೆತ್ತ್ದ್ ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್.
ವಿಜಯ್ ಪಾಲ್ ದಿನಗೂಲಿ ಕಾರ್ಮಿಕೆ ಆದಿತ್ತ್ದ್, ಐನ್ ವರ್ಸೊಗು ದುಂಬು ಬೊಡೆದಿರ್ದ್ ದೂರ ಆದ್ ಒರಿಯೇ ಇಪ್ಪೆದೆರ್ ಪನ್ದ್ ಇಲ್ಲದಕುಲು ತೆರಿಪಾದೆರ್. ಮೆರೆಗ್ ಪರ್ಪುನ ಚಟಲಾ ಇತ್ತ್ಂಡ್ ಪನ್ದ್ ತೆರಿದ್ ಬೈದ್ಂಡ್. ಮರಣೋತ್ತರ ಪರೀಕ್ಷೆದ ವರದಿ ಬತ್ತಿಬೊಕ್ಕನೇ ಎಂಚ ತೀರ್ದೆರ್ ಪನ್ದ್ ತೆರಿಯುಂಡು ಪನ್ದ್ ಎಡಿಸಿಪಿ (ಉತ್ತರ ವಲಯ) ರಿಷಭ್ ರನ್ವಾಲ್ ತೆರಿಪಾದೆರ್. ಪೊಲೀಸೆರ್ ಪ್ರಕರಣೊನು ಮಾತಾ ಆಯಾಮೊಲೆಡ್ ಜಡ್ತೆ ಮಲ್ತೊಂದುಲ್ಲೆರ್.