Last updated on March 20th, 2026 at 08:42 am
ಕುಡ್ಲ, ಮಾ. 20: ಮಧ್ಯಪ್ರಾಚ್ಯೊಡು ಉದ್ವಿಗ್ನ ಪರಿಸ್ಥಿತಿದ ನಡುಟುಲಾ ಯುದ್ಧಪೀಡಿತ ಹಾರ್ಮುಜ್ ಜಲಸಂಧಿದ ಮುಕೇನ ಬತ್ತ್ದ್, ಸೋಮವಾರ ಗುಜರಾತ್ದ ಮುಂದ್ರಾ ಬಂದರ್ ಎತ್ತ್ದಿತ್ತಿನ ಎಲ್ಪಿಜಿ ಇತ್ತಿನ ‘ಶಿವಾಲಿಕ್’ ಪಡವು ನವ ಮಂಗಳೂರು ಬಂದರ್ಗ್ ಬರ್ಪುಜಿ.
“ಶಿವಾಲಿಕ್ ಪಡವುರ್ದ್ ಸುಮಾರ್ 20,000 ಟನ್ ಎಲ್ಪಿಜಿನ್ ಮುಂದ್ರಾ ಬಂದರ್ಡ್ ಜಪ್ಪಾವೆರ್. ಒರಿನ ಸುಮಾರ್ 26,000 ಟನ್ ಎಲ್ಪಿಜಿದ ಒಟ್ಟುಗು ಬುಧವಾರ ನವ ಮಂಗಳೂರು ಬಂದರ್ಗ್ ಬರ್ಪುಂಡು ಪನ್ಪಿ ಒಲವು ಇತ್ತ್ಂಡ್. ಆಂಡ, ಇತ್ತೆ ಈ ಪಡವು ಇಡೆ ಬರೊಂದಿಜ್ಜಿ” ಪನ್ದ್ ನವ ಮಂಗಳೂರು ಬಂದರ್ದ ಮೂಲೊಲು ತೆರಿಪಾದ.
ಶಿವಾಲಿಕ್ ಪಡವುಡು ಇತ್ತಿನ ಎಲ್ಪಿಜಿದ ಒಂಜಿ ಭಾಗೊನು ಮುಂದ್ರಾ ಬಂದರ್ಡ್ ಜಪ್ಪಾದ್ ಆತ್ಂಡ್. ಒರಿನ ಭಾಗೊನು ಗುಜರಾತ್ದ ದಹೇಜ್ ಟರ್ಮಿನಲ್ನಲ್ಡ್ ಜಪ್ಪಾವೊಂದುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್. ಈ ನಡುಟು, ಎಚ್ಪಿಸಿಎಲ್ಗ್ ಎಲ್ಪಿಜಿ ಸಪ್ಲೈ ಮಲ್ಪುನ ಕುಡೊಂಜಿ ಪಡವು ಈ ತಿಂಗೊಲ್ದ 20 ರ್ದ್ ಬೊಕ್ಕ ನವ ಮಂಗಳೂರು ಬಂದರ್ಗ್ ಎತ್ತುನ ನಿರೀಕ್ಷೆ ಉಂಡು.
“ಎಂಕ್ಲೆನ ಕಂಪೆನಿಗ್ ಎಲ್ಪಿಜಿ ಸಪ್ಲೈ ಮಲ್ಪುನ ಪಡವು ಕುಡ್ಲದಂಚಿ ಬರೊಂದುಂಡು. ಆಂಡ, ಆ ಪಡವುಡು ಒಟ್ಟು ಸರಕ್ದ ಏತ್ ಪ್ರಮಾಣೊದ ಎಲ್ಪಿಜಿನ್ ಮುಲ್ಪ ಜಪ್ಪಾವೆರ್ ಪನ್ಪಿನ ಬಗೆಟ್ ನನಲಾ ಅಧಿಕೃತ ಒಲವು ತಿಕ್ಕ್ದಿಜಿ” ಪನ್ದ್ ಎಚ್ಪಿಸಿಎಲ್ ಮೂಲೊಲೆರ್ದ್ ತೆರಿದ್ ಬೈದ್ಂಡ್.