Last updated on March 27th, 2026 at 09:15 am
ಉಳ್ಳಾಲ, ಮಾ. 27: ತೊಕ್ಕೊಟ್ಟು ಫ್ಲೈಓವರ್ಡ್ ಪುಲ್ಯಾನಗ ಭೀಕರ ಕೊಲೆ ನಡತಿತ್ತ್ದ್, ರೌಡಿಶೀಟರ್ನ್ ಕೆಂಗುಡೆರ್ ಮಾರಕಾಸ್ತ್ರೊಲೆಡ್ ಕಡ್ತ್ದ್ ಕೆರ್ತೆರ್. ತೀರ್ದಿನಾರೆನ್ ಉಚ್ಚಿಲ ಮುಳ್ಳುಗುಡ್ಡೆ ನಿವಾಸಿ ಆರೀಫ್ ಹುಸೇನ್ (42), ಅಲಿಯಾಸ್ ‘ಟ್ಯಾಬ್ಲೆಟ್ ಆರೀಫ್’ ಪನ್ದ್ ಗುರ್ತ ಪತ್ತ್ದೆರ್ . ಆರೀಫ್ ಕುಡ್ಲ ಬಂದರ್ ಪೊಲೀಸ್ ಸ್ಟೇಶನ್ಡ್ ರೌಡಿಶೀಟರ್ ಪಟ್ಟಿಡ್ ಇತ್ತೆ.
ಆರೀಫ್ ಮೀನ್ದ ಬೇರ ಮಲ್ತೊಂದಿತ್ತ್ದ್, ಶುಕ್ರವಾರ ಪುಲ್ಯ ಸುಮಾರ್ 3.30ದ ಅಂದಾಜಿಗ್ ತನ್ನ ಬುಲೆಟ್ ಬೈಕ್ಡ್ ಕುಡ್ಲದಂಚಿ ಬರೊಂದಿತ್ತೆರ್. ಈ ಪೊರ್ತುಡು ತೊಕ್ಕೊಟ್ಟು ಓವರ್ಬ್ರಿಡ್ಜ್ ಮಿತ್ತಸಂಕೊಡು ಕಾರ್ಡ್ ಬೆರಿಪತೊಂದು ಬತ್ತಿನ ಕೆಂಗುಡೆರೆ ಕೂಟ ಆರೆನ ಮಿತ್ತ್ ದಾಳಿ ಮಲ್ದ್ಂಡ್. ಮಾರಕಾಸ್ತ್ರೊಲೆಡ್ ಆಕ್ದ್ ಅಲ್ಪನೇ ಕೆರ್ದ್ ಪದ್ರಾಡಾತೆರ್ ಪನ್ದ್ ತೆರಿದ್ ಬೈದ್ಂಡ್ .
2022ತ ಮೇ ತಿಂಗೊಲುಡ್ಲಾ ಇಂಚೆನೇ ಆರೀಫ್ನ ಮಿತ್ತ್ ದಾಳಿ ಆದಿತ್ತ್ಂಡ್, ಬಜಾಲ್ ಮೂಲೊದ ಟೊಪ್ಪಿ ನೌಫಾಲ್ನಕುಲು ಬೀಸತ್ತಿ ಪಾಡ್ದ್ ಕೆರ್ಯೆರ ತೂದಿತ್ತೆರ್. ಮೂಲತಃ ಕುದ್ರೋಳಿ ನಿವಾಸಿ ಆದಿತ್ತಿನ ಆರೀಫ್, ಕರಿನ ಕೆಲ ವರ್ಸೊಗು ದುಂಬು ಕುಟುಮಸಮೇತ ಅಜ್ಜಿನಡ್ಕ ಕೈತಲ್ದ ಮುಳ್ಳುಗುಡ್ಡೆಗ್ ಬತ್ತ್ದ್ ಇತ್ತೆರ್. ತೀರ್ದಿನಾರ್ ಬೊಡೆದಿ, ಮೂವೆರ್ ಜೋಕುಲು ಬೊಕ್ಕ ಒರ್ತಿ ಮಗಲೆನ್ ಅಗತ್ದೆರ್. ಜಾಗೆಗ್ ಡಿಸಿಪಿ ಮಿಥುನ್ ಬೊಕ್ಕ ಪೊಲೀಸ್ ಅಧಿಕಾರಿಲು ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಕೆಂಗುಡೆರೆನ್ ಪತ್ತೆರೆ ಬೇಪು ಪಾಡ್ದೆರ್.