Last updated on March 31st, 2026 at 11:09 am
ಬೋಲ್ತೇರ್, ಮಾ. 31: ಕ್ರಿಕೆಟ್ ಗೊಬ್ಬುನಗ ಒವ್ವಾ ನೆವನೊಗು ಪಾತೆರೊಗು ಪಾತೆರ ಬುಲೆದ್ ಲಡಯಿ ಜೋರಾದ್, ಒರಿ ಜವನಗ್ ಕತ್ತಿಡ್ ಭೀಕರವಾದ್ ಕಡ್ತ್ದ್ ಕೆರ್ಯೆರೆ ತೂತಿನ ನಡಕೆಗ್ ಸಂಬಂಧಿತ್ದ್ ಆರೋಪಿನ್ ಬೋಲ್ತೇರ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಲಾಯಿಲ ಗ್ರಾಮೊದ ಕಕ್ಕೇನ ನಿವಾಸಿ ಆರೀಫ್ (25) ಕೈದಾತಿನ ಆರೋಪಿ. ಆಯೆ ಆಕಿನೆಟ್ ಅವ್ವೇ ಗ್ರಾಮೊದ ನಿವಾಸಿ ಆಸಿಫ್ (36) ಪನ್ಪಿನಾರೆಗ್ ಗಾತಿದ ಗಡಿಕುಲಾದಿತ್ತ್ದ್, ಇತ್ತೆ ಮರ್ದ್ ನಡತೊಂದುಂಡು.
ಲಾಯಿಲ ಗ್ರಾಮೊದ ಹಕ್ಕೀಂ ಪನ್ಪಿನಾರೆಗ್ ಸೇರ್ದಿನ ಜಾಗೆಡ್ ಊರ್ದ ಜವನೆರ್ ಕ್ರಿಕೆಟ್ ಗೊಬ್ಬೊಂದಿತ್ತೆರ್. ಮುರಾನಿ ಮಾರ್ಚ್ 27ತಾನಿ ಗೊಬ್ಬೊಂದುಪ್ಪುನಗ ಆರೋಪಿ ಆರೀಫ್ ಬೊಕ್ಕ ಕೈತಲ್ದ ರಿಯಾಜ್ (ಅಶ್ರಫ್) ಪನ್ಪಿನಕಲೆ ನಡುಟು ಲಡಯಿ ಆದಿತ್ತ್ಂಡ್. ಈ ಪೊರ್ತುಡು ನಡುಕು ಬತ್ತಿನ ಆಸಿಫ್, ಇರ್ವೆರೆನ್ಲ ಸಮಾಧಾನ ಮಲ್ತ್ದ್ ಲಡಯಿ ಉಂತಾದಿತ್ತೆರ್. ಈ ವಿಚಾರೊಡೇ ಪಿಸ್ರ್ಡ್ ಆರೀಫ್, ಅವ್ವೇ ದಿನ ರಾತ್ರೆ ಆಸಿಫ್ಗ್ ಪೋಡಿಕಟ್ಟಾವುನ ಮೆಸೇಜ್ ಕಡಪುಡ್ದಿತ್ತೆಗೆ.
ಮಾರ್ಚ್ 29ದ ಬಯ್ಯಡ್ ಕುಡ ಕ್ರಿಕೆಟ್ ಗೊಬ್ಬೆರೆ ಕಲಕ್ ಬತ್ತಿನ ಪೊರ್ತುಡು, ಆಯಗ್ ಬತ್ತಿನ ಮೆಸೇಜ್ದ ಬಗೆಟ್ ಆಸಿಫ್ ಆರೋಪಿಡ ಕೇನ್ದೆ. ಉಂದೆರ್ದಾವರ ಬೊಕಲಾತ್ ಪಿಸ್ರಾಯಿನ ಆರೀಫ್, ಅಲ್ಪರ್ದ್ ಸೀದಾ ಇಲ್ಲಗ್ ಪೋದು ಕತ್ತಿ ಪತೊಂದು ಬತ್ತ್ದೆ. ಆರೋಪಿ ಕತ್ತಿ ಪತೊಂದು ಬರ್ಪಿನೆನ್ ತೂದು ಆಸಿಫ್ ಪೋಡಿದ್ ಅಲ್ಪರ್ದ್ ಬಲ್ತ್ದೆರ್. ಆಂಡ ಬೆರಿಪತೊಂದು ಬತ್ತಿನ ಆರೋಪಿ, ‘ನಿಕ್ಲೆನ್ ಕೆರಂದೆ ಬುಡ್ಪುಜಿ’ ಪನ್ದ್ ಪೆದಂಬು ನೆರೊಂದು, ಆಸಿಫ್ ನ ತರೆಕ್ ಕತ್ತಿಡ್ ಕಡ್ತ್ದೆ. ಲಡಯಿ ತೂದು ಕೈತಲ್ದಕುಲು ಬನ್ನಗ ಆರೋಪಿ ಅಲ್ಪರ್ದ್ ಪದ್ರಾಡಾತೆ.
ನಡಕೆಗ್ ಸಂಬಂಧಿತ್ದ್ ಬೋಲ್ತೇರ್ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಪ್ರಕರಣೊನು ಗಾತಿಡ್ ಗೆತಂಡಿನ ಪೊಲೀಸೆರ್, ಜಡ್ತೆ ಮಲ್ತ್ದ ದೆಂಗ್ ಕುಲ್ದಿನ ಆರೋಪಿ ಆರೀಫ್ನ್ ಪತ್ತ್ದೆರ್.