Last updated on April 1st, 2026 at 09:42 am
ದೆಲ್ಲಿ, ಎ. 01: ಸ್ಯಾಂಡಲ್ವುಡ್ದ ಪುಗರ್ತೆದ ನಟೆ, ನಿರ್ದೇಶಕೆ ಬೊಕ್ಕ ನಿರ್ಮಾಪಕೆ ರಕ್ಷಿತ್ ಶೆಟ್ಟಿ ಮೆರೆಗ್ ದೆಲ್ಲಿ ಹೈಕೋರ್ಟ್ ಭಾರಿ ಮಲ್ಲ ದಂಡ ಪಾಡ್ದ್ಂಡ್. ಆರೆನ ನಿರ್ಮಾಣೊದ ‘ಬ್ಯಾಚುಲರ್ ಪಾರ್ಟಿ’ ಪಿಚ್ಚರ್ಡ್ ಅನುದಾಂತೆ ಪರತ್ ಪಿಚ್ಚರ್ದ ಪದೊಕ್ಲೆನ್ ಗಲಸಿನೆಕ್, ಹಕ್ಕುಸ್ವಾಮ್ಯ (Copyright) ಉಲ್ಲಂಘನೆ ಪ್ರಕರಣೊದಡಿಟ್ ಒಟ್ಟು 25 ಲಕ್ಷ ರೂಪಾಯಿ ಕಟ್ಟೆರ ನ್ಯಾಯಂತಡೆ ಆದೇಶ ಮಲ್ದ್ಂಡ್.
ರಕ್ಷಿತ್ ಶೆಟ್ರೆನ ‘ಪರಂವಾ ಸ್ಟುಡಿಯೋಸ್’ ದ ‘ಬ್ಯಾಚುಲರ್ ಪಾರ್ಟಿ’ ಸಿನಿಮಾಡ್, ದುಂಬುದ ಹಿಟ್ ಚಿತ್ರೊಲಾಯಿನ ‘ನ್ಯಾಯಕ್ಕಾಗಿ ಸವಾಲ್’ ಬೊಕ್ಕ ‘ಗಾಳಿಮಾತು’ ಚಿತ್ರೊದ ಪದೊಕ್ಲೆನ್ ಎಲ್ಯೆಟ್ ಗಲಸ್ದಿತ್ತೆರ್. ಈ ಪದೊಕ್ಲೆನ ಅಧಿಕೃತ ರೈಟ್ಸ್ ಇತ್ತಿನ ‘ಎಮ್ಆರ್ಟಿ ಮ್ಯೂಸಿಕ್’ (MRT Music) ಸಂಸ್ಥೆದ ನವೀನ್ ಕುಮಾರ್ ಮೇರ್, ಆರೆನ ಅನುದಾಂತೆ ಪದೊಕ್ಲೆನ್ ಗಲಸಿನೆಕ್ ಕಾನೂನು ಕ್ರಮ ಗೆತೊಂದಿತ್ತೆರ್. ಸುರುಟು ಬೆಂಗಳೂರ್ದ ಯಶವಂತಪುರ ಪೊಲೀಸ್ ಸ್ಟೇಶನ್ಡ್ ಎಫ್ಐಆರ್ ದಾಕಲಾದಿತ್ತ್ಂಡ್, ಬೊಕ್ಕ ಪ್ರಕರಣ ದೆಲ್ಲಿ ಹೈಕೋರ್ಟ್ಗ್ ಪೋದಿತ್ತ್ಂಡ್.
ಪ್ರಕರಣೊದ ಸುದೀರ್ಘ ವಿಚಾರಣೆ ಮಲ್ತಿನ ನ್ಯಾಯಮೂರ್ತಿ ಅನಿಶ್ ದಯಾಳ್ ಮೆರೇನ ಪೀಠ ಹಕ್ಕುಸ್ವಾಮ್ಯ ಉಲ್ಲಂಘನೆಗ್ ಎಮ್ಆರ್ಟಿ ಮ್ಯೂಸಿಕ್ ಸಂಸ್ಥೆಗ್ 20 ಲಕ್ಷ ರೂಪಾಯಿ ಪಿರಿಕಟ್ಟ್, ಪ್ರಕರಣೊದ ಕಾನೂನು ಪ್ರಕ್ರಿಯೆಲೆನ ಕರ್ಚಿಗ್ ಎಚ್ಚಿಗೆ 5 ಲಕ್ಷ ರೂಪಾಯಿ ಕಟ್ಟೊಡು. ಈ ಒಟ್ಟು 25 ಲಕ್ಷ ರೂಪಾಯಿನ್ ಆಜಿ ವಾರೊದ ಉಲಯಿ ನ್ಯಾಯಂತಡೆಡ್ ಡೆಪಾಸಿಟ್ ದೀವೊಡು ಪನ್ದ್ ತೀರ್ಪು ಕೊರ್ತುಂಡು.