Last updated on April 2nd, 2026 at 10:53 am
ಬಂಟ್ವಾಳ, ಏ. 02: ತಾಲ್ಲೂಕ್ದ ಫರಂಗಿಪೇಟೆ ಕೈತಲ್ದ ಮಾರಿಪಳ್ಳ ಪನ್ಪಿನಲ್ಪ ಬುಧವಾರ ರಾತ್ರೆ ನಡತಿನ ಭೀಕರ ಎಡ್ತೆಡ್ ಏಳ್ ಜನ ವಿದ್ಯಾರ್ಥಿಲೆಗ್ ಗಾತಿದ ಗಡಿಕುಲಾತ.
ಕುಡ್ಲ ದಂಚಿರ್ದ್ ಬಿ.ಸಿ ರೋಡ್ ಆದ್ ಪೋವೊಂದಿತ್ತಿನ ಕಾರ್, ಏಪ್ರಿಲ್ 1ತ ಬುಧವಾರ ರಾತ್ರೆ ಸುಮಾರ್ 12:45ದ ಅಂದಾಜಿಗ್ ಡ್ರೈವರ್ನ ಅಂಕೆ ತತ್ತ್ದ್ ಮಾರಿಪಳ್ಳ ಜಂಕ್ಷನ್ದಲ್ಪ ಡಿವೈಡರ್ ಮಿತ್ತರ್ದ್ಂಡ್. ಬಾರೀ ಬೀಸ ಇತ್ತಿನ ಕಾರ್ ಡಿವೈಡರ್ದ ಕರೆಂಟ್ ಕುಂದೊಗು ಜೋರುಡು ಎಡ್ತ್ದಿತ್ತ್ದ್ ಎಡ್ತಿನ ಬರಸ್ಗ್ ಕುಂದ ಪೊಲಿದ್ ಬೂರ್ದ್ಂಡ್. ಕರೆಂಟ್ ಕುಂದೊನೇ ಸುಮಾರ್ ದೂರ ಒಯ್ತೊಂದು ಪೋತಿನ ಕಾರ್ ಬೊಕ್ಕ ಸಾದಿಡೇ ಕಬ್ಬೆ ಬೂರ್ದ್ಂಡ್.
ಕಾರ್ಡ್ ನಾಲ್ವೆರ್ ವಿದ್ಯಾರ್ಥಿನಿಯೆರ್ ಬೊಕ್ಕ ಮೂವೆರ್ ವಿದ್ಯಾರ್ಥಿಲು ಪೋವೊಂದಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್. ಮಾತೆರ್ಲಾ ಒಡಿಪು ಮೂಲೊದಕುಲು ಪನ್ದ್ ಪನೊಂದಿತ್ತ್ದ್, ಗಡಿಕುಲಾತಿನಕಲೆನ್ ಕೈತಲ್ದಕಲೆನ ಸಕಾಯೊಡು ಅಪಗನೇ ತುಂಬೆದ ಫಾದರ್ ಮುಲ್ಲರ್ ಆಸ್ಪತ್ರೆಗ್ ದಾಕಲ್ತ್ದೆರ್. ಇಂದೆಟ್ ಕೆಲ ಜೋಕುಲೆನ ಸ್ಥಿತಿ ತೂವೆರಾವೊಂದಿಜ್ಜಿ ಪನ್ದ್ ತೂತಿನಕುಲು ತೆರಿಪಾದೆರ್. ಜಾಗೆಗ್ ಬಂಟ್ವಾಳ ಸಂಚಾರಿ ಪೊಲೀಸ್ ಸ್ಟೇಶನ್ ಅಧಿಕಾರಿಲು ಬತ್ತ್ದ್, ಪರಿಶೀಲನೆ ಮಲ್ತ್ದೆರ್. ಎಡ್ತೆರ್ದಾವರ ರಾಷ್ಟ್ರೀಯ ಪೆರ್ಸಾದಿಡ್ ಒಂತೆ ಪೊರ್ತು ಟ್ರಾಫಿಕ್ ಜಾಮ್ ಉಂಡಾದಿತ್ತ್ಂಡ್. ಞಕ್ಕೆ ಆತಿನ ಗಾಡಿನ್ ದೆತ್ತ್ದ್ ಸುಗಮ ಸಂಚಾರೊಗು ವ್ಯವಸ್ಥೆ ಮಲ್ತ್ ಕೊರ್ತೆರ್. ಈ ಬಗೆಟ್ ಬಂಟ್ವಾಳ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.