Last updated on April 4th, 2026 at 04:48 pm
ತಮಿಳ್ನಾಡ್, ಏ. 04: ತಮಿಳ್ನಾಡ್ ವಿಧಾನಸಭೆ ಎಲೆಕ್ಷನ್ಗ್ ಬಿಜೆಪಿ ಸುರುತ ಸುತ್ತುದ ಅಭ್ಯರ್ಥಿಲೆನ ಪಟ್ಟಿ ಬುಡುಗಡೆ ಮಲ್ತಿತ್ತ್ದ್ ಅವೆಟ್ ಪಕ್ಷೊದ ಮಾಜಿ ಗುರ್ಕಾರೆ ಕೆ. ಅಣ್ಣಾಮಲೈ ಮೆರೆನ ಪುದರ್ ಇಜ್ಜಿ. ಈ ಬಗೆಟ್ ಸೋಷಿಯಲ್ ಮೀಡಿಯಾಲೆಡ್ ಬೋಡಾಯಿನಾತ್ ಗಾಳಿಸುದ್ದಿಲು ಕೋಡೆರ್ದಿಂಚಿ ಸುತ್ತೊಂದುಲ್ಲ.
ವಿಧಾನಸಭಾ ಚುನಾವಣೆಗ್ ಪಕ್ಷೊದ ಅಭ್ಯರ್ಥಿಲೆ ಪಟ್ಟಿಡ್ ಆರೆನ ಪುದರ್ ಇಜ್ಜಂದಿನ ಬಗೆಟ್ ಸ್ವತಃ ಅಣ್ಣಾಮಲೈ ಮೇರೇ ಇತ್ತೆ ಮಾಧ್ಯಮೊಲೆಗ್ ಪ್ರತಿಕ್ರಿಯೆ ಕೊರ್ದಿತ್ತ್ದ್, ಚುನಾವಣೆಗ್ ಉಂತಂದಿನ ನಿರ್ಧಾರ ಎನ್ನನೇ ಪನ್ದ್ ಸ್ಪಷ್ಟ ಮಲ್ತ್ದೆರ್.
ಚೆನ್ನೈ ವಿಮಾನ ಉಂತಡೆಗ್ ಕೊಯಂಬತ್ತೂರ್ರ್ದ್ ಬತ್ತಿ ಬೊಕ್ಕ ಮಾಧ್ಯಮ ಪ್ರತಿನಿಧಿಲೆಡ ಪಾತೆರ್ನ ಅಣ್ಣಾಮಲೈ, ಏನ್ ಒವ್ವೇ ಕ್ಷೇತ್ರೊರ್ದು ಉಂತುಜಿ ಪನ್ದ್ ಕೋರ್ ಸಮಿತಿಗ್ ದುಂಬೇ ಬರೆದ್ ತೆರಿಪಾದೆ. ಅಂಚಾದ್ ಎಂಕ್ ಟಿಕೆಟ್ ಕೊರ್ತುಜೆರ್ ಪನ್ಪಿನ ತಪ್ಪು. ಎಂಕ್ ಉಂತೆರೆ ಇಷ್ಟ ಇಜ್ಜಂಡ್ ಪನ್ಪಿನನೇ ಸತ್ಯ ಪನ್ದ್ ಪನ್ಡೆರ್.
ಪಕ್ಷೊದ ಕೇಂದ್ರ ನಾಯಕತ್ವ ಆರೆನ ನಿರ್ಧಾರೊನು ಗೆನ್ತಿನೆಕ್ ಸೊಲ್ಮೆ ಸಂದಾದ್, ಎನ್ಡಿಎ ಮೈತ್ರಿ ಅಭ್ಯರ್ಥಿಲೆನ ಪರವಾದ್ ರಾಜ್ಯೊಡು ಪ್ರಚಾರ ಮಲ್ಪುವೆ, ಅಭ್ಯರ್ಥಿಲೆಗ್ ಸಕ್ರಿಯವಾದ್ ಬೆರಿಸಾಯ ಆದ್ ಉಂತುವೆ ಪನ್ದ್ ಪನ್ಡೆರ್.