Last updated on April 9th, 2026 at 09:54 am
ಬೆಂಗಳೂರ್, ಏ. 09: ಇಲ್ಲದ ಮೂಜನೇ ಮಾಲಿಗೆದ ಬಾಲ್ಕನಿಡ್ ಗೊಬ್ಬೊಂದಿತ್ತಿನ ಒಂಜರೆ ವರ್ಸ ಪ್ರಾಯೊದ ಪೊಣ್ಣು ಬಾಲೆ, ಆಕಸ್ಮಿಕವಾದ್ ಆಯತತ್ತ್ದ್ ತಿರ್ತ್ ಬೂರ್ದ್ ಸಾವು-ಬದ್ಕ್ದ ನಡುಟು ಪೊರ್ಮ್ಬೊಂದುಪ್ಪುನ ನಡಕೆ ವರದಿ ಆತ್ಂಡ್. ಈ ನಡಕೆ ಕರಿನ ಏಪ್ರಿಲ್ 06 ತಾನಿ ನಡತಿತ್ತ್ದ್, ಕಡೆಸ್ಸ್ದ್ ಬೊಲ್ಪುಗು ಬೈದ್ಂಡ್.
ಇಲ್ಲದ ಬಾಲ್ಕನಿಡ್ ಬಾಲೆ ಗೊಬ್ಬೊಂದು ಸೀದಾ ಮೂಜನೇ ಮಾಲಿಗೆರ್ದ್ ತಿರ್ತ್ ಸಾದಿಗ್ ಬೂರ್ದ್ಂಡ್. ಈ ದೃಶ್ಯ ಕೈತಲ್ದ ಸಿಸಿಟಿವಿ ಕ್ಯಾಮೆರಾಡ್ ಕೈದಾತ್ಂಡ್, ಬಾಲೆ ನೆಲಕ್ ಬೂರ್ದಿನ ಬರಸ್ಗ್ ತರೆಕ್ ಗಾತಿದ ಪೆಟ್ಟ್ ಬೂರ್ದ್ಂಡ್. ಅಂಚಾದ್ ಬಾರೀ ನೆತ್ತೆರ್ ಪೋತುಂಡು.
ಬಾಲೆ ತಿರ್ತ್ ಬೂರ್ದಿನ ಸೌಂಡ್ ಕೇನ್ದ್ ಪೋಡಿಗೆಡ್ ತಿರ್ತ್ ಬಲ್ತೊಂದು ಬತ್ತಿನ ಅಪ್ಪೆ, ನೆತ್ತೆರ್ದ ಮಡುಟು ಬೂರ್ದಿನ ಮಗಲೆನ್ ತೂದು ಅಲ್ಪನೇ ಮತಿ ತತ್ತ್ದ್ ಬೂರ್ದೆರ್. ಅಪಗನೇ ಇಲ್ಲದಕುಲು ಬೊಕ್ಕ ಕೈತಲ್ ಇತ್ತಿನಕುಲು ಬಾಲೆನ್ ದೇರ್ತೊಂದು ಕೈತಲ್ದ ಪ್ರೈವೇಟ್ ಆಸ್ಪತ್ರೆಗ್ ಪೋತೆರ್. ತರೆಕ್ ಗಾತಿದ ಪೆಟ್ಟಾತಿನೆರ್ದಾವರ ಬಾಲೆನ್ ಅಪಗನೇ ತೀವ್ರ ನಿಗಾ ಘಟಕೊಗು (ICU) ದಾಕಲ್ತ್ದೆರ್. ಇತ್ತೆ ಐಸಿಯುಡ್ ಬಾಲೆಗ್ ತಜ್ಞ ಬೈದ್ಯೆರೆ ಕೂಟ ಮರ್ದ್ ಮಲ್ತೊಂದುಂಡು.