Last updated on April 18th, 2026 at 03:37 pm
ಟೆಹ್ರಾನ್, ಏ. 18: ಹೊರ್ಮುಜ್ ಜಲಸಂಧಿನ್ ಮಾತಾ ದೇಶೊಲೆಗ್ ಓಪನ್ ಮಲ್ಪ ಪನ್ದ್ ಪನ್ದಿತ್ತಿನ ಇರಾನ್ ಇತ್ತೆ ಕುಡ ಜಲಸಂಧಿನ್ ಬಂದ್ ಮಲ್ತ್ದ್ಂಡ್. ವಿಶ್ವೊದ ನಿರ್ಣಾಯಕ ಜಲಮಾರ್ಗ ಆಯಿನ ಹೊರ್ಮುಜ್ ಜಲಸಂಧಿ ಇತ್ತೆ ಕುಡ ಬಂದ್ ಆತ್ಂಡ್. ಅಮೆರಿಕ ಸೀಸ್ಫೈರ್ನ್ ಉಲ್ಲಂಘನೆ ಮಲ್ತೊಂದುಂಡು ಪನ್ದ್ ಇರಾನ್ ಆರೋಪ ಮಲ್ತ್ದ್ಂಡ್.
ಇರಾನ್ದ ಪಡವುಲೆನ ಮಿತ್ತ್ದ ಬ್ಲಾಕೇಡ್ನ್ ದೆಪ್ಪುಜ ಪನ್ದ್ ಅಮೆರಿಕ ಪನ್ಡಿಬೊಕ್ಕ ಇರಾನ್ ಶನಿವಾರ ತನ್ನ ನಿರ್ಧಾರೊನು ಪಗತ್ದ್ಂಡ್.
ಇರಾನ್ದ ಜಂಟಿ ಮಿಲಿಟರಿ ಕಮಾಂಡ್ “ಹೊರ್ಮುಜ್ ಜಲಸಂಧಿನ್ ಅಂಕೆಡ್ ದೀವೊನುನ ದಂಡ್ದ ಕಟ್ಟ್ನಿಟ್ಟ್ದ ನಿರ್ವಹಣೆ ಬೊಕ್ಕ ಅಂಕೆಡ್ ಕುಡ ದುಂಬುದ ಸ್ಥಿತಿಕ್ ಬೈದ್ಂಡ್” ಪನ್ದ್ ಪನ್ತ್ಂಡ್. ಇರಾನ್ದ ಬಂದರ್ಲೆನ ಮಿತ್ತ್ ಅಮೆರಿಕದ ದಿಬ್ಬಂಧನ ಜಾರಿಡ್ ಇಪ್ಪುನೇಟ ಜಲಸಂಧಿದ ಮುಕೇನ ಪಡವುಲು ಪೋಯೆರ ಬುಡ್ಪುಜ ಪನ್ದ್ ಇರಾನ್ ಎಚ್ಚರ್ಗೆ ಕೊರ್ತುಂಡು.
ಪಡ್ಡಾಯಿ ಏಷ್ಯಾದ ಉದ್ವಿಗ್ನತೆನ್ ತಗ್ಗಾಯೆರ ಪೊಸ ರಾಜತಾಂತ್ರಿಕ ಪುನೆಪುಲೆನ ನಡುಟು ಈ ಬುಲೆಚ್ಚಿಲ್ ನಡತ್ದ್ಂಡ್. ಇರಾನ್ ಬೊಕ್ಕ ಅಮೆರಿಕದ ಸಮಾಲೋಚಕೆರೆನ ನಡುಟು ಸೋಮವಾರ ಇಸ್ಲಾಮಾಬಾದ್ಡ್ ಕುಡೊಂಜಿ ಸುತ್ತುದ ಪಾತೆರಕತೆ ನಡಪುನ ಸಾಧ್ಯತೆ ಉಂಡು.
ಇರಾನ್ ಶುಕ್ರವಾರ ಜಲಸಂಧಿನ್ ಕುಡ ಓಪನ್ ಮಲ್ಪುವ ಪನ್ದ್ ಘೋಷಣೆ ಮಲ್ತಿಬೊಕ್ಕಲಾ, ಟೆಹ್ರಾನ್ ತನ್ನ ಪರಮಾಣು ಕಾರ್ಯಕ್ರಮ ಸೇರ್ದ್ ವಾಷಿಂಗ್ಟನ್ದ ಒಟ್ಟುಗು ಒಪ್ಪಂದ ಮಲ್ತೊನುನಡೆ ಮುಟ್ಟ ಅಮೆರಿಕದ ದಿಗ್ಬಂಧನ ಇಂಚೆನೆ ದುಂಬರಿಯುಂಡು ಪನ್ದ್ ಅಮೆರಿಕ ಅಧ್ಯಕ್ಷೆ ಡೊನಾಲ್ಡ್ ಟ್ರಂಪ್ ಪನ್ತೆರ್.