Last updated on April 22nd, 2026 at 09:56 am
ಕುಡ್ಲ,ಏ. 22: ಕೂಳೂರ್ ಸಂಕೊದ ಬೇಲೆದ ಗಡು ಗಡೀಗಡಿ ಎದುರು ಪೋನೊಂದುಪ್ಪುನವು ಸಾರ್ವಜನಿಕೆರೆ ಆಕ್ರೋಶಗ್ ನೆವನ ಆದಿತ್ತ್ದ್, ಈ ಬಗೆಟ್ ಸಂಸದೆ ಕ್ಯಾಪ್ಟನ್ ಬ್ರಿಜೇಶ್ ಚೌಟೆರ್ ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರೊದ ಅಧಿಕಾರಿಲೆನ್ ಪ್ರಶ್ನೆ ಮಲ್ತ್ದೆರ್.
ಕರಿನ ನವೆಂಬರ್ಡ್ ನಡತಿತ್ತಿನ ಜಿಲ್ಲಾ ಅಭಿವೃದ್ಧಿ ಸಮನ್ವಯ ಬೊಕ್ಕ ಉಸ್ತುವಾರಿ ಸಮಿತಿ ‘ದಿಶಾ’ ಸಭೆಟ್ ಮಾರ್ಚ್ದ ಅಕೇರಿಗ್ ಬೇಲೆ ಆದ್ ಗಾಡಿಲು ಪೋಯೆರ ಮುಕ್ತ ಆಪುಂಡು ಪನ್ದ್ NHAI ಯೋಜನಾ ನಿರ್ದೇಶಕೆರ್ ಪಾತೆರ ಕೊರ್ದಿತ್ತೆರ್. ಆಂಡ, ಇತ್ತೆ ಅಕ್ಲೆನ ಪಾತೆರೊರ್ದು ಪಿರ ಜಾರ್ದಿನ ಅಧಿಕಾರಿಲು, ಬೇಲೆ ಮುಗಿಪೆರೆ ಜೂನ್ ತಿಂಗೊಲು ಮುಟ್ಟ ಕಾಲಾವಕಾಶ ಬೋಡು ಪನ್ದ್ ಪೊಸ ದಿನ ಗೊತ್ತು ಮಲ್ತ್ದೆರ್.
ಅಧಿಕಾರಿಲೆನ ಈ ಸದು ತೂದು ಅಸಮಾಧಾನ ತೋಜಾಯಿನ ಸಂಸದೆರ್, ನಿಕುಲು ಕಾಲಿ ಕಂಟ್ರಾಕ್ಟರ್ ಕೊರ್ಪುನ ಒಲವುನು ಎಂಕ್ಲೆಡ ಪಟ್ಟೊನೊರ್ಚಿ; ವಾಸ್ತವ ಸ್ಥಿತಿನ್ ಸಮ ತೂದು ಗಡು ಕೊರ್ಲೆ ಪನ್ದ್ ಎಚ್ಚರ್ಗೆ ಕೊರ್ತೆರ್. ಗಡೀಗಡಿ ದಿನ ಪಗಪುನೆರ್ದಾವರ ಸಾರ್ವಜನಿಕೆರ್ ಎಂಕ್ಲೆನ್ ಪ್ರಶ್ನೆ ಮಲ್ಪೆರ್ ಎಂಕ್ಲೆಗ್ ಅವೆಕ್ ಸದು ಕೊರ್ಯೆರ ಬಂಙ ಆಪುಂಡು ಪನ್ದ್ ಪನ್ಡಿನ ಆರ್, ಕಲು ಪಾತೆರ ಕೊರಂದೆ ಜವಾಬ್ದಾರಿಡ್ ಬೇಲೆ ಮುಗಿಪೆರೆ ಅಧಿಕಾರಿಲೆಗ್ ಜೋರುಡು ಪನ್ತೆರ್.