Last updated on April 22nd, 2026 at 11:00 am
ಮಂಡ್ಯ, ಏ. 22: ಮೋಕೆ ಮಲ್ತ್ದ್ ಮದಿಮೆ ಆತಿನ ರಡ್ಡೇ ವರ್ಸೊಡು ಬೊಡೆದಿ ಒರ್ತಿ ಕಂಡನ್ಯನ ದೋಸ್ತಿನ ಒಟ್ಟುಗೇ ಬಲ್ತ್ ಪೋದು ಮದಿಮೆ ಆತಿನ ನಡಕೆ ಮಂಡ್ಯ (Mandya) ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸೀಮೆಡ್ ನಡತ್ದ್ಂಡ್. ಬನ್ನಂಗಾಡಿ ಗ್ರಾಮೊದ ರಿಕ್ಷಾ ಡ್ರೈವರ್ ಸಾಗರ್ ಪನ್ಪಿನಾರೆನ ಬೊಡೆದಿ ರಕ್ಷಿತಾ ಪನ್ಪಿನಾಲೇ ತನ್ನ ಕಂಡನ್ಯನ ದೋಸ್ತಿ ಇಂದ್ರನ ಒಟ್ಟುಗು ಬಲ್ತಿನಾಲ್. ‘ಮೋಕೆ ಮಲ್ತ್ದ್ ಮದಿಮೆ ಆತಿನ ಬೊಡೆದಿ, ತಂಗಡಿ ತಂಗಡಿ ಪನೊಂದಿತ್ತಿನಾಯನ ಒಟಟುಗೇ ಬಲ್ತ್ ಪೋತಲ್’ ಪನ್ದ್ ಸಾಗರ್ ಮಾಧ್ಯಮೊಲೆನ ಎದುರು ಬುಲ್ತೊಂದುಲ್ಲೆರ್.
ರಕ್ಷಿತಾ ಕಾಲೇಜ್ಗ್ ಪೋವೊಂದುಪ್ಪುನ ಪೊರ್ತುಡು ರಿಕ್ಷಾ ಡ್ರೈವರ್ ಸಾಗರ್ನ ಗುರ್ತ ಆದಿತ್ತ್ಂಡ್. ಮೆಲಾನೆ ಮೊಕಲೆನ ಗುರ್ತ ಮೋಕೆ ಆದ್ ತಿರ್ಗ್ದ್, ಇರ್ವೆರ್ಲಾ ಮದಿಮೆ ಆತೆರ್. ಮದಿಮೆ ಆದ್ ರಡ್ಡ್ ವರ್ಸ ದಂಪತಿ ಎಡ್ಡೆಡೇ ಸಂಸಾರ ಮಲ್ತೊಂದಿತ್ತೆರ್. ಆಂಡ ಇಂಚಿಪ ಸಾಗರ್ನ ದೋಸ್ತಿ ಇಂದ್ರ ಡ ರಕ್ಷಿತಾ ಮುಟ್ಟ ಆದಿತ್ತಲ್.
ಇಲ್ಲ್ ಜತ್ತ್ ಪೋನಗ ರಕ್ಷಿತಾ ಬಜಿಕೈಟ್ ಪೋತುಜಲ್. ಕಂಡನ್ಯನ ಇಲ್ಲಡ್ ಇತ್ತಿನ ಸುಮಾರ್ ಒಂಜಿ ಲಕ್ಷ ರೂಪಾಯಿ ಕಾಸ್ ಬೊಕ್ಕ 22 ಗ್ರಾಂ ಪದ್ದೈ ಬಂಗಾರ್ ಲಕ್ಕಾವೊಂದು ಪೋತಲ್ ಪನ್ದ್ ಸಾಗರ್ ಆರೋಪ ಮಲ್ತ್ದೆರ್. ಇಂದ್ರನ ಒಟ್ಟುಗು ದೇವಸ್ಥಾನ ಒಂಜೆಟ್ ಮದಿಮೆ ಆತಿನ ರಕ್ಷಿತಾ, ಆ ಫೋಟೋಲೆನ್ ತನ್ನ ವಾಟ್ಸಾಪ್ ಸ್ಟೇಟಸ್ಗ್ ಪಾಡೊಂದು ಕಂಡನ್ಯಗ್ ಶಾಕ್ ಕೊರ್ತಲ್.
ಬೊಡೆದಿನ ಕೃತ್ಯೊರ್ದು ಮಂಡೆಬೆಚ್ಚ ಆದ್ ಸಾಗರ್ ನ್ಯಾಯ ಬೋಡು ಪನ್ದ್ ಪೊಲೀಸ್ ಸ್ಟೇಶನ್ ಪೋತೆರ್. ‘ಅಕುಲಿರ್ವೆರ್ ಎಂಚ ಬೋಡಾಂಡ ಇಪ್ಪಡ್, ಎಂಕ್ ತೊಂದರೆ ಇಜ್ಜಿ. ಆಂಡ ಎಂಕ್ ಇತ್ತೆಗ್ ಇತ್ತೆನೇ ಡಿವೋರ್ಸ್ (Divorce) ಕೊರಡ್ ಬೊಕೂ ಇಲ್ಲರ್ದ್ ಲಕ್ಕಾದಿನ ಕಾಸ್ ಬೊಕ್ಕ ಬಂಗಾರ್ ಪಿರ ಕೊರಡ್’ ಪನ್ದ್ ಸಾಗರ್ ಆಗ್ರಹ ಮಲ್ತ್ದೆರ್. ಮಗನ ಪರಿಸ್ಥಿತಿನ್ ತೂದು ಸಾಗರ್ನ ಅಪ್ಪೆ ಕಣ್ಣನೀರ್ ಪಾಡೊಂದುಲ್ಲೆರ್.