Last updated on April 22nd, 2026 at 03:36 pm
ಕಾಪು, ಏ. 22: ರಾಷ್ಟ್ರೀಯ ಪೆರ್ಸಾದಿ 66ತ ಉಳಿಯಾರಗೋಳಿ ಗ್ರಾಮೊದ ಸಾಯಿ ಸರ್ವಿಸ್ ಸ್ಟೇಷನ್ದ ಕೈತಲ್ ಅಂಗಾರೆ ಬಯ್ಯಡ್ ನಡತಿನ ಭೀಕರ ಎಡ್ತೆಡ್ ಸ್ಕೂಟರ್ಡ್ ಪಿರವು ಕುಲ್ಲುದಿತ್ತಿನ 8 ವರ್ಸ ಪ್ರಾಯೊದ ಪೊಣ್ಣು ಸಾತ್ವಿ ಶೆಟ್ಟಿ ತೀರ್ದಲ್. ಸ್ಕೂಟರ್ ಬುಡೊಂದಿತ್ತಿನ ಅಮ್ಮೆ ನಿತ್ಯಾನಂದ ಶೆಟ್ಟಿ ಮೆರೆಗ್ ಗಾತಿದ ಗಡಿಕುಲಾತ.
ಅಂಗಾರೆ ಬಯ್ಯ 5:35ತ ಅಂದಾಜಿಗ್ ನಿತ್ಯಾನಂದೆರ್ ಮಗಲ್ ಸಾತ್ವಿನ ಒಟ್ಟುಗು ಸ್ಕೂಟರ್ಡ್ ಕುಡ್ಲ ದಂಚಿರ್ದ್ ಒಡಿಪು ದಂಚಿ ಪೋವೊಂದಿತ್ತೆರ್. ಈ ಪೊರ್ತುಡು ಸರ್ವಿಸ್ ರೋಡ್ರ್ದ್ ಬಾರೀ ಬೀಸ ಬತ್ತಿನ ಪ್ರೈವೇಟ್ ಬಸ್ ದಾಲ ಸೂಚನೆ ಕೊರಂದೆ ಸೀದಾ ಪೆರ್ಸಾದಿಗ್ ಪೊಗ್ಗುದ್ಂಡ್. ಬಸ್ ಡ್ರೈವರ್ನ ಗೋಸ್ಮರಿರ್ದಾವರ ಬಸ್ ಸ್ಕೂಟರ್ಗ್ ಎಡ್ತ್ದ್ಂಡ್. ಎಡ್ತಿನ ಬರಸ್ಗ್ ಬಸ್ ಡಿವೈಡರ್ ಮಿತ್ತರ್ದ್ ಉಂತುದುಂಡು.
ಅಲ್ಪ ಇತ್ತಿನಕಲೆನ ಸಕಾಯೊಡು ಗಡಿಕುಲಾತಿನಕಲೆನ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ ತರೆಕ್ ಗಾತಿದ ಪೆಟ್ಟಾತಿನೆರ್ದಾವರ ಸಾತ್ವಿ ಒಡಿಪುದ ಆಸ್ಪತ್ರೆಗ್ ಎತ್ತ್ನಗ ತೀರ್ದೆರ್ ಪನ್ದ್ ಡಾಕ್ಟರ್ ಘೋಷಣೆ ಮಲ್ತ್ದೆರ್ . ನಿತ್ಯಾನಂದ ಶೆಟ್ರೆಗ್ ಆದರ್ಶ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ಕಾಪು ಪೊಲೀಸ್ ಸ್ಟೇಶನ್ಡ್ ಬಸ್ ಡ್ರೈವರ್ನ ಮಿತ್ತ್ ಬಿಎನ್ಎಸ್ (BNS) ಕಾಯ್ದೆದಡಿಟ್ ಪ್ರಕರಣ ದಾಕಲಾತ್ಂಡ್.
ದುಬೈಡ್ ಇತ್ತಿನ ಈ ಕುಟುಮ ನನ ಊರುಡೇ ಉಂತುನ ಅಟ್ಟನೆಡ್ ಇತ್ತೆರ್. ಸಾತ್ವಿನ್ ಒಡಿಪುದ ಶಾಲೆಗ್ ಅಡ್ಮಿಷನ್ಲಾ ಮಲ್ತಿತ್ತೆರ್. ಇನಿ ಅಮ್ಮೆ ನಿತ್ಯಾನಂದ ಶೆಟ್ರ್ ಮಾತ್ರ ದುಬೈಗ್ ಪೋಯೆರ ಇತ್ತೆರ್. ದಾದನೋ ಕನಯೆರ ಕಾಪು ಪೇಂಟೆಗ್ ಪೋದು ಪಿರ ಬನ್ನಗ ಈ ಎಡ್ತೆ ನಡತ್ದ್ಂಡ್.