Last updated on April 25th, 2026 at 08:30 am
ಕಾರ್ಲ, ಏ. 25: ನಿಟ್ಟೆ ಸಮುದಾಯ ಆರೋಗ್ಯ ಕೇಂದ್ರೊದ ಕ್ರಾಸ್ದ ಕೈತಲ್ ಶುಕ್ರವಾರ ಬಯ್ಯಡ್ ನಡತಿನ ಕಾರ್ ಬೊಕ್ಕ ಬೈಕ್ದ ನಡುತ ಎಡ್ತೆಡ್ ಬೈಕ್ ಬುಡೊಂದಿತ್ತಿನ ನವೀನ್ ಚಂದ್ರ ಮೂಲ್ಯೆರ್ (45) ತೀರ್ದೆರ್. ಆರೆನ ಮಗಲ್ ಪ್ರೇರಣಾ ಮೂಲ್ಯಗ್ ಗಾತಿದ ಗಡಿಕುಲಾದಿತ್ತ್ದ್, ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.
ನಿಟ್ಟೆ ಕೈತಲ್ದ ಬಜಕಳ ನಿವಾಸಿ ನವೀನ್ ಚಂದ್ರ ಮೇರ್ ತನ್ನ ಮಗಲ್ ಪ್ರೇರಣಾನ್ ಸಿಇಟಿ ಪರೀಕ್ಷೆ ಬರೆಪಾದ್ ಬೈಕ್ಡ್ ಇಲ್ಲಗ್ ಪಿರ ಲೆತೊಂದು ಬರೊಂದಿತ್ತೆರ್. ಈ ಪೊರ್ತುಡು ಕಾರ್ಲರ್ದ್ ನಿಟ್ಟೆ ದಂಚಿ ಬಾರೀ ಬೀಸಡ್ ಬತ್ತಿನ ಕಾರ್ ಮೊಕಲೆನ ಬೈಕ್ಗ್ ಎಡ್ತ್ದ್ಂಡ್. ಎಡ್ತೆದ ಬರಸ್ಗ್ ಬೈಕ್ಡ್ ಇತ್ತಿನಕುಲು ಸಾದಿಗ್ ರಟ್ಟ್ದ್ ತರೆಕ್ ಗಾತಿದ ಪೆಟ್ಟ್ ಬೂರ್ದ್ಂಡ್. ಅಪಗನೇ ಇರ್ವೆರೆನ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ನವೀನ್ ಚಂದ್ರೆರ್ ಮರ್ದ್ ಪಲಿಪಂದೆ ತೀರ್ದೆರ್.
ಎಡ್ತಿನ ಕಾರ್ಡ್ ಕೈತಲ್ದ ಇಂಜಿನಿಯರಿಂಗ್ ಕಾಲೇಜ್ದ ವಿದ್ಯಾರ್ಥಿಲು ಇತ್ತೆರ್ ಪನ್ದ್ ತೆರಿದ್ ಬೈದ್ಂಡ್. ಅಕಲೆನ ಗೋಸ್ಮರಿದ ಡ್ರೈವಿಂಗೇ ಈ ಡಕೆಗ್ ನೆವನ ಪನ್ದ್ ತೂಯಿನಕುಲು ಪನೊಂದುಲ್ಲೆರ್. ಈ ಸಾದಿಡ್ ವಿದ್ಯಾರ್ಥಿಲು ಬಾರೀ ಬೀಸ ಗಾಡಿ ಬುಡೊಂದು ಪೋಪುನ, ಎಡ್ತೆಲು ಆಪುನ ನಡತೊಂದೇ ಉಂಡು.