Last updated on May 6th, 2026 at 07:22 am
ಪುತ್ತೂರ್ ಮೇ 05: ಸುಬ್ರಹ್ಮಣ್ಯ–ಮಂಜೇಶ್ವರ ಪೆರ್ಸಾದಿದ ಸವಣೂರು ಕೈತಲ್ದ ಚಾಪಳ್ಳ ತಿರ್ಗೆಲ್ಡ್ ಕೋಡೆ ಅಂಗಾರೆ ಬಯ್ಯಡ್ ನಡತಿನ ಎಡ್ತೆಡ್ ಸ್ಕೂಟರ್ಡ್ ಇತ್ತಿನ ಇರ್ವೆರ್ಲಾ ಅಲ್ಪನೇ ತೀರ್ದಿತ್ತ್ದ್, ಬೊಕ್ಕ ಇರ್ವೆರೆಗ್ ಗಡಿಕುಲಾತ.
ಬಂಟ್ವಾಳ ತಾಲ್ಲೂಕ್ದ ಮಿತ್ತೂರ್ ಗ್ರಾಮೊದ ಯಜ್ಞೇಶ್ (21) ಬೊಕ್ಕ ಪುತ್ತೂರ್ ತಾಲ್ಲೂಕ್ದ ಪಾಣಾಜೆ ಗ್ರಾಮೊದ ಜಗನ್ (20) ತೀರ್ದೀನ ಜವನೆರ್. ಜಗನ್ ಪುತ್ತೂರ್ದ ಅಕ್ಷಯ ಕಾಲೇಜ್ಡ್ ಹೋಟೆಲ್ ಮ್ಯಾನೇಜ್ಮೆಂಟ್ ಕಲ್ತೊಂದಿತ್ತ್ದ್, ಇಂಟರ್ನ್ಷಿಪ್ಗ್ ಆಸ್ಟ್ರೇಲಿಯಾಗ್ ಪೋದು ಇಂಚಿಪ ಆತೇ ಊರ್ಗ್ ಪಿರ ಬತ್ತಿತ್ತೆರ್.
ಜವನೆರಿರ್ವೆರ್ ಒವ್ವಾ ಬೇಲೆಗ್ ಆಲಂಗಾರ್ಗ್ ಪೋದು ಇಲ್ಲಗ್ ಪಿರಬನ್ನಗ ಈ ಎಡ್ತೆ ನಡತ್ದ್ಂಡ್. ಚಾಪಳ್ಳ ತಿರ್ಗೆಲ್ಡ್ ಎದುರುರ್ದ್ ಬತ್ತಿನ ನೀರ್ದ ಟ್ಯಾಂಕರ್ ಬೊಕ್ಕ ಸ್ಕೂಟರ್ ಎಡ್ತೊಂದ. ಸ್ಕೂಟರ್ಗ್ ಎಡ್ಪುನೆನ್ ತಪ್ಪಾಯೆರ ಟ್ಯಾಂಕರ್ ಡ್ರೈವರ್ ಗಾಡಿನ್ ಎಡತ್ತ್ಗ್ ತಿರ್ಗಾನಗ ಸ್ಕೂಟರ್ ಟ್ಯಾಂಕರ್ದ ಟಯರ್ದಡಿಕ್ ಬೂರ್ದ್ಂಡ್. ಬೊಕ್ಕ ಅಂಕೆ ತತ್ತ್ದ್ ಟ್ಯಾಂಕರ್ ಸಾದಿ ಬರಿತ ಕಣಿಕ್ ಬೂರ್ದ್ಂಡ್. ಅವೇ ಪೊರ್ತುಡು ಪಿರವುಡೆ ಬರೊಂದಿತ್ತಿನ ಕುಡೋಂಜಿ ಬೈಕ್ದಕುಲು ಎಡ್ತೆನ್ ತೂದು ಪೋಡಿದ್ ಬ್ರೇಕ್ ಪಾಡ್ನಗ ಬೈಕ್ ಸ್ಕಿಡ್ ಆದ್ ಅಕಲೆಗ್ಲಾ ಕಿಞ್ಞ ಕಿಞ್ಞ ಗಡಿಕುಲಾತ. ಜಾಗೆಗ್ ಬೆಳ್ಳಾರೆ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.