Last updated on May 25th, 2026 at 11:36 am
ಬಂಟ್ವಾಳ, ಮೇ. 25: ಬಿ.ಸಿ. ರೋಡ್ರ್ದ್ ಪುರಲ್ಗ್ ಪೋಪಿಸಾದಿಡ್ ತೆಂಕಬೆಳ್ಳೂರು ಗ್ರಾಮೊದ ಕೊಪ್ಪಳ ಪನ್ಪಿನಲ್ಪ ಇಂಟರ್ಲಾಕ್ ಕೊನೊವೊಂದಿತ್ತಿನ ಲಾರಿ ಒಂಜಿ ನೇಲ್ಯ ಜಪ್ಪಂಗೆಲ್ಡ್ ಡ್ರೈವರ್ನ ಅಂಕೆ ತತ್ತ್ದ್ ಬೂರ್ದಿನ ನಡಕೆ ಕೋಡೆ ರಾತ್ರೆ 11 ಗಂಟೆದ ಅಂದಾಜಿಗ್ ನಡತ್ದ್ಂಡ್.
ಬಾರೀ ಮಲ್ಲ ಜಪ್ಪಂಗೆಲ್ಡ್ ಅಂಕೆ ತತ್ತ್ದಿತ್ತ್ದ್ ಬ್ರೇಕ್ ಪಾಡ್ಂಡಲಾ ಗಾಡಿ ಅಂಕೆಗ್ ತಿಕ್ಕಂದೆ, ಜಾರೊಂದು ಪೋದು ತಿರ್ಗೆಲ್ಡ್ ಕಬ್ಬೆ ಬೂರ್ದ್ಂಡ್. ಬೂರ್ದಿನ ಬರಸ್ಗ್ ಲಾರಿಡಿತ್ತಿನ ಇಂಟರ್ಲಾಕ್ ತಿರ್ತ್ ಇತ್ತಿನ ಇಲ್ಲಜಾಲ್ಡೊರ್ಮೆ ರಟ್ಟ್ದ್ಂಡ್. ಇಲ್ಲ್ದ ಮಾಡ್, ಮದೆಲ್ ಬೊಕ್ಕ ಕಂಡಿಗ್ ಹಾನಿ ಆತ್ಂಡ್. ಲಾರಿ ಒಂಜಿ ಫೀಟ್ ದುಂಬು ಪೋಪೊಂಡಲಾ ಕರೆಂಟ್ ಕುಂದೊಗು ಎಡ್ತ್ದ್ ರಡ್ಡ್ ಕರೆಂಟ್ ಕುಂದೊಲು ಇಲ್ಲ್ದ ಮಿತ್ತ್ ಬೂರುನ ಪೋಡಿಗೆ ಇತ್ತ್ಂಡ್. ಲಾರಿದ ಡ್ರೈವರ್ಗ್ ಗಾತಿದ ಗಡಿಕುಲಾದಿತ್ತ್ದ್, ಕುಡ್ಲದ ಆಸ್ಪತ್ರೆಗ್ ದಾಕಲ್ತ್ದೆರ್.