“ಬ್ರಿಜೇಶ್ ಚೌಟೆರೆಗ್ ಮದಿಮೆ ಮಲ್ಪಾಗ” – ಶಾಸಕೆ ಅಶೋಕ್ ಕುಮಾರ್ ರೈಕುಲು

Last updated on May 26th, 2026 at 07:59 am

“ಮದಿಮೆ ಆವಂದೆ ಇಪ್ಪುನ ಸಂಸದೆ ಬ್ರಿಜೇಶ್ ಚೌಟೆರೆಗ್ ನಮ ಮಾತಾ ಕೂಡ್ದ್ ಒಂಜಿ ರಡ್ಡ್ ವರ್ಸೊದುಲಯಿ ಮದಿಮೆ ಮಲ್ಪಾಗ” ಪನ್ದ್ ಪುತ್ತೂರ್ ಶಾಸಕೆ ಅಶೋಕ್ ಕುಮಾರ್ ರೈ ಪನ್ಡೆರ್. ಮೇ.23 ತಾನಿ ಸವಣೂರ್‌ಡ್ ನಡತಿನ ಸೀತಾರಾಮ ರೈ – ಕಸ್ತೂರಿ ದಂಪತಿಲೆನ ‘ಕಲ್ಯಾಣ – 50’ ಲೇಸ್‌ಡ್ ಈ ನಡಕೆ ನಡತ್‌ಂಡ್.

ದಂಪತಿಲೆಗ್ ಎಡ್ಡೆಪು ಬಾಮಿತ್‌ದ್ ಪಾತೆರ್ನ ಸಂಸದೆ ಕ್ಯಾ. ಬ್ರಿಜೇಶ್ ಚೌಟೆರ್, “ದಾಂಪತ್ಯ ಜೀವನ ನಡಪಾಯೆರ ಧೈರ್ಯದಾಂತೆ ದಾಂಪತ್ಯೊದ ಅನುಭವ ಗೆತೊನರೆ ಆತಿಜಿ” ಪನ್ದ್ ಪನ್ಡೆರ್. ಬೊಕ್ಕ ಪಾತೆರ್ನ ಶಾಸಕೆ ಅಶೋಕ್ ಕುಮಾರ್ ರೈ, “ದಾಂಪತ್ಯ ಜೀವನೊದ ಸುರುತ 10-15 ವರ್ಷ ಒರಿಯಗೊರಿ ಒಂಬೊಂದು ಇಪ್ಪೆರ ಅಭ್ಯಾಸ ಮಲ್ತೊಂಡ ಬೊಕ್ಕ ಐನಾತೆಗೇ ಸರಾಗವಾದ್ ಪೋಪುಂಡು. ಚೌಟೆರ್ ಪೋಡ್ಯೊಂಡೂಂದು ಇಜ್ಜಿ. ಆರೆಗ್ ನಮ ಮಾತಾ ಕೂಡ್ದ್ ಒಂಜಿ ರಡ್ಡ್ ವರ್ಸೊದುಲಯಿ ಪೊಣ್ಣು ತೂದು ಮದಿಮೆ ಮಲ್ಪಾಗ” ಪನ್ದ್ ಪನ್ಡೆರ್. ಈ ಪೊರ್ತುಡು ಮಿತ್ತರ್ಮೆಡ್ ಇತ್ತಿನ ಮೋಹನ ಆಳ್ವೆರ್ “ಪೊಣ್ಣು ಅತ್ತ್, ಪೊಂಜೊವು” ಪನ್ದ್ ಪನ್ಡೆರ್. ಐಕ್ ಸದು ಕೊರ್ದು ಅಶೋಕ್ ರೈಕುಲು, “ಅತ್ತ್. ಆರೆಗ್ ಪೊಣ್ಣೇ ಆವೊಡು. ಆರ್ ಮದಿಮೆ ಆಪೆರ್ ಪನ್ಡ ಏತ್ ಪೊಣ್ಣುಲು ಎದುರು ಬರ್ಪೆರ್ ತೂಲೆ” ಪನ್ದ್ ಪನ್ಡೆರ್.