Last updated on May 28th, 2026 at 09:47 am
ಧರ್ಮಸ್ಥಳ, ಮೇ 28: ಕುಡುಮ ದೇಲಂತಡೆದ ಮುಖ್ಯದ್ವಾರೊದ ಎದುರುದ ಬಸ್ ಉಂತಡೆಡ್ ಅಜ್ಜಿ ಒರ್ತಿಗ್ ಅಮಲ್ ಏರುನ ಅಸರ್ ಪರ್ಪಾದ್, ಲಕ್ಷಗಟ್ಲೆ ರೂಪಾಯಿ ಮೌಲ್ಯೊದ ಪದ್ದೈ ಬಂಗಾರ್ ಬೊಕ್ಕ ಕಾಸ್ ಕಂಡ್ದಿನ ನಡಕೆ ಮೇ 25 ತಾನಿ ರಾತ್ರೆ ನಡತ್ದ್ಂಡ್. ನಡಕೆಗ್ ಸಂಬಂಧಿತ್ದ್ ಧರ್ಮಸ್ಥಳ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ಬೆಂಗಳೂರ್ದ ಬನ್ನೇರುಘಟ್ಟ ಸಾದಿ ನಿವಾಸಿ ಶ್ರೀಮತಿ ಪ್ರೇಮಾ ಕೆ (70) ಪನ್ಪಿನಾರ್ ಬಂಗಾರ್ ಬೊಕ್ಕ ಕಾಸ್ ಕಲೆವೊಂದಿನಾರ್. ಆರೆನ ಕೈರ್ದ್ 112 ಗ್ರಾಂ ತೂಕೊದ ಬಂಗಾರ್ ಬೊಕ್ಕ 7,000/- ರೂಪಾಯಿ ಕಾಸ್ ಕನ್ಡ್ದ್ ಪೋದಿತ್ತ್ದ್, ಸೊತ್ತುಲೆನ ಒಟ್ಟು ಮೌಲ್ಯ ಸುಮಾರ್ 10,00,700/- ರೂಪಾಯಿ ಪನ್ದ್ ಅಂದಾಜಿ ಮಲ್ತ್ದೆರ್.
ನಡಕೆದ ಒಲವು
ತೇದಿ 25-05-2026 ತಾನಿ ಮಧ್ಯಾಹ್ನ ಕುಡುಮ ದೇಲಂತಡೆಗ್ ಬತ್ತಿತ್ತಿನ ಪ್ರೇಮಾ ಮೇರ್ ದೇಬೆರೆ ದರ್ಶನ ಮಲ್ತ್ದ್, ರಾತ್ರೆ ಪಿರ ಬೆಂಗಳೂರ್ಗ್ ಪೋಯೆರೆ ಮುಖ್ಯದ್ವಾರೊದ ಎದುರುದ ಬಸ್ ಉಂತಡೆಡ್ ಬಸ್ಸ್ಗ್ ಕಾತೊಂದು ಕುಲ್ಲುದಿತ್ತೆರ್. ಈ ಪೊರ್ತುಡು ಆರೆನ ಕೈತಡೆ ಬತ್ತಿನಾಯೆ ಒರಿ ಅಜ್ಜಿಡ ಬಾರೀ ಎಡ್ಡೆಡ್ ಪಾತೆರ್ದೆ. ಬೊಕ್ಕ ಆಯೆ ಕನತಿತ್ತಿನ ದೇಬೆರೆ ಪುರ್ಸದ ಬೊಕ್ಕ ಪರ್ಯೆರ ಜ್ಯೂಸ್ ಕೊರ್ತೆ.
ಆಯನ ಪಾತೆರ ನಂಬ್ದ್ ಆರ್ ಜ್ಯೂಸ್ ಒಂತೆ ಪರ್ದ್ ಪಿರ ಕೊರ್ತೆರ್. ಆಂಡ, ಜ್ಯೂಸ್ ಪರ್ತಿನ ಒಂತೆ ಪೊರ್ತುಡೇ ಆರ್ ಮತಿ ತತ್ತ್ದ್ ಉಸಾರ್ ತತ್ತ್ದೆರ್. ಆರ್ ಮತಿ ತಪ್ಪುನೆನ್ ಕಾತೊಂದಿನ ಕೆಂಗುಡೆ, ಪ್ರೇಮಾ ಮೆರೆನ ಮೆಯಿಟಿತ್ತಿನ 112 ಗ್ರಾಂ ಬಂಗಾರ್ ಬೊಕ್ಕ ಬ್ಯಾಗ್ಡ್ ಇತ್ತಿನ 7,000 ರೂ. ಕಾಸ್ ಲಕ್ಕಾದ್ ಪದ್ರಾಡಾತೆ.
ಬಸ್ ಉಂತಡೆಡ್ ಮತಿತತ್ತ್ದ್ ಬೂರ್ದಿತ್ತಿನ ಪ್ರಾಯೊದಾರೆನ್ ಅಲ್ಪ ಇತ್ತಿನಕುಲು ತೂದು ಕೈತಲ್ದ ಆಸ್ಪತ್ರೆಗ್ ದಾಕಲ್ತ್ದೆರ್. ಇತ್ತೆ ಆಸ್ಪತ್ರೆಡ್ ಮರ್ದ್ ಆದ್ ಉಸಾರಾವೊಂದುಪ್ಪುನ ಅಜ್ಜಿ ಬರೆಪಾದಿನ ಒಯಿಲ್ದ ಮಿತ್ತ್ ಧರ್ಮಸ್ಥಳ ಪೊಲೀಸ್ ಸ್ಟೇಶನ್ಡ್ ಆ ಅಪರಿಚಿತನ ಮಿತ್ತ್ ಪ್ರಕರಣ ದಾಕಲಾದಿತ್ತ್ದ್, ಪೊಲೀಸೆರ್ ಸಿಸಿಟಿವಿ ದೃಶ್ಯಾವಳಿಲೆನ ಆಧಾರೊಡು ಆರೋಪಿನ್ ಪತ್ತೆರೆ ಬೇಪು ಪಾಡ್ದೆರ್.