Last updated on June 1st, 2026 at 11:56 am
ಬಂಟ್ವಾಳ, ಜೂನ್ 01: ಬಂಟ್ವಾಳ ತಾಲೂಕ್ದ ಪಿಲಾತಬೊಟ್ಟು ಗ್ರಾಮೊದ ಕಾಡಬೊಟ್ಟು ಪನ್ಪಿನಲ್ಪ ಐತಾರ ರಾತ್ರೆ ಬಾರೀ ಆಘಾತಕಾರಿ ನಡಕೆ ಒಂಜಿ ನಡತ್ದ್ಂಡ್. ಇಲ್ಲಡ್ ಅಗೆಲ್ ಬಲಸುನಾನಿಯೇ, ಪರ್ತಿನ ಅಮಲ್ಡ್ ಲಡಯಿ ಮಲ್ಪೊರ್ಚಿ ಪನ್ಡಿನೆಕ್ ಜವನೆ ಒರಿ ತನ್ನ ಸ್ವಂತ ಸಿದ್ಯಮ್ಮನ ಕೆಕ್ಕಿಲ್ಗೇ ಬಿಯರ್ ಬಾಟ್ಲಿಡ್ ಕುತ್ತುದ್ ಕೆರ್ತೆ.
ಕಾಡಬೊಟ್ಟು ನಿವಾಸಿ ಮಧುಸೂಧನೆ ( 38) ತೀರ್ದಿನಾರ್, ಆರೆನ ಪಲಯೆ ಕೇಶವ ಪೂಜಾರಿ ಪನ್ಪಿನಾರೆನ ಮಗೆ ರಾಹುಲ್ (23) ಕೆರ್ತಿನಾಯೆ.
ಕಾಡಬೊಟ್ಟು ನಿವಾಸಿ ಶೇಖರ ಪೂಜಾರ್ಲೆನ ಇಲ್ಲಡ್ ಐತಾರ ರಾತ್ರೆ ಬೂತೊಗು ಬಲಸೆರೆ ಇತ್ತ್ಂಡ್. ಈ ಪೊರ್ತುಡು ಕೇಶವ ಪೂಜಾರ್ಲೆನ ಮಗೆ ರಾಹುಲ್ (23 ವರ್ಷ) ಬೊಕ್ಕ ಆಯನ ದೋಸ್ತಿಯರ್ಲು ಇಲ್ಲದ ಪಿದಯಿ ಪರೊಂದು ಜೋರು ಬೊಬ್ಬೆ ಪಾಡೊಂದಿತ್ತೆರ್. ಇಲ್ಲಡ್ ಎಡ್ಡೆ ಲೇಸ್ ಆವೊಂದುಪ್ಪುನಗ ಪಿದಯಿ ಗಲಾಟೆ ಮಲ್ಪೊರ್ಚಿ ಪನ್ದ್ ರಾಹುಲ್ನ ಸಿದ್ಯಮ್ಮೆ, ಇಲೆಕ್ಟ್ರಿಷಿಯನ್ ಆದುಪ್ಪುನ ಮಧುಸೂಧನ್ (38 ವರ್ಷ) ಮೇರ್ ಪನ್ಡ್ದ್ ಬುದ್ದಿಪಾತೆರ ಪನ್ತೆರ್.
ಸಿದ್ಯಮ್ಮೆ ಆಯಗ್ ಬುದ್ಧಿವಾದ ಪನ್ಡಿನೆಕ್ ಬಾರೀ ಪಿಸ್ರಾಯಿನ ರಾಹುಲ್, ಅಪಗನೇ ಕೈಟಿತ್ತಿನ ಬಿಯರ್ ಬಾಟ್ಲಿಡ್ ಮಧುಸೂಧನೆರೆನ ಕೆಕ್ಕಿಲ್ದ ಭಾಗೊಗು ಜೋರಡು ಕುತ್ತುದು ಬಲ್ತ್ದೆ. ಬಿಯರ್ ಬಾಟ್ಲಿ ಕುತ್ತ್ದಿನ ಬರಸ್ಗ್ ಪಾಕ ನೆತ್ತೆರ್ ಪೋದು, ಗಾತಿದ ಸ್ಥಿತಿಟ್ ಇತ್ತಿನ ಮಧುಸೂಧನೆರೆನ್ ಅಪಗನೇ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಆರ್ ಅಡೆ ಎತ್ತ್ನಗ ತೀರ್ದೆರ್ ಪನ್ದ್ ಡಾಕ್ಟರ್ ಘೋಷಣೆ ಮಲ್ತ್ದೆರ್.
ತೀರ್ದಿನ ಮಧುಸೂಧನೆರೆಗ್ ಮದಿಮೆ ಆತಿಜಿ, ಇಲೆಕ್ಟ್ರಿಷಿಯನ್ ಆದ್ ಬೆನೊಂದಿತ್ತೆರ್. ಕೆರ್ತಿನ ಕೆಂಗುಡೆ ರಾಹುಲ್ ಪೆಟ್ರೋಲ್ ಬಂಕ್ಡ್ ಬೇಲೆ ಮಲ್ತೊಂದಿತ್ತೆಗೆ. ಪುನೊನು ಮರಣೋತ್ತರ ಪರೀಕ್ಷೆಗ್ ಬಂಟ್ವಾಳ ಸರ್ಕಾರಿ ಆಸ್ಪತ್ರೆಡ್ ದೀತೆರ್. ಜಾಗೆಗ್ ಪುಂಜಾಲಕಟ್ಟೆ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದ್ ಪ್ರಕರಣ ದಾಕಲ್ತೊಂದು, ದೆಂಗ್ತಪ್ಪಾದಿನ ಆರೋಪಿನ್ ನಾಡೊಂದುಲ್ಲೆರ್.