Last updated on June 15th, 2026 at 01:20 pm
ಬೆಂಗಳೂರ್, ಜೂ. 15: ದ್ರಾವಿಡ ಭಾಷಾ ಟ್ರಾನ್ಸ್ಲೇಟರ್ಸ್ ಅಸೋಸಿಯೇಷನ್ (ರಿ) ಬೆಂಗಳೂರು ಬೊಕ ‘ತೊದಲ್ನುಡಿ’ ಜೋಕುಲೆ ಪತ್ತಾಯದ ಒತ್ತು ಸೇರಿಗೆಡ್ ರಾಜಬೂಡು ಬೆಂಗಳೂರ್ದ ಶ್ರೀ ಸರಸ್ವತಿ ಎಜ್ಯುಕೇಶನ್ ಟ್ರಸ್ಟ್ ದ ಲೇಸ್ದ ಮಂಟಮೆಡ್ ಬಾರೀ ಸಂಬುರ್ಮೊಡು ಜೂನ್ಡಾ 14 ಪೋಪುನ ಐತಾರ ನಡತ್ಂಡ್.
ಅಸೋಸಿಯೇಷನ್ದ ಗುರ್ಕಾರ್ಲು ಡಾ. ಸೂಷ್ಮಾ ಶಂಕರ್ ಮೆರೆನ ಗುರ್ಕರ್ಮೆಡ್ ನಡತಿನ ಈ ಲೇಸ್ನ್ ಪುಗಾರ್ತೆದ ಚುಟುಕು ಕವಿ ಶ್ರೀ ಎಚ್. ದುಂಡಿರಾಜ್ ಉದಿಪನ ಮಂತೆರ್, ಡಾ ನಾ. ದಾ. ಶೆಟ್ಟಿ ತೊದಲ್ನುಡಿ ಜೋಕುಲೆ ಪತ್ಯಾಯ ಬುಡುಗಡೆ ಮಂತೆರ್, ಮಲ್ಲ ಬಿನ್ನೆರಾದ್, ಪುಗಾರ್ತೆದ ತಮಿಳ್ ಕವಿ ಶ್ರೀಮತಿ ವಾಧಿವಾಸಗಿ ದೇವಸಗಯಂ ಬತ್ತಿತ್ತೆರ್.
ಲೇಸ್ಡ್ ಪಂಚ ದ್ರಾವಿಡ ಭಾಷೆಲಾಯಿನ ತುಳು, ತಮಿಳ್, ತೆಲುಗು, ಮಲಿಯಾಳ, ಕನ್ನಡ ಭಾಷೆಲೆಡ್ ಕಬಿತೆ ಪನಿಯೆರೆ ತೆನ್ಕಾಯಿ ಭಾರತೊದ ಬೇತೆ ಬೇತೆ ಮೂಲೆರ್ದ್ ಸುಮಾರ್ ಜನ ಕವಿನಕ್ಲು ಬತ್ತಿತ್ತೆರ್. ತುಲುನಾಡ್ದ ಪರವಾದ್ ತುಳು ಕವಿಕುಲಾಯಿನ ಶ್ರೀಮತಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ, ಶ್ರೀಮತಿ ವಿಜಯಲಕ್ಷ್ಮೀ ಕಟೀಲ್, ಶ್ರೀಮತಿ ಅನುರಾಧ, ರಾಜೀವ್ ಸುರತ್ಕಲ್, ಶ್ರೀ ವಿಶ್ವಾಸ್ ಮಂಗಲ್ಪಾಡಿ, ಶ್ರೀಮತಿ ನಳಿನಿ ಕುಲಾಲ್, ಶ್ರೀಮತಿ ಲತಾ .ಡಿ ಮುಕುಲು ಪಾಲ್ ಪಡೆದಿತ್ತೆರ್.
ಪಂಚ ಭಾಷಿ ಕವಿ ಸಂಗಮ ಸಾಹಿತ್ಯ ಲೋಕೊಡು ಪೊಸ ದಾಖಲೆನ್ ಬರೆಂಡ್. ಲೇಸ್ಡ್ ಕವಿನಕುಲು ಒರಿಯಗೊರಿ ಪೊಲಬು ಪಟ್ಟೊಂದು, ದ್ರಾವಿಡ ಭಾಷೆಲೆನ ಸಮುದಾಯೊನು ಗಟ್ಟಿ ಮಲ್ತೊಂಡೆರ್.