Last updated on June 24th, 2026 at 09:16 am
ಬೆಂಗಳೂರ್, ಜೂನ್ 24: ರಾಜ್ಯ ಸರ್ಕಾರ ಇಂಚಿಪ ಕನತಿನ ಅಬಕಾರಿ ಸುಧಾರಣೆಲು ಬೊಕ್ಕ ಪೊಸ ದರ ಪರಿಷ್ಕರಣೆ ನೀತಿ ಸರ್ಕಾರೊಗು ಭಾರೀ ಆದಾಯ ಕನತ್ ಕೊರ್ತುಂಡು. ಕಮ್ಮಿ ಪ್ರಮಾಣೊದ ಆಲ್ಕೋಹಾಲ್ ಅಂಶ ಇತ್ತಿನ ಕೆಲ ಬಿಯರ್ ಬ್ರ್ಯಾಂಡ್ಲೆನ ಬಿಲೆನ್ ಕಮ್ಮಿ ಮಲ್ತಿತ್ತೆರ್. ಇಂದೆತ ಬೆರಿಟೇ ರಾಜ್ಯೊಡು ಬಿಯರ್ ಸೇಲ್ ಭಾರೀ ಪ್ರಮಾಣೊಡು ಎಚ್ಚ ಆತ್ಂಡ್. ಪೊಸ ರೇಟ್ ಅನುಷ್ಠಾನೊಗುಬತ್ತಿನ ಮೇ 11 ರ್ದ್ ಜೂನ್ 11 ಮುಟ್ಟ ಒಂಜಿ ತಿಂಗೊಲ್ಡು ರಾಜ್ಯೊದ ಅಬಕಾರಿ ಕಂದಾಯ ಒಟ್ಟಾಪುನವು ಶೇ 14.84 ದಾತ್ ಎಚ್ಚ ಆತ್ಂಡ್.
ದಾಖಲೆ ಬರೆಂಡ್ ಬಿಯರ್ ಕೌಂಟ್: IML ಡೌನ್
ಮೇ 11 ರ್ದ್ ಜೂನ್ 11 ಮುಟ್ಟ 54.6 ಲಕ್ಷ ಕೇಸ್ ಬಿಯರ್ ಸೇಲ್ ಆದಿತ್ತ್ದ್, ಕರಿನ ವರ್ಸೊದ ಇಂದೇ ಪೊರ್ತುದೊಟ್ಟುಗು ತೂಂಡ (35.3 ಲಕ್ಷ ಕೇಸ್) ಭಾರೀ ಸೇಲ್ ಎಚ್ಚ ಆತ್ಂಡ್. ಆಂಡ, ಈ ಪೊರ್ತುಡು ಭಾರತೊಡು ಮಲ್ಪುನ ವಿದೇಶಿ ಮದ್ಯ (IML) ಸೇಲ್ ಶೇ 0.35 ದಾತ್ ಜತ್ತ್ದ್ಂಡ್. ಕರಿನ ವರ್ಸ 54.74 ಲಕ್ಷ ಕೇಸ್ ಇತ್ತಿನ ಐಎಂಎಲ್ ಸೇಲ್ ಈ ಸರ್ತಿ 54.55 ಲಕ್ಷ ಕೇಸ್ಗ್ ಜತ್ತ್ದ್ಂಡ್. ಬಿಯರ್ ಗಲಕೆ ಎಚ್ಚ ಆತಿನೆರ್ದಾವರ ರಾಜ್ಯೊದ ಒಟ್ಟು ಅಬಕಾರಿ ಆದಾಯ ಕರಿನ ವರ್ಸೊದ 3,261.24 ಕೋಟಿ ರೂಪಾಯಿಗ್ ತೂಂಡ ಈ ಸರ್ತಿ 3,745.14 ಕೋಟಿ ರೂಪಾಯಿಗ್ ಏರ್ದ್ಂಡ್.