Last updated on July 6th, 2026 at 11:42 am
ಗುರುಗಾಂವ್, ಜು 06: ಮದಿಮೆ ಆದ್ ಕಾಲಿ ಮೂಜೇ ತಿಂಗೊಲಾದಿತ್ತಿನ ಪೊಣ್ಣನ್ ಕಂಡನೆ ಬೊಕ್ಕ ಆಯನ ಚಂಗಾಯಿ ಕೂಡೊಂದು ಭೀಕರವಾದ್ ಕೆರ್ತಿನ ಆಘಾತಕಾರಿ ನಡಪು ಹರಿಯಾಣದ ಮಾನೇಸರ್ಡ್ ನಡತ್ದ್ಂಡ್. ಮೂಜಿ ವರ್ಸೊದ ಅಕಲೆನ ಅಕ್ರಮ ಸಂಬಂಧೊಗು ತಲೆಪು ಆತಲ್ ಪನ್ಪಿ ನೆವನೊಗು ಬೊಡೆದಿನೇ ಕೆರ್ತಿನ ಕಂಡನೆ ಬೊಕ್ಕ ಆಯನ ಲವರ್ನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಬೊಡೆದಿನ್ ಚಂಗಾಯಿನ ಇಲ್ಲಗ್ ಲೆಪ್ಪುಡಾದ್ ಅಲ್ಪನೇ ಇರ್ವೆರ್ ಕೂಡೊಂದು ಆಲೆನ್ ಕೆರ್ದಿತ್ತೆರ್.
ಪ್ರಕರಣ ತೆರಿದ್ ಬತ್ತಿನಿ ಎಂಚ?
ಕರಿನ ಫೆಬ್ರವರಿಡ್ ಮಾನೇಸರ್ ನಿವಾಸಿ ಅಂಕಿತ್ (25) ಪನ್ಪಿನಾಯಗ್ 22 ವರ್ಸೊದ ಜವನ್ದಿ ನ್ ಕೊರ್ದು ಮದಿಮೆ ಮಲ್ತಿತ್ತೆರ್. ಆಂಡ, ಮೇ 21 ತಾನಿ ಆಲ್ ಒರರ್ದ್ ಒರಾನೆ ನಾಪತ್ತೆ ಆತಲ್. ಕಂಡನ್ಯನ ಇಲ್ಲದಕಲೆರ್ದ್ ಸಮಗಟ್ಟ್ ಪ್ರತಿಕ್ರಿಯೆ ತಿಕ್ಕಂದಿನಪಗ, ಪೋಡಿದ್ ಪೊಣ್ಣನ ಅಪ್ಪೆ ಮೇ 22 ತಾನಿ ಪೊಲೀಸೆರೆಡ ಒಯಿಲ್ ಬರೆಪಾದೆರ್. ಪೊಲೀಸೆರ್ ಜಡ್ತೆ ಮಲ್ಪುನಗ ಮೇ 22 ತಾನಿಯೇ ಮಾನೇಸರ್ದ ಬಾಡಾಯಿದ ಅದೆಟ್ ಪೊಣ್ಣನ ಪುನ ತಿಕ್ಕ್ದ್ಂಡ್. ಆಲೆನ್ ಬೆಡಿ ದಕ್ಕ್ದ್ ಕೆರ್ತಿನ ಮರಣೋತ್ತರ ಪರೀಕ್ಷೆಡ್ ದೃಢ ಆತ್ಂಡ್.
3 ವರ್ಸೊದ ಅಕ್ರಮ ಸಂಬಂಧ: ಪಾನ್-ಪುಗ್ಗೆರೆದ ಅಂಗಡಿ ನಡಪಾವೊಂದಿತ್ತಿನ ಅಂಕಿತ್ ಬೊಕ್ಕ ಬ್ಯೂಟಿ ಪಾರ್ಲರ್ಡ್ ಬೇಲೆ ಮಲ್ತೊಂದಿತ್ತಿನ ರಜನಿ ದೇವಿ (38) ಕರಿನ 3 ರ್ಸೊರ್ದಿಂಚಿ ಮೋಕೆ ಮಲ್ತೊಂದಿತ್ತೆರ್.
ರಜನಿನ ಬಾಡಾಯಿದ ಅದೆಟೇ ಇರ್ವೆರ್ ಕೂಡೊಂದು ಕೆರ್ಯೆರ ಸ್ಕೆಚ್ ಪಾಡ್ದೆರ್. ಐಕ್ ಬೋಡಾದೇ ರಡ್ಡ್ ತಿಂಗೊಲುಗು ದುಂಬೇ ಉತ್ತರ ಪ್ರದೇಶೊರ್ದು ಗನ್ ಗೆತೊಂದಿತ್ತೆರ್. ಮೇ 21 ತಾನಿ ಬೊಡೆದಿನ್ ನಂಬಾದ್ ಚಂಗಾಯಿ ರಜನಿನ ರೂಮ್ಗ್ ಲೆತೊಂದು ಬತ್ತಿನ ಅಂಕಿತ್, ಇರ್ವೆರ್ ಕೂಡೊಂದು ಆಲೆನ್ ಶೂಟ್ ಮಲ್ತ್ದ್ ಕೆರ್ತೆರ್.
ನೇಪಾಳಗ್ ಪದ್ರಾಡ್, ಕಡೇಕ್ಲಾ ತಿಕ್ಕ್ದ್ ಬೂರ್ಯೆರ್
ಕೆರಿಬೊಕ್ಕ ತಿಕ್ಕ್ದ್ ಬೂರುನ ಪೋಡಿಗೆಡ್ ಅಂಕಿತ್ ಬೊಕ್ಕ ರಜನಿ ಸುರುಕು ಹರಿದ್ವಾರಗ್ ಪೋತೆರ್, ಅಲ್ಪರ್ದ್ ನೇಪಾಳಗ್ ಪದ್ರಾಡಾತೆರ್. ಸುಮಾರ್ ಒಂಜಿ ತಿಂಗೊಲು ಕಾಲ ದೆಂಗ್ತಪ್ಪಾದ್ ಇತ್ತಿನ ಆರೋಪಿಲು ಜೂನ್ 30 ದಾನಿ ಭಾರತೊಗು ಪಿರ ಬೈದೆರ್. ಈ ಬಗೆಟ್ ಪತ್ತ ಒಲವು ಇತ್ತ್ದ್ ದಾಳಿ ಮಲ್ತಿನ ಕ್ರೈಂ ಬ್ರಾಂಚ್ ಪೊಲೀಸೆರ್ ಇರ್ವೆರೆನ್ಲಾ ಮಾನೇಸರ್ಡ್ ಪತ್ತ್ದೆರ್.
ಇತ್ತೆ ಕೋರ್ಟ್ ಆರೋಪಿಲೆನ್ 5 ದಿನೊಕು ಪೊಲೀಸ್ ಕಸ್ಟಡಿಗ್ ಒಪ್ಯಾದ್ಂಡ್.