Last updated on July 21st, 2026 at 11:26 am
ಕುಡ್ಲ, ಜು.21: ಕರ್ನೂಲ್ ಜಿಲ್ಲೆದ ಮಂತ್ರಾಲಯೊದ ಕೈತಲ್ ಅಂಗಾರೆ ಪುಲ್ಯಾನಗ (ಜುಲೈ 21) ನಡತಿನ ಭೀಕರ ಎಡ್ತೆಡ್ ಕುಡ್ಲ ಮೂಲೊದ ಹಾಪ್ಕಾಮ್ಸ್ ಪ್ರಧಾನ ವ್ಯವಸ್ಥಾಪಕೆ (ಜಿಎಂ), ಯಕ್ಷದ್ರುವ ಪಟ್ಲ ಫೌಂಡೇಷನ್ದ ಜತೆ ಕಾರ್ಯದರ್ಶಿ ರವಿಶೆಟ್ಟಿ (43) ಅಲ್ಫನೇ ತೀರ್ದೆರ್.
ರವಿಶೆಟ್ಟಿ ಮೇರ್ ಆರೆನ ಮೂವೆರ್ ದೋಸ್ತಿಯರ್ಲೆನ ಒಟ್ಟುಗು ಕುಡ್ಲರ್ದ್ ಮಂತ್ರಾಲಯೊದ ಶ್ರೀ ರಾಘವೇಂದ್ರ ಸ್ವಾಮಿಲೆನ ದರ್ಶನೊಗು ಕಾರ್ಡ್ ಪೋವೊಂದಿತ್ತೆರ್. ಪುಲ್ಯ ಮಂತ್ರಾಲಯೊದ ರಾಷ್ಟ್ರೀಯ ಪೆರ್ಸಾದಿಡ್ ಡ್ರೈವರ್ನ ಅಂಕೆ ತತ್ತಿನ ಕಾರ್, ಸಾದಿ ಬರಿತ ಕಲ್ವರ್ಟ್ (ಡಿವೈಡರ್) ಗ್ ಜೋರುಡು ಎಡ್ತ್ದ್ಂಡ್. ಎಡ್ತಿನ ಬರಸ್ಗ್ ಕಾರ್ ಅಲಕ್ಕ ಞಕ್ಕೆ ಆದಿತ್ತ್ದ್, ಪಾಕ ನೆತ್ತೆರ್ ಪೋದು ರವಿಶೆಟ್ಟಿ ಅಲ್ಪನೇ ತೀರ್ದೆರ್.
ದಕ್ಷ ಅಧಿಕಾರಿ ಆದಿತ್ತಿನ ರವಿಶೆಟ್ಟಿ ಮೇರ್ ಅತ್ತಂದಿ ಪ್ರಾಯೊಡು ಅಗತಿನೆಕ್ ಹಾಪ್ಕಾಮ್ಸ್ ಸಿಬ್ಬಂದಿ ಬೊಕ್ಕ ಬಂಧುಲು ಬಾರೀ ಸಂತಾಪ ತೂಪಾದೆರ್.
ಮೂವೆರೆಗ್ ಗಾತಿದ ಗಡಿಕುಲು:
ಕಾರ್ಡ್ ಇತ್ತಿನ ಪ್ರದೀಪ್ ಆಳ್ವ, ಪುರುಷೋತ್ತಮ ಭಂಡಾರಿ ಬೊಕ್ಕ ಸಿಎ ಸುಧೇಶ್ ರೈ ಮೊಕಲೆಗ್ ಗಾತಿದ ಗಡಿಕುಲಾತ. ಎಡ್ತೆ ನಡತಿನೇ ಕೈತಲ್ದಕುಲು ಬತ್ತ್ದ್, ಕಾರ್ಡ್ ತಿಕ್ದ್ ಬೂರೊಂದಿನಕಲೆನ್ ಪಿದಯಿ ದೆತ್ತ್ದೆರ್. ಇತ್ತೆ ಗಡಿಕುಲಾತಿನ ಮೂವೆರೆನ್ ಎಚ್ಚಿಗೆ ಮರ್ದ್ಗ್ ಎಮ್ಮಿಗನೂರು ಸರ್ಕಾರಿ ಆಸ್ಪತ್ರೆಗ್ ದಾಕಲ್ತ್ದೆರ್.
ವಿಷಯ ತೆರಿನನೇ ಅಲ್ಪದ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಎಡ್ತೆಗ್ ಡ್ರೈವರ್ ಅಂಕೆ ತತ್ತಿನನೇ ನೆವನೊನಾ ಅತ್ತ್ ಬೇತೆ ದಾಲ ತಾಂತ್ರಿಕ ದೋಷ ಇತ್ತ್ಂಡಾ ಪನ್ಪಿ ಬಗೆಟ್ ಪೋಲಿಸೆರ್ ಜಡ್ತೆ ಮಲ್ತೊಂದುಲ್ಲೆರ್.