Last updated on July 23rd, 2026 at 06:20 am
ಬಂಟ್ವಾಳ, ಜು 23: ಬರಿಮಾರ್ ಕೈತಲ್ದ ಕಲ್ಲೆಟ್ಟಿ ಶ್ರೀ ಕಾನಲ್ತಾಯ ದೈವಸ್ಥಾನೊದ ಕೈತಲ್ ಬುಧವಾರ ಬಯ್ಯಡ್ ಪೋವೊಂದಿತ್ತಿನ ಶಾಲೆದ ಬಸ್ದ ಮಿತ್ತ್ ನೇಲ್ಯ ಮರ ಒಂಜಿ ಬೂರ್ನೆರ್ದಾವರ ಯುಕೆಜಿ ಕಲ್ತೊಂದಿತ್ತಿನ ಪೊಣ್ಣು ಬಾಲೆ ತೀರ್ದಿತ್ತ್ದ್, ಇರ್ವೆರೆಗ್ ಗಾತಿದ ಗಡಿಕುಲಾತ.
ತೀರ್ದಿನ ಪೊಣ್ಣನ್ ಪೆರ್ನೆ ನಿವಾಸಿ ಚಂದ್ರಶೇಖರ್ ಮೆರೆನ ಮಗಲ್, ಕಲ್ಲಡ್ಕದ ಶ್ರೀ ರಾಮ ಶಾಲೆದ ವಿದ್ಯಾರ್ಥಿನಿ ಚಿರನ್ವಿ (5) ಪನ್ದ್ ಗುರ್ತ ಪತ್ತ್ದೆರ್. ಪ್ರಾಥಮಿಕ ವರದಿಲೆನ ಪ್ರಕಾರ, ಬೇತೆ ನಾಲ್ ಜೋಕುಲೆಗ್ ಗಡಿಕುಲಾದಿತ್ತ್ದ್, ಅಕಲೆನ್ ಆಸ್ಪತ್ರೆಗ್ ದಾಕಲ್ತ್ದೆರ್.
ಶಾಲೆ ಬುಡ್ದು ಜೋಕುಲೆನ್ ಇಲ್ಲಗ್ ಲೆತೊಂದು ಪೋನಗ ಈ ದುರಂತ ನಡತ್ದ್ಂಡ್. ಜೋರು ಬೀಜಿನ ಗಾಳಿ ಬೊಕ್ಕ ಭಾರೀ ಬರ್ಸೊರ್ದಾವರ ಸಾದಿದ ಬರಿತ ನೇಲ್ಯ ಮರ ಒರರ್ದ್ ಒರಾನೆ ಬಸ್ದ ಮಿತ್ತ್ ಬೂರ್ದಿತ್ತ್ದ್, ಅಯಿತ ಎದುರು ಮೆಯಿ ಞಕ್ಕೆ ಆತ್ಂಡ್.
ಮರ ಬೂರಿನೇ, ಕೈತಲ್ದಕುಲು ಬತ್ತ್ದ್, ರಕ್ಷಣಾ ಕಾರ್ಯಾಚರಣೆ ಸುರು ಮಲ್ತ್ದ್, ಜೋಕುಲೆನ್ ಞಕ್ಕೆ ಆತಿನ ಗಾಡಿರ್ದ್ ಪಿದಯಿ ದೆತ್ತ್ದೆರ್. ಗಾತಿದ ಗಡಿ ಆದಿತ್ತಿನ ಚಿರನ್ವಿನ್ ಅಪಗನೇ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಮರ್ದ್ ಪಲಿಪಂದೆ ಬಾಲೆ ತೀರ್ದಲ್.
ಗಡಿಕುಲಾತಿನ ಜೋಕುಲೆನ್ ಕೈತಲ್ದಕುಲು ಬೊಕ್ಕ ತುರ್ತ ಗಾಡಿಲೆನ ಸಕಾಯೊಡು ಪುತ್ತೂರ್ ಬೊಕ್ಕ ತುಂಬೆದ ಪ್ರೈವೇಟ್ ಆಸ್ಪತ್ರೆಲೆಗ್ ಲೆತೊಂದು ಪೋತೆರ್.
ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸಿಬ್ಬಂದಿ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದ್ ಎಚ್ಚಿಗೆ ಒಲವು ಒಟ್ಟು ಮಲ್ತ್ದೆರ್. ಸುಗಮ ಸಂಚಾರೊಗು ಅನು ಮಲ್ತ್ ಕೊರ್ಯೆರ ಬೂರ್ದಿನ ಮರೊನು ದೆಪ್ಪುಡಾದಿತ್ತ್ದ್, ಪ್ರಕರಣೊದ ಬಗೆಟ್ ಎಚ್ಚಿಗೆ ಜಡ್ತೆ ನಡತೊಂದುಂಡು.