Last updated on July 23rd, 2026 at 08:32 am
ಬೆದ್ರ, ಜು. 22: ಪೇಂಟೆದ ಮುಖ್ಯ ಸಾದಿಡ್ ಬುಧವಾರ ಬಯ್ಯಡ್ ರಿಕ್ಷಾ ಕಬ್ಬೆ ಬೂರ್ದು ಕೊಡಂಗಲ್ಲ್ ವೇಣುಗೋಪಾಲ ಕಾಲನಿ ನಿವಾಸಿ, ನಿವೃತ್ತ ಶಿಕ್ಷಕೆ ಜಿ.ಕೆ. ಭಟ್ ಗಾತಿದ ಗಡಿಕುಲಾದ್ ಮರ್ದ್ ಪಲಿಪಂದೆ ತೀರ್ದೆರ್.
ಜಿ.ಕೆ. ಭಟ್ ಆರೆನ ಕೊಡಂಗಲ್ಲ್ದ ಇಲ್ಲರ್ದ್ ಬೆದ್ರಗ್ ರಿಕ್ಷಾಡ್ ಬರೊಂದುಪ್ಪುನಗ ಈ ದುರಂತ ನಡತ್ದ್ಂಡ್. ಪೇಂಟೆದ ರತನ್ ಗ್ಯಾರೇಜ್ದ ಎದುರುದ ಸಾದಿಯೆ ರಿಕ್ಷಾ ಪೋವೊಂದುಪ್ಪುನಗ, ಒರರ್ದ್ ಒರಾನೆ ಉಲಸಾದಿರ್ದ್ ಮುಖ್ಯ ಸಾದಿಗ್ ಬತ್ತಿನ ಬೈಕ್ ಒಂಜೆನ್ ತಪ್ಪಾಯೆರ ರಿಕ್ಷಾ ಡ್ರೈವರ್ ತೂತೆರ್. ಈ ಪೊರ್ತುಡು ಅಂಕೆ ತತ್ತಿನ ರಿಕ್ಷಾ ಕಬ್ಬೆ ಬೂರ್ದಿತ್ತ್ದ್, ರಿಕ್ಷಾದ ಅಡಿಟ್ ತಿಕೊಂದಿನ ಜಿ.ಕೆ. ಭಟ್ರೆನ ತರೆ ಬೊಕ್ಕ ಸರ್ರೊಗು ಗಾತಿದ ಗಡಿಕುಲಾತ.
ಅಪಗನೇ ಆರೆನ್ ಆಸ್ಪತ್ರೆಗ್ ದಾಕಲ್ತ್ದ್ ಮಾತ ಮರ್ದ್ ಮಲ್ತ್ಂಡಲಾ, ಗಾತಿದ ಗಡಿಕುಲಾದಿತ್ತಿನ ಆರ್ ಮರ್ದ್ ಪಲಿಪಂದೆ ತೀರ್ದೆರ್.
ತೀರ್ದಿನ ಜಿ.ಕೆ. ಭಟ್ರ್ ಕುಡ್ಲದ ಬೆಂಗ್ರೆ ಹೈಸ್ಕೂಲ್ಡ್ ಪಾಕ ಸಮೆ ಶಿಕ್ಷಕೆರಾದ್ ಬೇಲೆ ಮಲ್ತ್ದ್ ರಿಟೈರ್ ಆದಿತ್ತೆರ್. ಬೊಕ್ಕ ರಾಷ್ಟ್ರೀಯ ಸ್ವಯಂಸೇವಕ ಸಂಘೊದ (RSS) ಸಕ್ರಿಯ ಕಾರ್ಯಕರ್ತೆರಾದ್ ಸಮಾಜ ಸೇವೆಡ್ ಪಾಲ್ಪಡೆಪೆದೆರ್. ವಿಶೇಷ ಪನ್ಡ, ಗುರುವಾರ ಆರ್ ತಿರುಪತಿ ಕ್ಷೇತ್ರ ದರ್ಶನೊಗು ಪೋವರೆ ಮಾತಾ ಅಟ್ಟನೆ ಮಲ್ತ್ದ್ ದೀದಿತ್ತೆರ್. ಆರ್ ಬೊಡೆದಿ ಬೊಕ್ಕ ಒರ್ತಿ ಮಗಲೆನ್ ಅಗತ್ದೆರ್. ನಡಪುದ ಬಗೆಟ್ ಬೆದ್ರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.