Last updated on August 19th, 2026 at 02:56 pm
ತುಳುನಾಡ್ಡ್ ತುಳು ಭಾಷೆ, ತುಳು ಸಂಸ್ಕೃತಿನ್ ಕೇಂದ್ರೀಕೃತವಾದ್ ನಡಪುನ ಕಾರ್ಯಕ್ರಮೊಲು ಬಾರೀ ಅಪರೂಪ. ಅಂಚಾದ್ ತುಳುನಾಡ್ಡ್ ಪ್ರತಿವರ್ಸೊಲಾ ತುಳು ಕೇಂದ್ರೀಕೃತವಾದ್ ಒಂಜಿ ಲೇಸ್ ಮನ್ಪೊಡು, ತುಳುತ ವಿಷಯೊಲು ಇಪ್ಪೊಡು, ತುಳುಪರ ಬಿನ್ನೆರ್ ಬತ್ತ್ದ್ ತುಳುಟು ಪಾತೆರಕತೆ ಆವೊಡು, ತುಳುನಾಡ್ ಡ್ ತುಳು ಭಾಷೆನ್ ಮಿತ್ತ್ ದೀದ್ ಒಂಜಿ ಲೇಸ್ ಮನ್ಪೊಡು ಪನ್ಡ್ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ (ರಿ.) ಪುನೆಯೊಂದುಂಡು.
ತುಳುಪರ ಬೇಲೆಲೆನ್ ಮಲ್ತೊಂದುಪ್ಪುನ ಫೌಂಡೇಶನ್ ಈ ವರ್ಸ ‘ತುಳುವ ಜವನೆರೆ ಆಯನೊ ತುಳುನಾಡ್ ಕಾನ್ಕ್ಲೇವ್-2026’ ಪನ್ಪಿ ಲೇಸ್ನ್ ಆಗಸ್ಟ್ 23 ತಾನಿ ಮುಲ್ಕಿ ಕಾರ್ನಾಡ್ದ ಸರಕಾರಿ ಪದವಿ ಪೂರ್ವ ಕಾಲೇಜ್ದ ಸಭಾಂಗಣೊಡು ಕಾಂಡೆ 10 ರ್ದ್ ಬಯ್ಯ 5 ಮುಟ್ಟ ಅಟ್ಟನೆ ಮಲ್ದ್ಂಡ್.
ತುಳು ಅಪ್ಪೆಲ್ಲೆ ಮದಿಪುದ ಕಲ – ತುಳು ತಮೆರಿ ಮದಿಪುದ ಕಲ
ತುಳು ಅಪ್ಪೆಲ್ಲೆ ಮದಿಪುದ ಕಲ ಬೊಕ್ಕ ತುಳು ತಮೆರಿ ಮದಿಪುದ ಕಲ ಪನ್ಪಿ ರಡ್ಡ್ ನಿಲವುಡು ನಡಪುನ ಕಾಂಡೆದ ಲೇಸ್ಡ್, ಸುರುತ ನಿಲವು ಕಾಂಡೆ 10 ರ್ದ್ 11:30 ಮುಟ್ಟದ ತುಳು ಅಪ್ಪೆಲ್ಲೆ ಮದಿಪುದ ಕಲಟ್ ನಿಟ್ಟೆ ಡಾ. ಎನ್ಎಸ್ಎಎಮ್ ಕಾಲೇಜ್ದ ಭಾಷಾ ವಿಭಾಗೊದ ಸಹ ಪ್ರಾಧ್ಯಾಪಕೆರ್ ಶ್ರೀಮತಿ ಶ್ವೇತಾ ಭರತ್ ಮೇರ್ ‘ಪರತಿರಿಕ್ ಸೇರಿನ ತುಳುವ ಬೀರೆರ್- ನಮ ತೆರಿಯೊಡಾಯಿನ ಅಪ್ಪೆಲ್ಲೆನ ಕತೆ’; ನಿಟ್ಟೆದ ಡಾ| ಕೆ. ಆರ್. ಶೆಟ್ಟಿ ತುಳು ಅಧ್ಯಯನ ಕೇಂದ್ರೊದ ಮುಖ್ಯಸ್ಥೆರ್ ಡಾ| ಸಾಯಿಗೀತಾ ಹೆಗ್ಡೆ ಮೇರ್ ‘ತುಳುನಾಡ ಪರಿಪುದ ಪೊಲಬು’; ಮಂಗಳೂರು ವಿಶ್ವವಿದ್ಯಾಲಯೊದ ತುಳು ಸ್ನಾತಕೋತ್ತರ ವಿಭಾಗೊದ ಉಪನ್ಯಾಸಕೆರ್ ಶ್ರೀಮತಿ ಜಯಲಕ್ಷ್ಮೀ ಆರ್. ಶೆಟ್ಟಿ ಮೇರ್ ‘ಬೆರ್ಮೆರ್ ಬೊಕ್ಕ ಲೆಕ್ಕೆಸಿರಿ’ ಪನ್ಪಿ ವಿಷಯೊಡು ಪಾತೆರ್ಯೆರೆ ಉಲ್ಲೆರ್. ಅವೆರ್ದ್ ಬೊಕ್ಕದ ನಿಲವು ಕಾಂಡೆ 11:30 ರ್ದ್ 1 ಗಂಟೆ ಮುಟ್ಟದ ತುಳು ತಮೆರಿ ಮದಿಪುದ ಕಲಟ್ ಮುಲ್ಕಿ ಸರಕಾರಿ ಪದವಿ ಪೂರ್ವ ಕಾಲೇಜ್ದ ಪ್ರಾಶುಪಾರೆರ್ ಅಂಚೆನೇ ತುಳು ಸಂಶೋಧಕೆರ್ ಡಾ. ವಾಸುದೇವ ಬೆಳ್ಳೆ ಮೇರ್ ‘ತುಳುನಾಡ ನೆಲಮೂಲ ಸಂಸ್ಕೃತಿ ಪರಂಪರೆದ ಸ್ಥಾನಪಲ್ಲಟೊಲು’; ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್(ರಿ.)ದ ಭಾಷಾಶಾಸ್ತ್ರ ಬೊಕ್ಕ ಸಂಶೋಧನೆ ವಿಭಾಗೊದ ಸಂಚಾಲಕೆರ್ ಶ್ರೀ ನಿಶಾಂತ್ ರತ್ನಾಕರ್ ಮೇರ್ ‘ತುಳುಲಿಪಿತ ಬುಲೆಚ್ಚಿಲ್ದ ಪಜ್ಜೆಲು, ಪೊಸದೇಕಿ ಬೊಕ್ಕ ಪುನರುತ್ಥಾನೊದ ತಾದಿ’; ಬೊಕ್ಕ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್(ರಿ.) ದ ಸ್ಥಾಪಕೆರ್ ಶ್ರೀ ಮಹಿ ಮುಲ್ಕಿ ಮೇರ್ ‘ತುಳುನಾಡ ಇತಿಹಾಸೊಡು ಮುಲ್ಕಿ ಸೀಮೆದ ಸಾಂಸ್ಕೃತಿಕ ಬೊಕ್ಕ ರಾಜಕೀಯ ಪ್ರಭಾವೊಲು’ ವಿಷಯೊದ ಬಗೆಟ್ ಪಾತೆರುವೆರ್. ಇಂದೆತ ಬೆರಿಟೇ ಕುಡ್ಲದನೇ ಒಂಜಿ ಸ್ಟಾರ್ಟಪ್ ROAVAI ಮೊಕುಲು ಉಂಡು ಮಲ್ದಿನ ತುಳು ಅಚ್ಚರೊಲೆಗ್ ಸೊರ ಕೊರ್ಪಿನ ತಂತ್ರಾಂಶ ‘DHVANI- AI : Text to Speech for Tulu’ತ ತೂಪರಿಕೆ ನಡಪುಂಡು.
ಕಂಗುಲು- ಕರಕಗೋಲು ಡಾಕ್ಯುಮೆಂಟರಿ ಪ್ರದರ್ಶನ
ಮದ್ಯಾಹ್ನ 1-45ರ್ದ್ 3-30 ಮುಟ್ಟ ತುಳುವೆರೆ ಅವ್ಯಕ್ತ ಲೋಕೊಗೊಂಜಿ ಸುತ್ತು ಪಾಡ್ಪಾವುನ, ಮಾಯಿಲು ಫಿಲಂಸ್ ಬೊಕ್ಕ ಕಡಲ್ ಸ್ಟುಡಿಯೋಸ್ ಮೊಕಲೆನ ‘ಕಂಗುಲು- ಕರ್ಂಗೋಲು- ಒಂಜೇ ಒಸರ್ದ ರಡ್ಡ್ ದಂಡ್ಲು’ ಸಾಕ್ಷ್ಯಚಿತ್ರೊದ ಪ್ರದರ್ಶನ ನಡಪುಂಡು.
ತುಳುವಾಲ ಕುಲಸಿರಿ ಮಾನಾದಿಗೆ
ಬಯ್ಯ 3-30 ರ್ದ್ 5 ಮುಟ್ಟ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಗುರ್ಕಾರ್ಲು ಶ್ರೀ ನಿಶ್ಚಿತ್ ಜಿ ರಾಮಕುಂಜ ಮೆರೆನ ಗುರ್ಕಾರ್ಮೆಡ್ ನಡಪುನ ಸೊಲ್ಮೆದ ಕಲಟ್ ಶ್ರೀ ದಿನೇಶ್ ಸುವರ್ಣ ರಾಯಿ ಮೇರ್ ಗೇನೊದ ಮಾನಿಯಾದ್ ಬತ್ತ್ದ್ ಮದಿಪುದ ಪಾತೆರ ಪಾತೆರ್ರೆ ಉಲ್ಲೆರ್. ಈ ಲೇಸ್ಡ್ ಪಾಕ ವರ್ಸೊರ್ದಿಂಚಿ ಈ ಪರಿಸರೊಡೆ ದೈವೊಲೆನ ಚಾಕಿರಿ ಮಲ್ತೊಂದು ಬೈದಿನ ಶ್ರೀ ಶೀನ ಪಾತ್ರಿ ನಂದಿಕೂರ್ ಮೆರೆಗ್ ‘ತುಳುವಾಲ ಕುಲಸಿರಿ’ ಪನ್ಪಿ ಬಿರ್ದ್ ಕೊರ್ದು ಮಾನಾದಿಗೆ ನಡಪರೆ ಉಂಡು.
ಐನ್ ತುಳು ಪುಸ್ತಕೊಲು ಬುಡುಗಡೆ
ಈ ಲೇಸ್ಡ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಅಂಗಸಂಸ್ಥೆ ಪುಣ್ಣಮೆ ಪಬ್ಲಿಕೇಶನ್ದ 5 ಮಸ್ತಿರೆಲು ಬುಡುಗಡೆ ಆವೊಂದುಲ್ಲ. ಬುಡುಗಡೆ ಆವೊಂದುಪ್ಪುನ ಮಸ್ತಿರೆಲು
1. ಬೀರದ ಬೊಲ್ಪು (ಮಂದಾದ ಕೇಶವ ಭಟ್)
2. ಅಪ್ಪೆ (ತುಳು ಬರವುಲೆನ ಸಂಕಲನ)
3. ಕಾಂತಬಾರೆ ಬೂದಬಾರೆ (ಒಂಜಿ ಸಮಗ್ರ ಅಧ್ಯಯನ),
4. ವಜ್ರದಾರಗೆ (ಹರ್ಷ ತುಳುನಾಡ್)
5. ಜೀಟಿಗೆ (ತುಳು ಲಿಪಿ ಕಲ್ಪುನ ಮಸ್ತಿರೆ)
ಅಂಚೆನೇ ತುಳುನಾಡ್ ಕಾನ್ಕ್ಲೇವ್ದ ಲೆಕ್ಕೊಡು ಇದಮುಟ್ಟ ನಡತಿನ ಪಂತೊಲೆಗ್ ಇನಾಮು ಪಟ್ಟುನ ಕಜ್ಜೊ ಈ ಲೇಸ್ಡ್ ನಡಪುಂಡು.
ಪಿರಾಕ್ದ ಸೊತ್ತುಲೆನ ತೂಪರಿಕೆ
ಕಾಂಡೆರ್ದ್ ಬಯ್ಯಮುಟ್ಟ ನಡಪುನ ಈ ತುಳುವೆರೆ ಆಯನೊಡು ಪಿರಾಕ್ದ ಸೊತ್ತುಲೆನ ತೂಪರಿಕೆಲಾ ನಡಪುಂಡು. ಆಯಿನಾತ್ ಎಚ್ಚಿನ ಸಂಖ್ಯೆಡ್ ತುಳುವೆರ್ ಬತ್ತ್ದ್ ಈ ಲೇಸ್ಡ್ ಪಾಲ್ಪಡೆದ್ ಗೆಂದಾದ್ ಕೊರೊಡು ಪನ್ದ್ ಸಂಘಟಕೆರ್ ಬಿನ್ನೈತೊಂದೆರ್.