Last updated on August 26th, 2026 at 08:25 am
ಒಡಿಪು, ಆ. 26: ತೆಂಕಪೇಂಟೆದ ಶ್ರೀಲಕ್ಷ್ಮೀವೆಂಕಟರಮಣ ದೇಲಂತಡೆದ ಕೆರೆಟ್ ಮುರ್ಕ್ದ್ 15 ವರ್ಸ ಪ್ರಾಯೊದ ಆಣ್ ಒರಿ ತೀರ್ದಿನ ದುರಂತ ನಡಪು ಕೋಡೆ ಮಧ್ಯಾಹ್ನ ನಡತ್ದ್ಂಡ್.
ಬೆಳ್ಳಂಪಳ್ಳಿ ಕುಕ್ಕಿಕಟ್ಟೆದ ಕೃಷ್ಣ ನಾಯಕ್ ಪನ್ಪಿನಾರೆನ ಮಗೆ ಆದಿತ್ಯ ನಾಯಕ್ (15) ತೀರ್ದಿನ ಆಣ್. ದೇಲಂತಡೆಡ್ ಭಜನೆ ಕಾರ್ಯಕ್ರಮ ನಡತೊಂದಿತ್ತಿನೆರ್ದಾವರ ಆದಿತ್ಯೆ ತನ್ನ ಸಂಬಂಧದಾರೆನ ಒಟ್ಟುಗು ದೇಲಂತಡೆಗ್ ಬತ್ತಿತ್ತೆಗೆ.
ಭಜನಾ ಕಾರ್ಯಕ್ರಮೊದ ಲೆಕ್ಕೊಡು ಭಕ್ತೆರ್ ಕೆರೆಟ್ ಮೀಂದೊಂದುಪ್ಪುನಗ ಆದಿತ್ಯೆಲಾ ನೀರ್ಗ್ ಜತ್ತ್ದೆ. ಆಯನ ಒಟ್ಟುಗಿತ್ತಿನಾಯಗ್ ಮೀಂದ್ಯೆರೆ ಬರಂದಿನೆರ್ದಾವರ ಆಯೆ ಅಲ್ಪನೇ ಕರೆಟ್ ಉಂತುದಿತ್ತೆ. ಕೆರೆತ ನಡುಟು ಮೀಂದೊಂತ್ತಿನ ಆದಿತ್ಯೆ ಅಕಸ್ಮಿಕವಾದ್ ನೀರ್ಡ್ ಮುರ್ಕ್ದ್ ನಾಪತ್ತೆ ಆದಿತ್ತೆ.
ನಡಪುದ ಬಗೆಟ್ ತೆರಿಲೆಕನೇ ದೇಲಂತಡೆದ ಆಡಳಿತ ಮಂಡಳಿದಕುಲು ಮುರ್ಕು ತಜ್ಞೆ ಈಶ್ವರ ಮಲ್ಪೆ ಮೆರೆಗ್ ಒಲವು ಕೊರ್ತೆರ್. ಜಾಗೆಗ್ ಬತ್ತಿನ ಈಶ್ವರ ಮಲ್ಪೆ ಬೊಕ್ಕ ಕೂಟೊದಕುಲು ಕೆರೆಕ್ ಜತ್ತ್ದ್ ಕಾರ್ಯಾಚರಣೆ ಮಲ್ತ್ದ್ ಆದಿತ್ಯನ್ ಮಿತ್ತ್ ಕನತ್ದೆರ್. ಆಪಗನೇ ಆಯನ್ ಒಡಿಪುದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಪರೀಕ್ಷೆ ಮಲ್ತಿನ ಡಾಕ್ಟರ್ ಆಯೆ ತೀರ್ದೆ ಪನ್ದ್ ದೃಢ ಮಲ್ತ್ದೆರ್.