Last updated on October 10th, 2026 at 01:21 pm
ಮುಲ್ಕಿ : ತುಳುವ ಮಹಾಸಭೆ ಮುಲ್ಕಿ ವಲಯ ಬೊಕ್ಕ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಒಟ್ಟುಸೇರಿಗೆಡ್ ಮುಲ್ಕಿ ಸರಕಾರಿ ಪದವಿ ಪೂರ್ವ ಕಾಲೇಜ್‌ಡ್ ತುಳು ಪಜ್ಜೆ ಬೊಕ್ಕ ವಿಶ್ವ ತುಳು ಲಿಪಿ ದಿನಾಚರಣೆದ ಶುಕ್ರವಾರ ನಡತ್ಂಡ್.
ವಿಶ್ವ ತುಳು ಲಿಪಿ ದಿನಾಚರಣೆ” ಕಾರ್ಯಕ್ರಮೊದ ಉದಿಪನ ಮಲ್ತಿನ ಮುಲ್ಕಿ ಸರಕಾರಿ ಪದವಿ ಪೂರ್ವ ಕಾಲೇಜ್‌ದ ಪ್ರಾಂಶುಪಾಲೆರಾಯಿನ ಡಾ. ವಾಸುದೇವ ಬೆಳ್ಳೆ ಪಾತೆರ್ದ್ ತುಳು ಭಾಷೆಗ್ ತನ್ನನೇ ಆಯಿನ ಪ್ರಾಮುಖ್ಯತೆ ಉಂಡು, ತುಳು ಲಿಪಿಕ್ ತನ್ನನೇ ಆಯಿನ ಪರಂಪರೆ ಉಂಡು, ಅವೆತ ಅಭಿವೃದ್ಧಿಗ್ ಗುಮನ ಕೊರೊಡು ಪನ್ದ್ ಪನ್ಡೆರ್.
ಮಲ್ಲ ಬಿನ್ನೆರಾದ್ ತುಳು ವರ್ಲ್ಡ್ ಫೌಂಡೇಶನ್, ಕಟೀಲ್‌ದ ಗುರ್ಕಾರ್ದಿ ಭಾನುಮತಿ ಶೆಟ್ಟಿ ಕಕ್ವಗುತ್ತು, ಪಾತೆರ್ದ್ ತುಳು ಭಾಷೆಗ ಸರಕಾರ ಕೊರ್ತಿನ ಮಾನ್ಯತೆನ್ ಸಾಕಾರ ಮಲ್ಪೆರ ಪುನೆಯೊಡು, ತುಳು ಒರಿಪಾದ್ ಬುಲೆಪಾಗ ಜೋಕುಲು ಒಟ್ಟಾದ್ ತುಳು ಲಿಪಿತ ಅಧ್ಯಯನ ಮಲ್ತ್‌ದ್ ಸಾದಗೊ ಬೆನೊಡು ಪನ್ದ್ ಪನ್ಡೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ತುಳು ಲಿಪಿ ನಿರ್ದೇಶಕೆರ್ ನಿಶಾಂತ್ ರತ್ನಾಕರ್ ಪಾತೆರ್ದ್ ತುಳು ಲಿಪಿತ ಪುನರುತ್ಥಾನೊದ ಬಗೆಟ್ ಪಾತೇರ್ಯೆರ್. ತುಳುವ ಮಹಾಸಭೆ ಮುಲ್ಕಿ ವಲಯ ಗುರ್ಕಾರ್ಲು ಉದಯ ಪೂಂಜಾ ತಾರಿಪಾಡಿಗುತ್ತು ಪಾತೆರ್ದ್ ಪ್ರತೀ ಶಾಲೆ ಕಾಲೇಜ್‌ಡ್ ತುಳು ಲಿಪಿ ಕಲ್ಪಾವುನ ವ್ಯವಸ್ಥೆ ಆವೊಡು ಪನ್ದ್ ಪನ್ಡೆರ್.
ಲೇಸ್‌ಡ್ ಪ್ರಹ್ಲಾದ್‌ ತಂತ್ರಿ ಬರೆತಿನ “ತುಳು ವರ್ಣಾಮೃತ” ಪುಸ್ತಕ ಬೊಕ್ಕ ತಿಂಗೊಲ್ದ ತುಳು ಪತ್ರಿಕೆ “ಪುಣ್ಣಮೆದ ಬೊಲ್ಪು” ಬುಡುಗಡೆ ಮಲ್ತೆರ್. ತುಳುಕಲ್ಚರಲ್ ರಿಸರ್ಚ್ ಫೌಂಡೇಶನ್ ಸ್ಥಾಪಕೆರ್ ಮಹಿ ಮುಲ್ಕಿ ಮೇರ್ “ಅರುಣಾಬ್ಬನ ಭಾರತ ಕಾವ್ಯದ ಪೊರ್ಲು” ಪನ್ಪಿ ಇಸಯೊದ ಉಪನ್ಯಾಸ ಕೊರ್ಯೆರ್.
ತುಳು ಭಾಷೆ ಅಧಿಕೃತ ಸ್ಥಾನಮಾನ; ನನ ದುಂಬುದ ಪಜ್ಜೆಲು ಪನ್ಪಿ ಬಗೆಟ್ ನಮ್ಮ ತುಳುನಾಡು ಟ್ರಸ್ಟ್‌ದ ಸ್ಥಾಪಕಾಧ್ಯಕ್ಷೆರ್ ಜಿ.ವಿ.ಎಸ್ ಉಳ್ಳಾಲ್ ಸಂಪನ್ಮೂಲ ವ್ಯಕ್ತಿಯಾದ್ ಪಾತೆರ್ಯೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಗುರ್ಕಾರ್ಲು ನಿಶ್ಚಿತ್ ರಾಮಕುಂಜ ಎದುಕೊಂದು, ಮಹಿ ಮುಲ್ಕಿ ಸೊಲ್ಮೆ ಸಂದಾಯೆರ್.
Mulki: Tulu Pajje Lesa – Vishva Tulu Lipi Dinacharane
Mulki: Tuluva Mahasabha Mulki Valaya bokka Tulu Cultural Research Foundationda ottuseriged Mulki Sarkari Padavi Poorva College’d Tulu Pajje bokka Vishva Tulu Lipi Dinacharaned Shukravara nadatnd.
Vishva Tulu Lipi Dinacharaneda karyakramoda udipana maltina Mulki Sarkari Padavi Poorva College’da praanipaleraayina Dr. Vasudeva Belle paterd Tulu baaseg tannane aayina pramukhyate undu, Tulu lipig tannane aayina parampara undu, aveta abhivruddhig gumana korodu pand panDer.
Malla binnerad Tulu World Foundation, Kateelda gurkaardi Bhanumathi Shetty Kakvaguttu, paterd Tulu baaseg sarakara kortina manyaten saakara malpere puneyodu, Tulu oripaad bulepaga jokulu ottad Tulu lipit adhyayana malt’d saadhago benodu pand panDer.
Tulu Cultural Research Foundationda Tulu Lipi Nirdeshaker Nishanth Ratnakar paterd Tulu lipita punarutthaanoda bagget pateryer. Tuluva Mahasabha Mulki Valaya gurkaarulu Uday Poonja Taripadiguttu paterd prati shaale college’d Tulu lipi kalpaavuna vyavasthe aavodu pand panDer.
Les’d Prahlad Tantri barethina “Tulu Varnamrita” pustaka bokka tingolda Tulu patrike “Punnameda Bolpu” budugade malter. Tulu Cultural Research Foundation sthaapaker Mahi Mulki mer “Arunabbana Bharata Kaavyada Porlu” panpi isayoda upanyaasa koryer.
Tulu baase adhikruta sthaanama; nana dumbuda pajjelu panpi bagget Namma Tulunadu Trustda sthaapakaadhyakshere G. V. S. Ullal sampanmoola vyaktiyaad pateryer. Tulu Cultural Research Foundationda gurkaarulu Nischith Ramakunja edukondu, Mahi Mulki solme sandaayer.