Last updated on October 13th, 2026 at 08:53 am
ಕುಡ್ಲ: ಅಕ್ಟೋಬರ್ 10 ತುಲು ಬಾಸೆಡ್ ತುಲು ಲಿಪಿಟ್ ಸಾಹಿತ್ಯೊನು ಬೊಲ್ಪುಗು ಕನತಿನ ಬಿರ್ದ್‌ದ ಮಾನಿ ಪುಂಡೂರು ವೆಂಕಟರಾಜ ಪುಣಿಂಚತ್ತಾಯೆರೆನ ಪುಟ್ಟುದಿನತ ನೆಂಪುಗಾದ್ ಆಚರಣೆ ಮಲ್ಪುನ ”ಇಸ್ವ ತುಲು ಲಿಪಿ ದಿನ” ಲೇಸ್ ಕುಡ್ಲ ಪೇಂಟೆಡ್ ಅಕ್ಟೋಬರ್ 10, 2026 ದಾನಿ ಬಾರಿ ಪೊರ್ಲುಡು ನಡತ್ಂಡ್.
ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಮುತಾಲಿಕೆಡ್ ನಡತಿನ ಈ ಮಲ್ಲ ಲೇಸ್‌ಡ್, ತುಲು ಲಿಪಿ ದಿನತ ಒಟ್ಟುಗು ತುಲು ಬಾಸೆಗ್ ಇಂಚಿಪ ತಿಕ್ಕಿನ ‘ಆಡಳಿತ ಬಾಸಾ ತಾನಮಾನ’ದ ಗೆಲ್ಮೆನ್ ಮಾತೆರ್ಲಾ ಒಟ್ಟುಸೇರ್ದ್ ಪೆರ್ಮೆಡ್ ಸಂಭ್ರಮಿತೆರ್.
ತುಲು ಸಾಹಿತ್ಯ ಬೊಕ್ಕ ತುಲು ಲಿಪಿಕ್ಕ್ ಮಲ್ಲ ಸೇಜ ಕೊರ್ತಿನ ಅಂಚನೆ ತುಲು ಬಾಸೆಗ್ಲ ಒಂಜಿ ಲಿಪಿ ಉಂಡು ಪನ್ದ್ ಲೋಕೊದ ಬೊಲ್ಪುಗು ತೋಜಾಯಿನ ಮಹಾನ್ ವಿದ್ವಾಂಸೆರ್ ಡಾ. ಪುಂಡೂರು ವೆಂಕಟರಾಜ ಪುಣಿಂಚತ್ತಾಯೆರೆನ ಬೇಲೆನ್ ಈ ಪೊರ್ತುಡು ಪೆರ್ಮೆಡ್ ನೆಂಪು ಮಲ್ತೊಂಡೆರ್. ಕುಡ್ಲ ಪೇಂಟೆಡ್ ಜನಕ್ಲೆಗ್ ಪುಣಿಂಚತ್ತಾಯೆರೆನ ಸಾಧಗೊನ್ ತೆರಿಪಾದ್ ವಿಶ್ವ ತುಲು ಲಿಪಿ ದಿನೊತ ಮಹತ್ವೊನು ಅರ್ಥ ಮಲ್ಪಾಯೆರ್.
”ಏರಡ್ ತುಲುನಾಡ ಕೊಡಿ ಏರಡ್” ಅಭಿಯಾನ: ತುಲುನಾಡ್‌ದ ಜನಕುಲೆನ ದಿಂಜ ಸಮಯದ ಪೊರ್ಂಬಾಟದ ಪಲವಾದ್ ತುಲುಕ್ಕ್ ತಿಕ್ಕಿನ ಆಡಳಿತ ಬಾಸೆದ ಗೆಲ್ಮೆನ್ ಆಚರಣೆ ಮಲ್ಪುನ ಮುಕೇನ, “ಏರಡ್ ತುಲುನಾಡ ಕೊಡಿ ಏರಡ್” ಪನ್ಪಿನ ಪೊಸ ಅಭಿಯಾನೊಗು ಕೂಟದ ಪ್ರಮುಖೆರ್ ಚಾಲನೆ ಕೊರಿಯೆರ್.
ಅಭಿಯಾನ ನಡತಿನ ಪ್ರಮುಖ ಜಾಗೆಲು: ಕುಡ್ಲ ಪೇಂಟೆದ ಬೇತೆ ಬೇತೆ ಜಾಗೆಲೆಡ್ ಬೊಕ್ಕ ರಿಕ್ಷಾ ಪಾರ್ಕ್‌ಲೆಡ್ ಈ ಅಭಿಯಾನ ಬಾರಿ ಉಮೇದ್‌ಡ್ ನಡತ್ಂಡ್. ಕುಡ್ಲ ಪೇಂಟೆದ ಸುಮಾರ್ 250 ರಿಕ್ಷಾಲೆಗ್ ತುಲು ಕೊಡಿ ಕಟ್ಟಿಯೆರ್. ಇಸೇಸವಾದ್ ಬಿಜೈ ಕೆ.ಎಸ್.ಆರ್.ಟಿ.ಸಿ, ಕುದ್ರೋಳಿ, ದೇವಿಕಟ್ಟೆ ರಿಕ್ಷಾ ಪಾರ್ಕ್ ಪದಂಗಡಿ, ಮೇರಿಹಿಲ್, ಬಲ್ಲಾಲ್‌ಬಾಗ್, ವೆಲೇನ್ಸಿಯ, ಹಂಪನಕಟ್ಟೆ ಬೊಕ್ಕ ತುಳುನಾಡ ರಿಕ್ಷಾ ಪಾರ್ಕ್ ಕೆ.ಪಿ.ಟಿ ಈ ಮಾತಾ ಜಾಗೆಲೆಡ್ ತುಲುನಾಡ ಕೊಡಿ ಏರಾದ್ ಜನಕುಲು ಕಜ್ಜನ್ ಯಶಸ್ವಿ ಮಲ್ತೆರ್.
ಈ ಅಭಿಯಾನೊಡು ಕುಡ್ಲ ಎಗ್ಗೆದ ಚೇತನ್ ಅಂಚನ್ ಒತ್ತು ಗುರ್ಕಾರ್ಲು, ಕಾರ್ಯಂತೆರ್ ಶರತ್‌ರಾಜ್ ಆಲಂಕಾರ್, ಸಂಘಟನಾ ಕಾರ್ಯಂತೆರ್,
ಅಕ್ಷಿತ್ ಶೆಟ್ಟಿ, ಪನವುದ ಪಾಲವೆರ್ ಭವಿಷ್ಯ ಎಸ್. ಕುಡ್ಲ, ಒತ್ತು ಕಾರ್ಯಂತೆರ್ ಜೀವಿತಾ ಕುತ್ತಾರ್, ಕುಡ್ಲ ಎಗ್ಗೆದ ತುಲು ಲಿಪಿ ಸಮಿತಿದ ನಿದಯಂತೆರ್ ಆಯಿನ
ಶಿಲ್ಪಾಶ್ರೀ ತುಲುವೆದಿ, ತಾಪಕ ಸಮಿತಿದ ಪದುಕೆರ್ ಆಯಿನ
ಕಿರಣ್ ತುಲುವೆ, ತಾಪಕ ಸಮಿತಿದ ಪದುಕೆರ್ ಬೊಕ್ಕ ಮಾಜಿ ಗುರ್ಕಾರ್ಲು ಉದಯ್ ಪೂಂಜ ತಾರಿಪಾಡಿಗುತ್ತು, ಕೇಂದ್ರ ಸಮಿತಿದ ಮಾಜಿ ಗುರ್ಕಾರ್ಲು ಸುದರ್ಶನ್ ಸುರತ್ಕಲ್, ತಾಪಕ ಸಮಿತಿದ ಪದುಕೆರಾಯಿನ
ರಕ್ಷಿತ್ ರಾಜ್ ಬಜಾಲ್, ಪದುಕೆರಾಯಿನ
ವಿನಯ್ ರೈ ಕುಡ್ಲ, ಚಿರಶ್ರೀ ದೇರಳಕಟ್ಟೆ, ಪೈನಲ್ ಕಟ್ ಸ್ಟೂಡಿಯೊದ ಮಾಲಕೆರ್ ಆಯಿನ ನಿಧಿ ರೈ ಒತ್ತುಪಾಲಿತ್ತ್‌ದ್ ಬೆರಿತಾಂಗ್ ಕೊರಿಯೆರ್.
ಕುಡ್ಲ ಪೇಂಟೆದ ಸುಮಾರ್ 250 ರಿಕ್ಷಾಲೆಗ್ ತುಲು ಕೊಡಿ ಕಟ್ಟಿಯೆರ್.
ಕುಡ್ಲದ ಬೇತೆಬೇತೆ ಜಾಗೆಲೆಡ್ ನಡತಿನ ಈ ಅಭಿಯಾನೊಡು ಜೈ ತುಲುನಾಡ್ (ರಿ.) ಕೂಟದ ಪದುಕೆರ್, ತುಲು ಲಿಪಿ ಕಲ್ಪಾದಿಲು, ರಿಕ್ಷಾ ಚಾಲಕೆರ್ ಬೊಕ್ಕ ತುಲು ಬಾಸೆದ ಮಿತ್ತ್ ಮೋಕೆ ಉಪ್ಪುನ ಮಸ್ತ್ ಜನ ಪಾಲ್ ಪಡೆದ್ ಕಜ್ಜೊನು ಪೊರ್ಲುಡು ನಡಪಾದ್ ಕೊರಿಯೆರ್.