Last updated on November 16th, 2022 at 05:52 pm
“ತುಳುನಾಡ ದೈವಾರಾಧನೆ ಅನಾದಿಕಾಲೊರ್ದಿಂಚಿ ನಡತೊಂದು ಬತ್ತಿನವು. ದೈವಾರಾಧನೆಡ್ ನರ್ತನಸೇವೆನ್ ಎಂಕ್ಲ ವಂಶಪಾರಂಪರ್ಯವಾದ್ ನಡಪಾವೊಂದು ಬರೊಂದುಲ್ಲ. ಆಂಡ ಇಂಚಿಪ್ಪೊಗು ರಾಜ್ಯೊಡು ಕೆಲ ವಿಚಾರವಾದಿಲು ಎಂಕ್ಲೆನ ಆಚರಣೆಲೆ ಬಗ್ಗೆ ಎಲ್ಯೆ ಮಲ್ತ್ ಪಾತೆರೊಂದುಲ್ಲೆರ್, ಮಕ್ಕರ್ ಮಲ್ತೊಂದುಲ್ಲೆರ್. ಕೆಲ ಜನ ಮಾಸಾಶನಲಾ ಕೊರ್ರ ಬಲ್ಲಿ ಪಂತೆರ್. ಇಂಚ ಮಾತ ಮನ್ಪುನ ತಪ್ಪು. ಇಂಚ ಮಲ್ತಿನಕ್ಲೆನ ವಿರುದ್ಧ ಸರ್ಕಾರ ಕ್ರಮ ದೆತೊನೊಡು” ಪಂದ್ ರಾಜ್ಯ ಪರವೆರೆ ಸಂಘ ಕನ್ನಡ ಬೊಕ್ಕ ಸಂಸ್ಕೃತಿ ಅಂಚೆನೇ ಇಂಧನ ಸಚಿವೆ ಸುನಿಲ್ ಕುಮಾರ್‌ರೆಡ ಬಿನ್ನೈತೊಂದೆರ್.
ಈತ್ ಮಾತ್ರ ಅತ್ತಂದೆ ಸೋಷಿಯಲ್ ಮೀಡಿಯಾಡ್, ಸಾರ್ವಜನಿಕ ಮಿತ್ತರ್ಮೆಲೆಡ್, ಮೆರವಣಿಗೆಲೆಡ್, ಬೇತೆ ಮಿನದನ ಕಜ್ಜೊಲೆಡಾವಡ್ ದೈವಾರಾಧನೆನ್ ಮಕ್ಕರ್ ಮನ್ಪುನಂಚ ತೂಪಾವುನಕ್ಲೆನ ಮಿತ್ತ್ ಒರ್ಯನ ನಂಬೊಲಿಗೆನ್ ಕುಸಾಲ್ ಮನ್ಪುನಕ್ಲೆನ ಮಿತ್ತ್ ಕ್ರಮ ದೆತೊನುನಂಚಿನ ಕಾನೂನು ಕನವೊಡು ಪಂಡ್‌ದ್ ಸಂಘ ಬಿನ್ನೈತೊಂದುಂಡು.
ಸಾರ್ವಜನಿಕ ಶಿಕ್ಷಣ ಇಲಾಖೆ ಪ್ರತಿಭಾ ಕಾರಂಜಿದ ನೋಟೀಸ್‌ಡ್ ಭೂತದ ಕೋಲಗ್ ಅವಕಾಶ ಕೊರ್ತಿನೆನ್ಲಾ ಪಿರ ದೆತೊನೊಡು ಪಂದ್ ಒತ್ತಾಯ ಮಲ್ತೆರ್.
ಈ ಪೊರ್ತುಡು ಪರವೆರೆ ಸಂಘೊರ್ದು ಡಾ. ರವೀಶ್ ಪಡುಮಲೆ, ಗುರ್ಕಾರ್ಲು ನಾರಾಯಣೆರ್, ಒತ್ತು ಗುರ್ಕಾರ್ಲು ಸುರೇಶ್ ಮರೋಡಿ, ಒತ್ತು ಕಾರ್ಯಂತೆರ್ ರಾಜು ಮಾರ್ನಾಡ್, ಪನವುದ ಪಾಲವೆರ್ ಅಶೋಕ್ ಇರುವೈಲ್, ಬಾಬು ಮಿಜಾರ್, ಶಿವಾನಂದ ಬೆದ್ರ, ನಾರಾಯಣ ಗಾಂಧಿನಗರ, ಚುಕುಡ ಇಂಚ ಸಂಘೊದ 50ರ್ದ್‌ಲಾ ಎಚ್ಚಿನ ಪದುಕೆರ್ ಒತ್ತುಪಾಲ್‌ಡಿತ್ತೆರ್.