ಬೆಂಗ್ಳೂರುದ ಶಾಲೆ ಜೋಕ್ಲೆನ ಚೀರವುಡು ಕಾಂಡೋಮ್! ನೀರ್ದ ಕುಪ್ಪಿಡ್ ಗಂಗಸರ! ಟೀಚರ್ನಕಲೆಗ್ ಶಾಕ್

Last updated on November 30th, 2022 at 05:55 pm

ಶಾಲೆಡ್ ಮೊಬೈಲ್ ಗಲಸ್ಂಡ ಜೋಕುಲೆಗ್ ಪಾಟದ ಮಿತ್ತ್ ಗಮನ ಕೊರಿಯರೆ ಆಪುಜಿ ಪನ್ದ್ ಟೀಚರ್ನಕುಲು ಜೋಕುಲೆನ ಬ್ಯಾಗ್ ನಾಡ್ನಗ ಅಕಲೆಗ್ ಅವೆಟ್ ತಿಕಿನ ವಸ್ತುಲೆನ್ ತೂದು ಶಾಕ್ ಆತ್ಂಡ್.

ಕೆಲವು ಜೋಕುಲೆನ ಬ್ಯಾಗ್ ಡ್ ಕಾಂಡೋಮ್, ಜೋಕುಲಾವಂದಿಲೆಕ್ಕ ತಡೆಪುನ ಮಾತ್ರೆ, ಸಿಗರೇಟ್, ಲೈಟರ್, ಅಮಲ್ ಬರ್ಪಾವುನಂಚಿನ ಮೂರಿ ಉಪ್ಪುನ ವೈಟ್ನರ್, ಕುಪ್ಪಿಲೆಡ್ ಗಂಗಸರ, ಲೆಕ್ಕೊರ್ದು ಜಾಸ್ತಿ ಕಾಸ್ ತಿಕ್ಕುದ್ಂಡ್.

ಕರ್ನಾಟಕ ಪ್ರಾಥಮಿಕ ಬೊಕ್ಕ ಮಾಧ್ಯಮಿಕ ಶಾಲಾ ವ್ಯವಸ್ಥಾಪಕ ಮಂಡಳಿದಕುಲು ಶಾಲೆಲೆಗ್ ಜೋಕುಲೆನ ಚೀರವು ಚೆಕ್ ಮಲ್ಪರೆ ಪಂದಿತ್ತೆರ್. ಈ ಆದೇಶೊನು ಪಾಲನೆ ಮಲ್ತಿನ ಟೀಚರ್ನಕಲೆಗ್ ಉಂದು ಪೂರಾ ತೂವರೆ ತಿಕ್ಕ್ಂಡ್. ಇಂಚಿನ ಪೂರಾ ತಿಕ್ಕಿನದಗನೇ ಶಾಲೆಲು ಜೋಕುಲೆನ ಅಪ್ಪಮ್ಮಲೆನ್ ಲೆತ್ತ್ ಸಭೆ ಮಲ್ದಿತ್ತೆರ್. ಉಂದು ವಿಷಯ ತೆರಿನ ಪೆದ್ದಿನಕುಲುಲಾ ಮಂಡೆಬೆಚ್ಚೊಡುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.

ಬೆಂಗಳೂರು ನಗರ ಬೊಕ್ಕ ಪಿದಯಿ ವಲಯದ 80% ಶಾಲೆಲೆಡ್ ಈ ತಪಾಸನೆ ನಡತ್ಂಡ್. ಈ ಪೋರ್ತುಗು ಪೊಣ್ಣೊರ್ತಿನ ಚೀರವುಡು ಗರ್ಭನಿರೋಧಕ ಮಾತ್ರೆ ತಿಕ್ಕುಂಡು. ಅಪ್ಪೆ ಒರ್ತಿಗ್ ತನ್ನ 14 ವರ್ಸದ ಮಗನ ಶೂತ ಉಲಯಿ ಕಾಂಡೋಮ್ ತಿಕ್ಕಿನಲ ಪ್ರಜಾವಾಣಿಡ್ ವರದಿ ಆತ್ಂಡ್.

ಉಂದು ಬಾರೀ ಸೂಕ್ಷ್ಮ ವಿಚಾರ ಆಯಿನೆರ್ದಾವರ ತಿಕ್ಕಿನ ಜೋಕುಲೆನ ಪುದರ್ ಪಿದಯಿ ಪನೊಂದಿಜ್ಜ. ಪುದರ್ ಪಿದಯಿ ಪೋಂಡ ಜೋಕುಲೆಗ್ ಮಾನಸಿಕವಾದ್ ಕುಂದೆಲ್ ಆವು, ಉಂದೆನ್ ಆಪ್ತ ಪಾತೆರಕತೆ ಮಲ್ತ್ ಸುದಾರ್ಪೊಡು. ಶಾಲೆಲ್ನ ಆಡಳಿತ ಮಂಡಳಿ ಈ ವಿಷಯೊಡು ಗಂಭೀರವಾದುಂಡು ಪನ್ದ್ ನಾಗರಬಾವಿದ ಶಾಲೆ ಒಂಜೆತ್ತ ಪ್ರಾಚಾರ್ಯೆರ್ ಪಂಡೆರ್.

13-14-15 ವರ್ಸದ ಜೋಕುಲೆನ ಚೀರವುಲೆಡ್ ಉಂದು ತಿಕ್ಕಿನೆನ್ ಅಪ್ಪಮ್ಮಲ್ಲುಲ ಒಂತೆ ಯೋಚನೆ ಮಲ್ಪೊಡು. ಈ ಪಿರಯೊಡು ಜೋಕುಲು ಅಜೆ ತಪ್ಪಂದಿಲೆಕ್ಕ, ದಾದ ಮಲ್ತೊಂದುಲ್ಲೆರ್ ಪನ್ದ್ ತೆರಿಯೊನೊಡು. ಜೋಕುಲೆಗ್ ಒಡನಾಟ ಬೋಡು, ಅಪ್ಪೆ ಅಮ್ಮಲ್ಲು ಜೋಕುಲೊನೊಟ್ಟು ಕುಲ್ದ್ ಪಾತೆರೊಡು. ಈ ರೀತಿದ ಅಡಿಕ್ಷನ್ ಎಲ್ಲಿಡೇ ದೂರ ಮಲ್ಪೊಡು.