Last updated on December 9th, 2022 at 03:21 pm
ಕುಡ್ಲ : ಡಿಸೆಂಬರ್ 9: 8ಸಾವಿರ ಕೋಟಿ ರೂಪಾಯಿ ಖರ್ಚಿಡ್ ಸುರು ಆದಿತ್ತಿನ ನೇತ್ರಾವತಿ ಸುದೆ ತಿರ್ಗಾವುನ ‘ಎತ್ತಿನಹೊಳೆ ಕುಡಿಯುವ ನೀರಿನ ಯೋಜನೆ’ ದ ಪೊಸ ಪರಿಷ್ಕೃತ ಖರ್ಚಿ 23,000 ಕೋಟಿ ಆತ್ಂಡ್. 2012ರ್ದ್ ಬೊಕ್ಕ ಮೂಜನೇ ಸರ್ತಿ ಖರ್ಚಿ ಪರಿಷ್ಕೃತ ಮಲ್ತೊಂದಿಪ್ಪುನು.
ಹಾಸನ ಜಿಲ್ಲೆದ ಸಕಲೇಶಪುರ ತಾಲೂಕ್‌ದ ಎತ್ತಿನಹೊಳೆರ್ದ್ ಕೋಲಾರ, ಕಿನ್ಯಬಲ್ಲಾಪುರ, ತುಮಕೂರು, ರಾಮನಗರ ಬೊಕ್ಕ ಬೆಂಗಳೂರು ನಗರ ಜಿಲ್ಲೆಲೆಗ್ ಪರ್ಪಿನ ನೀರ್ ಕೊರ್ಪುನ ಪುದರ್‌ಡ್ ಈ ಯೋಜನೆ ನಡತೊಂದುಂಡು. ಈ ಯೋಜನೆಡ್ ಸುಮಾರ್ 24 ಟಿಎಂಸಿ ನೀರ್‌ನ್ ತಿರ್ಗಾವುನ ಅಂದಾಜಿ ಪಾಡ್ದೆರ್.
ಪತ್ತ್ ವರ್ಸೊಗು ದುಂಬು ಬಿಜೆಪಿ ಸರ್ಕಾರ ಅಧಿಕಾರೊಡುಪ್ಪುನಗ ಅನುಮೋದನೆ ತಿಕ್ಕಿನ ಈ ಯೋಜನೆಗ್ 8,323 ಕೋಟಿ ಖರ್ಚಿ ಅಂದಾಜಿ ಪಾಡ್ದಿತ್ತೆರ್. 2014ಟ್ ಕಾಂಗ್ರೆಸ್ ಅಧಿಕಾರೊಗು ಬತ್ತಿ ಬೊಕ್ಕ 12,912.36 ಕೋಟಿ ರೂ.ಗ್ ಪರಿಷ್ಕೃತ ಮಲ್ದಿತ್ತೆರ್. 2013 ತ ಕಾಯಿದೆಡ್ ಭೂಸ್ವಾಧೀನೊದ ಖರ್ಚಿ ಎಚ್ಚಿನೆರ್ದಾನರ ಯೋಜನೆದ ಖರ್ಚಿಲಾ ಎಚ್ಚ ಆತ್ಂಡ್ ಪಂದ್ ಕಾನೂನು ಸಚಿವೆ ಜೆ ಸಿ ಮಾಧುಸ್ವಾಮಿ ಪಂಡೆರ್.
‘ತುಮಕೂರು ಬೊಕ್ಕ ಮಲ್ಲಬಲ್ಲಾಪುರ ತಾಲೂಕ್‌ಡ್ ಸುಮಾರು 5,860 ಎಕರೆ ಭೂಮಿನ್ ಕೆರೆ ತೋಡೆರ ರಾಜ್ಯ ಸರ್ಕಾರ ಗುರ್ತ ಮಲ್ದ್ಂಡ್. ಮಲ್ಲಬಲ್ಲಾಪುರ ತಾಲೂಕ್‌ಡ್ ಒಂಜಿ ಎಕರೆ ಜಾಗೆಗ್ ಸುಮಾರು 8 ಲಕ್ಷ ರೂ. ಉಂಡು, ಆಂಡ ತುಮಕೂರು ತಾಲೂಕ್‌ಡ್ ಕಾಲಿ 2 ಲಕ್ಷ ರೂ. ಅಂಚಾದ್ ತುಮಕೂರುದ ಜಾಗೆದಕ್ಲು ಒಂಜೇ ಲೆಕ ಪರಿಹಾರ ಕೊರೊಡು ಪಂದ್ ಬಿನ್ನೈತೊಂದೆರ್’ ಪಂದ್ ಮಾಧುಸ್ವಾಮಿ ತೆರಿಪಾಯೆರ್.