Last updated on December 12th, 2022 at 10:30 am
ಕಾಸ್ರೋಡ್: ಜೈ ತುಲುನಾಡ್ (ರಿ.) ಸಂಘಟನೆದ ಕಾಸ್ರೋಡ್ ಎಗ್ಗೆದ ಪ್ರಧಾನ ಸಂಚಾಲಕೆರಾಯಿನ ಪ್ರವೀಶ್ ಕುಲಾಲ್ ಬೊಕ್ಕ ಕಾವ್ಯ ಮೊಕ್ಲೆನ ಮದಿಮೆದ ತಮ್ಮನೊದ ಲೇಸ್‌ಡ್ ‘ಡಿಜೆದ ಇಡೆಟ್ ಸಾಹಿತ್ಯದ ತುಲಿಪು, ಮದಿಮೆಡಾವಡ್ ಪೊಸ ದೇಕಿದ ಮದಿಪು’ ಪನ್ಪಿ ಇಸೇಸ ಕಬಿಗೋಷ್ಠಿನ್ ಅಟ್ಟನೆ ಮಲ್ದಿತ್ತೆರ್.
ತುಲುವ ಮಣ್ಣ್‌ದ ಕಬಿಕುಲಾಯಿನ ಪ್ರವೀಶ್ ಕುಲಾಲ್, ಕುಶಲಾಕ್ಷಿ ವಿ ಕಣ್ವತೀರ್ಥ, ರಮೇಶ್ ಅಟ್ಟೆಗೋಳಿ, ನಿರ್ಮಲ ಸೇಸಪ್ಪ ಖಂಡಿಗೆ, ಸತೀಶ್ ಸಾಲಿಯಾನ್ ನೆಲ್ಲಿಕುಂಜೆ, ಆಶಾಲತಾ ಚೇವಾರ್, ಸೌಮ್ಯ ಅರ್ ಶೆಟ್ಟಿ ಮಂಜೇಶ್ವರ, ಶ್ರೀನಿವಾಸ ಆಳ್ವ ಕಳತ್ತೂರ್ ಕಬಿತೆಲೆನ್ ಓದಿಯೆರ್. ಕು. ದಿಶಾ ಬೊಕ್ಕ ಆರೆನ ಪಾಸಾಡಿಲು ಪೊರ್ಲುದ ತುಲು ಭಾವಗೀತೆನ್ ಪಂಡೆರ್.
ಪೆರಿಯ ತುಲು-ಕನ್ನಡ ಬರವುಗಾರೆ ಉಮೇಶ್ ಸಾಲಿಯಾನ್ ಶಿರಿಯಾ ಲೇಸ್‌ದ ಗುರ್ಕಾರ್ಮೆದ ಪಟ್ಟೊಡು ಕುಲ್ದಿತ್ತೆರ್. ಈ ಲೇಸ್‌ಡ್ ಅಮೆತ್ತೋಡು ಗ್ರಾಮೊದ ಮೂಲ್ಯೆರೆ ಗುರ್ಕಾರೆ ಈಶ್ವರ ಮೂಲ್ಯೆರ್, ಜೈ ತುಲುನಾಡ್ (ರಿ.) ಕಾಸ್ರೋಡ್ ಎಗ್ಗೆದ ಗುರ್ಕಾರೆ ಹರಿಕಾಂತ್ ಸಾಲ್ಯಾನ್ ಕಾಸ್ರೋಡ್, ಶ್ರೀ ಸ. ನಾ. ಪ್ರೌಢಶಾಲೆ, ಪೆರ್ಲದ ಕಲ್ಪಾದಿ ನಾರಾಯಣ ಪೂಜಾರಿ, ಜಗನ್ನಾಥ ಕುಲಾಲ್ ಪಾಲ್‌ಪಡೆಯೆರ್.