Last updated on July 17th, 2022 at 12:33 pm
ಕೀರ್ ಕಟ್ದ್ ಕೋರೊಂದು ಬರೊಂದಿತ್ತಿ ಬರ್ಸ, ತೋರೊಂದಿತ್ತಿ ಮುಲಿ ಮಾಡ ಇಲ್ಲ್, ಬೆನ್ನಿದ ಬೇಲೆ ದಾಂತೆ ಉನ್ಯರೆ ತಿನ್ಯರೆ ಆವಂದಿನ ಆಟಿ, ಬಡಪತ್ತ್ ದ ಆಟಿ ಒಂಜಿ ಕಾಲೊಡು ಇತ್ತ್ಂಡ್. ಸೀಕ್ ಸಂಕಟ ಪಗರುನ ಪೋಡಿಗೆ, ದೈವೊಲೆಗ್ ಮನೆ ಮಂಚಾವು ಜಪ್ಪರೆ ಇಜ್ಜಿ, ಕುಲೆಕಪಲು ಪೂರಾ ಲಕ್ಕ್ ದ್ ಅಬತಾರ ಕೊರ್ಪಿನ ತಿಂಗೊಲೊವು ಪನ್ಡ ಆಟಿ. ಆಟಿಡ್ ಬತ್ತಿ ಸೀಕ್ ಸಂಕಟೊಲೆನ್ ದೂರ ಮಲ್ಪರೆ ಆಟಿ ಕಲೆಂಜೆ ಇಲ್ಲಿಲ್ಲ್ ಬರೊಂದಿತ್ತೆ. ಇಲ್ಲದಲ್ಪ ತಿಕ್ಕುನವೇ ಆಯಿನ ತೊಜಂಕ್, ತೇವು, ಪುಂಡಿ ಕೇನೆಲೆನ್ ಪೂರಾ ಕಜಿಪು ಮಲ್ತ್ ದ್ ದುಂಬು ತಿನೊಂದಿತ್ತೆರ್. ಪೊಸ ಮದಿಮಾಲ್ ಅಪ್ಪೆ ಇಲ್ಲಗ್ ಆಟಿ ಕುಲ್ಲರೆ ಪೋವೊಂದಿತ್ತೊಲು. ಇತ್ತೆ ಉಂದು ಪೂರಾ ಇಜ್ಜಿಡಲ ಆಟಿದ ಕೂಟೊಲು ಅಲ್ಪಲ್ಪ ಮಲ್ತ್ದ್ ತುಳುವೆರ್ ಆಟಿದ ಆಚರಣೆಲೆನ್ ನೆಂಪು ಮಲ್ತೊನುವೆರ್. ಪೆರಿಯಾಕ್ಲು ಇತ್ತೆಲಾ ಆಟಿ ತಿಂಗೊಲ್ದ ಬಂಗೊಲೆನ್ ಅಪಗಪಗ ಇತ್ತೆದಕಲೆಗ್ ಪನ್ಪೆರ್.