Last updated on December 19th, 2022 at 12:48 pm
ಭಾರತೊದ ಸರ್ಗಮ್ ಕೌಶಲ್ ಮಿಸಸ್ ವಲ್ಡ್ 2022 ದ ಪಟ್ಟೊನು ಗೆಂದ್‌ದೆರ್. ನೆರ್ದಾವರ 21 ವರ್ಸೋರ್ದ್ ಬೊಕ್ಕ ಭಾರತೊಗು ಮಿಸಸ್ ವಲ್ಡ್ ಕಿರೀಟ ಪಿರತಿಕ್ಕುಲೆಕ ಆಂಡ್. 2001ಡ್ ಅದಿತಿ ಗೋವಿತ್ರಿಕರ್ ಮಿಸಸ್ ವಲ್ಡ್ ಆದ್ ಅಜತ್ ಬೈದಿತ್ತೆರ್.
ಅಮೆರಿಕೊದ ವೆಸ್ಟ್‌ಗೇಟ್ ಲಾಸ್ ವೇಗಾಸ್ ರೆಸಾರ್ಟ್ಡ್ ಸನಿಯಾರ ಬಯ್ಯಡ್ ನಡತಿನ ಲೇಸ್‌ಡ್ 2021ನೇ ವರ್ಸೊದ ಮಿಸಸ್ ವಲ್ಡ್ ಶೈಲಿನ್ ಫೋರ್ಡ್ ಜಮ್ಮು-ಕಾಶ್ಮೀರ ಮೂಲೊದ ಸರ್ಗಮ್ ಕೌಶಲ್‌ರೆಗ್ ಕಿರೀಟ ಪಾಡ್ಯೆರ್. ಪಾಲಿನೇಷಿಯಾದ ಪೊಂಜೊವು ಸುರುತ ರನ್ನರ್ ಅಪ್ ಬೊಕ್ಕ ಕೆನಡಾದ ಪೊಂಜೋವು ರಡ್ಡನೇ ರನ್ನರ್ ಅಪ್ ಆದ್ ಅಜತ್ ಬೈದೆರ್.
ಮಿಸಸ್ ವಲ್ಡ್ 2022ದ ಪಟ್ಟೊದ ಬಗ್ಗೆ ಐತಾರ ಸರ್ಗಮ್ ಕೌಶಲ್ ತನ್ನ ಅಧಿಕೃತ ಇನ್ಸ್ಟಾಗ್ರಾಮ್ಡ್ ಖುಷಿ ಪಟ್ಟೊಂದೆರ್. ಮಸ್ತ್ ವರ್ಸೊರ್ದಿಂಚಿ ಕಾತೊಂದಿತ್ತಿನ ಪೊರ್ತು ಬೈದ್ಂಡ್. 21 ವರ್ಸೊರ್ದ್ ಬೊಕ್ಕ ಮಿಸಸ್ ವಲ್ಡ್ ಕಿರೀಟ ನಮಕ್ ತಿಕ್ಕ್‌ದ್ಂಡ್. ಎಂಕ್ ಮಸ್ತ್ ಕುಸಿ ಆವೊಂದುಂಡು. ಲವ್ ಯು ಇಂಡಿಯಾ, ಲವ್ ಯು ವಲ್ಡ್ ಪಂದ್ ವಿಡಿಯೋ ಮಲ್ತ್ ಬುಡ್ತೆರ್.
1984ಟ್ ಮದಿಮೆ ಆತಿನ ಪೊಂಜೊವುನಕಲೆಗ್ ಮಿಸಸ್ ವಲ್ಡ್ ಸೌಂದರ್ಯ ಸ್ಪರ್ಧೆ ಸುರು ಆದಿತ್ತ್ಂಡ್. ಈ ವರ್ಸೊದ ಸ್ಪರ್ಧೆದ ಅಕರಿದ ಸುತ್ತುಡ್ ಸರ್ಗಮ್ ಕೌಶಲ್ ಗುಲಾಬಿ ರಂಗ್‌ದ ಸೆಂಟರ್ ಸ್ಲಿಟ್ ಗ್ಲಿಟರಿ ಗೌನ್ ಪಾಡೊಂದು ಮೆನ್ಕೊಂದಿತ್ತೆರ್.