ಬಜ್ಜೈ ಬುಲೆಕ್ ನನ ದಿಂಜ ದಿನ ಭವಿಷ್ಯದಾಂತಿಲೆಕ್ಕ ಆವು, ಉಂದೆಕ್ ಬೆರಿಬಲ ಕೊರಿಯರೆ ಬಲ್ಲಿ : ಅರಗ ಜ್ಞಾನೇಂದ್ರೆ

Last updated on December 29th, 2022 at 12:43 pm

ಲೆಕ್ಕೊರ್ದು ಜಾಸ್ತಿ ಕಂಗ್ ಬುಲೆಪಿನ ದುಂಬುದ ಭವಿಷ್ಯೊಗು ಮಾರಕ ಆವು. ಅಂಚೆನೆ ಒಲ್ಪ ಪೂರಾ ಬುಲೆಯುಜಾ ಅಲ್ಪಲ ಕಂಗ್ ಬುಲೆಪಾವುನ ಸರಿ ಅತ್ತ್, ಇಂಚ ಆಂಡ ಬಜ್ಜೈ ಬುಲೆಕ್ ನನ ದಿಂಜ ಭವಿಷ್ಯ ಉಪ್ಪಂದೆ ಪೋವು. ಉಂದೆಕ್ ಬೆರಿಬಲ ಕೊರ್ರೆ ಬಲ್ಲಿ ಪನ್ದ್ ಬಜ್ಜೈ ಟಾಸ್ಕ್ ಪೋರ್ಸ್ ದ ಗುರ್ಕಾರೆ ಅಂಚೆನೆ ಕರ್ನಾಟಕದ ಗೃಹಮಂತ್ರಿಯಾಯಿನ ಅರಗ ಜ್ಞಾನೇಂದ್ರೆರ್ ಸದನೊಡು ಪಂಡೆರ್.

ಒಲ್ಪ ಪೂರಾ ಕಂಗ್ ಬುಲೆಯೊಂದಿತ್ತ್ ಜೆರಾ ಇತ್ತೆ ಅಲ್ಪಲಾ ಕಂಗ್ ಬುಲೆಯರೆ ಸುರು ಮಲ್ದೆರ್, ಉಂದೆರ್ದಾತ್ರ ಸಾಂಪ್ರದಾಯಿಕವಾದ್ ಕಂಗ್ ಬುಲೆಯೊಂದಿತ್ತಿನಕಲೆಗ್ ಬಾರೀ ಬಂಗ ಆಪುಂಡು. ಕೆಲವು ನರ್ಸರಿಲೆಡ್ ವರ್ಸೊಗು ಒಂಜಿ ಕೋಟಿರ್ದ್ ಜಾಸ್ತಿ ದೈ ಮಾರ್ದ್ ಪೋಪುಂಡು. ಇಂಚೆನೆ ಆಂಡ 5/10 ವರ್ಸೊಡು ಕಂಗ್ ಬುಲೆಕ್ ಮಾರಕ ಆಪುಂಡು.

ಆಹಾರ ಬುಲೆಕ್ ಸಾಲ ದೆತೊಂದು ಕಂಗ್ ದ ಬುಲೆ ಮಲ್ತೊಂದುಲ್ಲೆರ್. ಇಂಚ ಆಂಡ ತುಳುನಾಡ್, ಮಲೆನಾಡ್ ಡ್ ಸಾಂಪ್ರದಾಯಿಕವಾದ್ ಕಂಗ್ ಬುಲೆಪಿನಕಲೆಗ್ ಸಂಕಸ್ಟ ಆಪುಂಡು. ಇಂಚಿನ ಅನಾರೋಗ್ಯಕರ ಬುಲೆಚ್ಚಿಲ್ ಆವರೆ ಬುಡ್ರೆ ಬಲ್ಲಿ. ತುಳುನಾಡ್ ಮಲೆನಾಡ್ಡ್ 5-10 ಎಕ್ರೆಡ್ ಬುಲೆಯೊಂದಿತ್ತಿನ ಬುಲೆ ಇತ್ತೆ ಪಿದಯಿಡ್ 100-200 ಎಕ್ರೆಡ್ ಬುಲೆಯರೆ ಸುರು ಮಲ್ದೆರ್. ಇಂಚಾದ್ ಕಂಗ್ ಬುಲೆಕ್ ನಿರ್ಬಂಧ ಪಾಡುನ ಅಗತ್ಯ ಉಂಡು ಪನ್ದ್ ಪಂಡೆರ್.