ಪ್ರಾಧಿಕಾರ ಮಲ್ಪುವೆ ಪನ್ದ್ ಕುಡ ನಾರಾಯಣ ಗುರು ಕೋಶೊಗು ಪಣವು ಬುಡಗಡೆ ಮಲ್ಪರೆ ಪಿದಡಿನ ಬೊಮ್ಮಾಯಿನ ಮಿತ್ತ್ ಬಿರುವ ನಾಯಕೆರ್ ಪಿಸಿರ್

Last updated on January 11th, 2023 at 04:32 pm

ಕರ್ನಾಟಕ ಸರಕಾರ ಇಂಚಪ್ಪೊಗು ಪೊಸತ್ತಾದ್ ನಾರಾಯಣ ಗುರು ಅಭಿವೃದ್ದಿ ಕೋಶೊನು ಉಂಡು ಮಲ್ದಿತ್ತ್ಂಡ್. ಉಂದೆಕ್ ತುಳುನಾಡ್ದ ಬಿರುವ ಜನಾಂಗದಕುಲು ವಿರೋಧ ಮಲ್ತ್ ಎಂಕ್ಲೆಗ್ ಕೋಶ ಬೊಡ್ಚಿ ಅಭಿವೃದ್ದಿ ಪ್ರಾಧಿಕಾರ ಮಲ್ಪುಲೆ ಪನ್ದ್ ಪನ್ದಿತ್ತೆರ್.

ಈ ಬಗೆಟ್ ಪಾತೆರಿನ ಬಿರುವ ಮುಖಂಡೆ ಪದ್ಮರಾಜೆರ್, ಸರಕಾರ ಅಭಿವೃದ್ದಿ ಪ್ರಾಧಿಕಾರ ಮಲ್ಪುವೆ ಪನ್ದ್ ಕೋಶನ್ ಬುಲೆಪಾರೆ ತೂಪಿನವು ಮಸ್ತ್ ಗೊಂದಲ ಮಲ್ತೊಂದುಂಡು. ಇಂಚಪ್ಪೊಗು ಮುಖ್ಯಮಂತ್ರಿ ಬೊಮ್ಮಾಯಿ ಕೋಶ ಮಲ್ಪುನ ನಿರ್ಣಯೊನು ಪಿರದೆತೊಂದು ಪ್ರಾಧಿಕಾರ ಕೊರ್ಪೆ ಪನ್ಪಿನ ಪಾತೆರೊನು ಬಿರುವೆರೆಗ್ ಕೊರ್ದಿತ್ತೆರ್. ಆಂಡ ಸರಕಾರ ಕೋಶ ಮಲ್ಪುನೆನ್ ದುಂಬರಿಪಾದ್ ಜನವರಿ 6ಕ್ಕ್ ನೆಕ್ಕಾದ್ 10 ಕೋಟಿ ಪಣವುಲಾ ಬುಡುಗಡೆ ಮಲ್ದ್ಂಡ್ ಪನ್ದ್ ಪಂಡೆರ್.

ಜನವರಿ 5ಕ್ಕ್ ಬಿರುವ ನಾಯ್ಗನಕುಲು ಸುನೀಲ್ ಕುಮಾರೆರ್ನ ಒಟ್ಟುಗು ಬೊಮ್ಮಾಯಿಗ್ ಬೇಟಿ ಕೊರ್ದಿತ್ತೆರ್. ಆನಿ ಬೊಮ್ಮಾಯಿ ಕೋಶ ಮಲ್ಪುನ ಯೋಜನೆ ಉಂತಾವ, ಪ್ರಾಧಿಕಾರ ಮಲ್ಪುವ ಪನ್ಪಿ ಆಜೆ ಕೊರ್ದಿತ್ತೆರ್. ಆಂಡ ಇತ್ತೆ ಬೇತೆನೇ ನಡತೊಂದುಂಡು.

ಈ ಜನಾಂಗೊಲೆಡ್ ಬಿರುವ, ಈಡಿಗ ಸೇರ್ದ್ 26 ಪಂಗಡೊಲು ಉಲ್ಲ. ಈ ಜನಾಂಗದಕುಲು ಬ್ರಹ್ಮಶ್ರೀ ನಾರಾಯಣ ಗುರು ಅಭಿವೃದ್ದಿ ಪ್ರಾಧಿಕಾರ ಮಲ್ತ್ ಸಮಾಜದ ಬುಲೆಚ್ಚಿಲ್ ಗ್ 500 ಕೋಟಿ ಕಾಸ್ ಬುಡುಗಡೆ ಮಲ್ಪೊಡು ಪನ್ಪಿ ಬೇಡಿಕೆನ್ ದೀತ. ಇಂಚಿನ ಒಂಜಿ ಮಲ್ಲ ಸಮುದಾಯೊಗು ನಾರಾಯಣ ಗುರು ಕೋಶ ಮಲ್ತಿನವು ಅನ್ಯಾಯ. ಸರಕಾರೊಗು ಪ್ರಾಧಿಕಾರ ಮಲ್ಪರೆ ಮನಸ್ ಇಜ್ಜಿಡ ಅವೆನ್ ಬಿರುವ ಸಮಾಜೊಗು ತೆರಿಪಾವೊಡು ಪನ್ದ್ ಪಂಡೆರ್.